ئامېرىكا پىرېزىدېنتى دونالد ترامپ، ئامېرىكانىڭ ئىران بىلەن ناھايىتى ياخشى سۆھبەتلەرنى ئېلىپ بېرىۋاتقانلىقىنى ئېيتتى.
شەنبە كۈنى ئاقسارايدىكى ئىشخانسىدا سۆز قىلغان ترامپ: «سۆھبەتلىرىمىز ناھايىتى ياخشى داۋاملىشىۋاتىدۇ. مۇساپە ناھايىتى ياخشى كېتىۋاتىدۇ. 47 يىلدىن بېرى قىلىپ كەلگىنىدەك ئازراق ھىيلىگەرلىك قىلماقچى بولۇشتى. ھېچكىم ئۇلارغا قارشى تۇرالمىغان ئىدى. بىز تۇردۇق» دېدى.
ترامپ سۆزىنى داۋاملاشتۇرۈپ: «ئۇلارنىڭ دېڭىز ئارمىيەسى يوق، ھاۋا ئارمىيەسى يوق، رەھبەرلىرى يوق. ھېچنېمىسى يوق. ئەمەلىيەتتە... بۇ بىر تۈزۈم ئۆزگىرىشىدۇر. بۇنى مەجبۇرىي تۈزۈم ئۆزگىرىشى دەپ ئاتىسىڭىز بولىدۇ، ئەمما بىز ئۇلار بىلەن سۆزلىشىۋاتىمىز» دېدى.
ئىران بىلەن داۋاملىشىۋاتقان سۆھبەتلەرگە ئالاقىدار: «ئۇلار بىلەن سۆزلىشىۋاتىمىز... قاتتىق بىر پوزىتسىيە تۇتۇۋاتىمىز. كۈننىڭ ئاخىرىدا بەزى ئۇچۇرلارغا ئىگە بولىمىز» دەپ قوشۇمچە قىلدى.
ترامپ يەنە، تېھراننىڭ ئىستراتېگىيەلىك دېڭىز يولىنى يەنە بىر قېتىم تاقالدى دەپ ئېلان قىلىشىدىن كېيىن، ھورمۇز بوغۇزىنىڭ تەقدىرى مەسىلىسىدىكى تۇراقسىز پوزىتسىيەلىرى بىلەن ۋاشىنگتونغا تەھدىت" سالماسلىق توغرىسىدا ئىراننى ئاگاھلاندۇردى.
ئۇ: «بوغۇزنى يەنە تاقىماقچى بولۇشتى. بىلىسىلەر، يىللاردىن بېرى قىلىپ كەلگىنىدەك ئەمما بىزگە تەھدىت سالالمايدۇ» دېدى.
ئۇرۇش توختىتىش
ئامېرىكا ۋە ئىسرائىلىيەنىڭ 28-فېۋرالدا ئىرانغا قارىتا باشلىغان ھۇجۇملىرىدىن بۇيان توقۇنۇشلار كۈچەيدى. تېھران، ئىسرائىلىيەنى ۋە ئامېرىكا ھەربىي كۈچلىرىگە ساھىبخانلىق قىلىۋاتقان پارس قولتۇقى دۆلەتلىرىنى نىشان قىلغان ئۇچقۇچىسىز ئايروپىلان ۋە باشقۇرۇلىدىغان بومبا ھۇجۇملىرى بىلەن جاۋاب قايتۇردى.
پاكىستان ئىككى ھەپتىلىك ئۇرۇش توختىتىشقا ۋاسىتىچىلىق قىلغان 8-ئاپرېلدىن بېرى ئۇرۇش توختىغان ئەھۋالدا تۇرماقتا. ۋاشىنگتون ۋە تېھران ئۆتكەن ھەپتە ئاخىرى پاكىستاندا سۆھبەت ئۆتكۈزدى ۋە ئىسلامئابادتا يەنە بىر قېتىملىق سۆھبەت ئۈچۈن خىزمەتلەر داۋاملاشماقتا.
ترامپ يەنە، ئامېرىكا يېمەكلىك ۋە دورا نازارەتچىلىك ئىدارىسىغا، ھازىرقى تېببىي تەرەققىياتتا يېڭىچە داۋالاش دورىلىرى دەپ بېكىتىلگەن بەزى روھىي ھالەتنى ئۆزگەرتكۈچى دورىلارنىڭ تەكشۈرۈشىنى تېزلىتىش بۇيرۇقىنى ئۆز ئىچىگە ئالغان بىر پىرېزىدېنتلىق قارارنامىسىنىمۇ ئىمزالىدى.
ترامپ، بۇ قارارنامىنىڭ زۆرۈر بولمىغان بيۇروكراتىك توسالغۇلارنى يوقۇتىدىغانلىقىنى ۋە ئامېرىكا يېمەكلىك ۋە دورا نازارەتچىلىك ئىدارىسى FDA بىلەن پېشقەدەم جەڭچىلەر ئىشلىرى مىنىستىرلىقى ئوتتۇرىسىدىكى ئۇچۇر ھەمبەھىرلىنىشىنى ياخشىلايدىغانلىقىنى شۇنداقلا FDA نىڭ تەستىقىدىن ئۆتكەن ھەر قانداق روھىي ھالەتنى ئۆزگەرتكۈچى دورىنىڭ قانۇنىي تۈرگە ئايرىلىشىنى ئاسانلاشتۇرىدىغانلىقىنى بىلدۈردى.
