پەيشەنبە كۈنى ئەتىگەندە كامبودژا تەرىپىدىن ئېتىلغان بىر راكېتا تايلاندنىڭ سۇرىن ئۆلكىسى كاپ چېڭ ناھىيەسىدىكى بىر چېگرا تەرەققىيات مەركىزىگە تېگىپ كەم دېگەندە تۆت پۇقرانىڭ ھاياتىدىن ئايرىلغانلىقى ۋە ئىككى كىشىنىڭ يارىلانغانلىقى خەۋەر قىلىندى؛ بۇ ئۇچۇر تايلاند دۆلەت تاراتقۇلىرى تەرىپىدىن دەلىللەندى.
سى سا كېت ئۆلكىسىنىڭ كانتالاك ناھىيەسىدىكى بىر ماي قاچىلاش پونكىتىغا چۈشكەن بومبا پارتلاش ۋە ئوت ئاپىتىنى كەلتۈرۈپ چىقىرىپ، ئىككى پۇقرانىڭ جېنىغا زامىن بولدى. يەنە مەزكۇر ئۆلكىنىڭ كانتاراراك ناھىيەسىدىكى بان فۇئې بازىرىدىكى بىر تاللا بازىرىغا چۈشكەن كامبودژا راكېتالىرى بولسا ئىككى كىشىنىڭ ئۆلۈمى ۋە نۇرغۇن پۇقرانىڭ يارىلىنىشىغا سەۋەب بولدى. بۇ ئۇچۇرلارنى ئۆلكە باشلىقى ۋاتتانا فۇتتىچاتمۇ جەزملەشتۈردى.
تايلاند ئوت ئۆچۈرۈش ۋە قۇتقۇزۇش ئىدارىسى تاللا بازىرىدا ھاياتىدىن ئايرىلغان ئىككى كىشىنىڭ ئوقۇغۇچى ئىكەنلىكىنى ئېلان قىلدى. «Thai PBS» تېلېۋىزىيەسى مۇخبىرى جەسەتلەرنىڭ خارابىلىك ئاستىدىن تېپىلغانلىقىنى خەۋەر قىلدى.
تايلاند ئارمىيەسى كامبودژانى مەزكۇر مەركەزگە راكېتا ئېتىش بىلەن ئەيىبلىدى. ئارمىيە ئەمەلدارلىرىنىڭ بىلدۈرۈشىچە، كامبودژا قىسىملىرى تەرىپىدىن ئېتىلغان ئىككى دانە BM-21 تىپلىق باشقۇرۇلىدىغان بومبا ئەتىگەن سائەت 09:40 دا (خەلقئارا ۋاقتى سائەت 02:40) مەھەللە مەركىزىگە تەگكەن. تايلاند ھەربىي ئەمەلدارلىرى كامبودژا ئەسكەرلىرىنىڭ ئېغىر قوراللار بىلەن ئاۋۋال ئوق چىقارغانلىقىنى ئىلگىرى سۈرسە، كامبودژا دۆلەت مۇداپىئە مىنىستىرلىقى ئەسكەرلىرىنىڭ ھۇجۇمغا ئۇچرىغاندىن كېيىن پەقەت ئۆزىنى قوغدىغانلىقىنى بىلدۈردى.
بۇ قېتىمقى توقۇنۇش بىر تايلاند ئەسكىرى مىنا پارتلاپ پۇتىدىن ئايرىلىپ قېلىپ بىر كۈندىن كېيىن يۈز بەردى. تايلاند تالاش-تارتىشلىق چېگرا لىنىيەسىگە ئورۇنلاشتۇرۇشقا تەييارلانغان ئالتە دانە F-16 تىپلىق كۈرەشچى ئايروپىلاننىڭ بىرىنىڭ كامبودژاغا قارىتىپ ئوق چىقىرىپ، بىر ھەربىي نىشاننى ۋەيران قىلغانلىقىنى ئېلان قىلدى. پەيشەنبە كۈنى ئەتىگەندە ھەر ئىككى دۆلەت توقۇنۇشنى قارشى تەرەپنىڭ باشلىغانلىقىنى ئىلگىرى سۈردى.
