پەلەستىن سەھىيە مىنىستىرلىقى يەكشەنبە كۈنى ئېلان قىلغان باياناتىدا، ئىشغال ئاستىدىكى غەربىي قىرغاقتا قانۇنسىز ئىسرائىلىيەلىك كۆچمەنلەر ئوق چىقىرىپ ئىككى پەلەستىنلىكنى ئۆلتۈرگەنلىكىنى خەۋەر قىلدى. بۇ ۋەقە ئىككى كۈن ئىچىدە يۈز بەرگەن ئىككىنچى قېتىملىق ئۆلۈم خاراكتېرلىك ھۇجۇم بولۇپ قالدى.
مىنىستىرلىقنىڭ باياناتىدا، 24 ياشلىق سائر فاروق ھامايەل (Thaer Faruq Hamayel) بىلەن 57 ياشلىق فارىئە جەۋدەت ھامايەل (Farea Jawdat Hamayel) نىڭ راماللاھنىڭ شىمالىي شەرقىدىكى ئەبۇ فالاھ بازىرىدا قانۇنسىز كۆچمەنلەر تەرىپىدىن ئېتىپ ئۆلتۈرۈلگەنلىكى بىلدۈرۈلدى.
باياناتتا ۋەقەنىڭ قاچان يۈز بەرگەنلىكى ھەققىدە ئېنىق ئۇچۇر بېرىلمىدى ۋە باشقا تەپسىلاتلار ھەمبەھىرلىنىلمىدى. ئىسرائىلىيە ئارمىيەسى بولسا بۇ ھەقتىكى سوئاللارغا جاۋاب بەرمىدى.
ئىسرائىلىيە 1967-يىلىدىن بۇيان ئىشغال قىلىۋالغان غەربىي قىرغاقتا زوراۋانلىق ۋەقەلىرى، 2023-يىلى ئۆكتەبىردە غەززەگە قارشى باشلانغان ئۇرۇشتىن كېيىن شىددەت بىلەن كۆپەيدى. ئۇرۇش توختىتىش كېلىشىملىرىگە قارىماي، زوراۋانلىق ۋەقەلىرى يەنىلا داۋاملاشماقتا.
شەنبە كۈنى راماللاھنى مەركەز قىلغان سەھىيە مىنىستىرلىقى ۋە بىر يەرلىك بازار باشلىقى، قانۇنسىز ئىسرائىلىيەلىك كۆچمەنلەرنىڭ غەربىي قىرغاقتىكى ۋادى ئەل-راھىم يېزىسىغا قىلغان ھۇجۇمىدا بىر پەلەستىنلىك ئەرنىڭ ئۆلگەنلىكىنى، ئىنىسىنىڭ بولسا يارىلانغانلىقىنى ئاشكارىلىدى.
يېقىن ئەتراپتىكى تۇۋانى يېزىلىق كېڭىشىنىڭ باشلىقى مۇھەممەد رابائى AFP ئاگېنتلىقىغا بەرگەن باياناتىدا، قانۇنسىز كۆچمەنلەرنىڭ رايوندىكى ئۆيلەرگە بېسىپ كىرىپ 27 ياشلىق ئامىر مۇھەممەد شناران (Amir Mohammad Shnaran) نىڭ ئائىلىسىگە ھۇجۇم قىلغانلىقىنى، شناراننىڭ كېيىن قازا قىلغانلىقىنى ئېيتتى.
ئىسرائىلىيە ئارمىيەسى بولسا، ئىسرائىلىيەلىكلەر بىلەن پەلەستىنلىكلەر ئوتتۇرىسىدا «شىددەتلىك توقۇنۇش» يۈز بەرگەنلىكى ھەققىدىكى مەلۇماتقا ئاساسەن، ئەسكەر ۋە ساقچىلارنىڭ رايونغا ئەۋەتىلگەنلىكىنى بىلدۈردى. ئارمىيە ۋەقە ئۈستىدە تەكشۈرۈش باشلانغانلىقىنى ئېلان قىلدى.
پەلەستىن سەھىيە مىنىستىرلىقىنىڭ سانلىق مەلۇماتلىرىغا قارىغاندا، غەززە ئۇرۇشى باشلانغاندىن بۇيان، ئىسرائىلىيە كۈچلىرى ۋە قانۇنسىز كۆچمەنلەر غەربىي قىرغاقتا جەمئىي 1042 پەلەستىنلىكنى ئۆلتۈرگەن.
