ئارلىڭتون مىللىي قەبرىستانلىقىدىكى پېشقەدەم ئەسكەرلەرنى خاتىرىلەش بايرىمى مۇراسىمىدىن كېيىن خاتىرە سۈرەتكە چۈشۈش جەريانىدا شاۋقۇن چىقارغان ئامېرىكا دۆلەت مۇداپىئە مىنىستىرى پېت خېگسېت ۋە ئۇنىڭ ھەمراھلىرى، نۆۋەتچى ئەسكەر تەرىپىدىن «جىم بولۇش» توغرىسىدا ئاگاھلاندۇرۇلدى.
مۇراسىمدىن كېيىن نامەلۇم ئەسكەر خاتىرە مۇنارى ئالدىدا خاتىرە سۈرەتكە چۈشكەن خېگسېت ۋە ئۇنىڭ ھەمراھلىرى، سۈرەتكە چۈشۈپ بولغاندىن كېيىن ئۇ يەردىن ئايرىلىۋېتىپ ئۈنلۈك ئاۋازدا كۈلۈپ پاراڭلاشقاچقا، خاتىرە مۇنارىدىكى نۆۋەتچى ئەسكەرنىڭ ئاگاھلاندۇرۇشىغا ئۇچرىدى.
گۇرۇپپىدىن كۆتۈرۈلگەن قاقاقلاپ كۈلۈش ئاۋازلىرىنىڭ ئارقىدىنلا نۆۋەتچى ئەسكەرنىڭ، «بارلىق زىيارەتچىلەر ھەر ۋاقىت جىمجىتلىقنى ۋە ھۆرمەت كەيپىياتىنى ساقلىشى كېرەك» دەپ ئۈنلۈك ئاۋازدا قىلغان ئاگاھلاندۇرۇشى كامېرالاردا كۆرۈلدى.
ئىجتىمائىي تاراتقۇلاردا مەزكۇر ۋەقە بىلەن مۇناسىۋەتلىك خېگسېت ۋە ئۇنىڭ ھەمراھلىرىغا نارازىلىق بىلدۈرگەن نۇرغۇن تورداشلار، ھەربىي بىر خاتىرە مۇنارى يېنىدا ھەممە ئادەمنىڭ تېخىمۇ ھۆرمەت بىلەن مۇئامىلە قىلىشى كېرەكلىكى توغرىسىدىكى كۆزقاراشلىرىنى ئورتاقلاشتى.