پەيشەنبە كۈنى كامبودژا تايلاند بىلەن بولغان دىپلوماتىك مۇناسىۋىتىنىڭ دەرىجىسىنى تۆۋەنلەتكەنلىكىنى ۋە بانكوكتىكى بارلىق دىپلوماتىك خادىملىرىنى چېكىندۈرگەنلىكىنى ئېلان قىلدى. «Khmer Times» گېزىتىنىڭ خەۋىرىگە قارىغاندا، بۇ قارار تايلاندنىڭ كامبودژانىڭ ئەلچىسىنى چېگرادىن قوغلاپ چىقىرىشى ۋە فىنوم پېندىكى ئەلچىسىنى قايتۇرۇپ كېلىشىدىن كېيىن چىقىرىلغان. خەۋەردە دېيىلىشىچە، بانكوكتىكى كامبودژا ئەلچىخانىسىدا ۋەزىپە ئۆتەۋاتقان بارلىق خادىملارنىڭ دۆلەتكە قايتىشى بۇيرۇلغان.
ئون نەچچە يىلدىن بۇيان داۋاملىشىۋاتقان بۇ تالاش-تارتىش، 15 يىل ئىلگىرىمۇ قانلىق ھەربىي توقۇنۇشلارنى كەلتۈرۈپ چىقارغان ئىدى. بۇ يىل ماي ئېيىدا بىر كامبودژا ئەسكىرىنىڭ توقۇنۇشتا ئۆلتۈرۈلۈشى بىلەن جىددىيچىلىك قايتىدىن كەسكىنلەشكەن. پەيشەنبە كۈنى ئەتىگەندە، تايلاندنىڭ سۇرىن ئۆلكىسى بىلەن كامبودژانىڭ ئوددار مېئانچېي رايونى ئوتتۇرىسىدىكى چېگرادا، ئىككى ئىبادەتخانا يېنىدا يېڭى توقۇنۇشلار باشلاندى.
سۇرىن ئۆلكىسى كاب چېڭ ناھىيەسى ئەمەلدارى سۇتتىروت چاروئېنتاناساك «رويتېرس» ئاگېنتلىقىغا: «توپ ئوقى ئاھالىلەرنىڭ ئۆيلىرىگە چۈشتى» دەپ، كامبودژا تەرەپنىڭ ھۇجۇمى ھەققىدە مەلۇمات بەردى. ناھىيە ئەمەلدارلىرى چېگراغا يېقىن 86 يېزىدىن 40 مىڭ پۇقرانىڭ تېخىمۇ بىخەتەر رايونلارغا يۆتكەلگەنلىكىنى بىلدۈردى.
كامبودژا دۆلەت مۇداپىئە مىنىستىرلىقى باياناتچىسى مالى سوچېئاتا بايانات ئېلان قىلىپ: «تايلاند ئارمىيەسى كامبودژا پادىشاھلىقىنىڭ زېمىن پۈتۈنلۈكىگە دەخلى-تەرۇز قىلىپ، دۆلەتنىڭ ئىگىلىك ھوقۇقىدىكى زېمىنىنى قوغداۋاتقان كامبودژا قىسىملىرىغا قوراللىق ھۇجۇم قىلدى» دېدى. تايلاند ئارمىيەسى بولسا، كامبودژا ئەسكەرلىرىنى ئاۋۋال ئوق چىقىرىش بىلەن ئەيىبلەپ، كېيىن ئۇلارنىڭ پۇقرالارغا قارىتا «نىشانلىق ھۇجۇم» قىلغانلىقىنى ئىلگىرى سۈردى.
كېيىنچە، بىرى راكېتا ھەرىكەتلەندۈرگۈچلۈك قول بومبىسى كۆتۈرگەن ئالتە نەپەر قوراللىق كامبودژا ئەسكىرى تايلاند قاراۋۇلخانىسىنىڭ ئالدىدىكى تىكەنلىك سىم توسۇققا يېقىنلاشتى. تايلاند ئەسكەرلىرى ئاگاھلاندۇرۇش مەقسىتىدە ۋارقىرىغان بولسىمۇ، ئەتىگەن سائەت 08:20 ئەتراپىدا كامبودژا قىسىملىرى تايلاند بازىسىدىن تەخمىنەن 200 مېتىر يىراقلىقتىكى ئىبادەتخانىنىڭ شەرقىي تەرىپىگە ئوق چىقاردى.
تايلاندنىڭ ۋاقىتلىق باش مىنىستىرى فۇمتام ۋېچاياچاي ۋەزىيەت ھەققىدە توختىلىپ: «ۋەزىيەتنى ئېھتىياتچانلىق بىلەن بىر تەرەپ قىلىش ۋە خەلقئارا قانۇنغا ئەمەل قىلىشىمىز شەرت. ئىگىلىك ھوقۇقىمىزنى قوغداش ئۈچۈن پۈتۈن كۈچىمىز بىلەن تىرىشىمىز» دېدى.
