ئافغانىستان ھۆكۈمىتىنىڭ «پاكىستان دۆلەت خەۋپسىزلىك كۈچلىرى بەدەخشان ۋىلايىتىدىكى قوراللىق خەلق ئەسكەرلىرىگە ياردەم بېرىۋاتىدۇ ياكى ئۇلارغا ھەمراھلىق قىلىۋاتىدۇ» دېگەن ئەيىبلەشلىرى پاكىستان تەرىپىدىن رەت قىلىندى.
پاكىستان ئۇچۇر ۋە تەشۋىقات ئىشلىرى مىنىستىرلىقى ئافغانىستان ھۆكۈمىتىنىڭ ئەيىبلەشلىرىگە قارىتا ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، بۇ خىل قاراشلارنىڭ ھەقىقەتتىن پۈتۈنلەي يىراق ئىكەنلىكىنى ئەسكەرتتى.
باياناتتا، مەزكۇر ئەيىبلەش پوزىتسىيەسىگە قاتتىق ئىنكاس قايتۇرۇلۇپ: «بۇ ئاساسسىز سۆزلەرنى قوللايدىغان ھېچقانداق ئىشەنچلىك دەلىل - ئىسپات كۆرسىتىلمىدى» دېگەن ئىبارىلەر قوللىنىلدى.
بەدەخشاندا يۈز بەرگەن زوراۋانلىق ۋەقەلىرىنىڭ سىرتقى كۈچلەرنىڭ مۇداخىلىسىدىن كېلىپ چىقمىغانلىقى تەكىتلەنگەن باياناتتا، مەۋجۇت ۋەزىيەتنىڭ پاكىستاننىڭ ئارىلىشىشىنى ئەمەس، بەلكى ئافغانىستاننىڭ ئۆز ئىچكى خەۋپسىزلىك ۋە باشقۇرۇش مەسىلىلىرىنى ئەكس ئەتتۈرىدىغانلىقى ئالاھىدە ئەسكەرتىلدى.
باياناتتا يەنە، مۇستەقىل دوكلاتلارنىڭ رايوندىكى توقۇنۇشلارنى «ئافغانىستان ھۆكۈمىتىگە قارىتا ئېلىپ بېرىلىۋاتقان قوراللىق كۈرەش» دەپ تەسۋىرلىگەنلىكى، بۇنىڭدا پاكىستاننىڭ چېتىشلىقى بارلىقىغا دائىر ھېچقانداق پاكىتنىڭ يوقلۇقى بايان قىلىندى.
پاكىستان ھۆكۈمىتىنىڭ ئىزچىل تۈردە تىنچ ۋە مۇقىم ئافغانىستاننى قوللاپ كېلىۋاتقانلىقى، قوشنا دۆلەتتە مۇقىمسىزلىق پەيدا قىلىش مەقسىتىنىڭ يوقلۇقى تەكىتلەنگەن باياناتتا مۇنداق دېيىلدى:
«كابۇل ھاكىمىيىتى ئافغانىستاننىڭ ئىچكى مەسىلىلىرى ئۈچۈن پاكىستاننى ئەيىبلەشنىڭ ئورنىغا، ئۆزىنىڭ باشقۇرۇشتىكى مەغلۇبىيەتلىرىدىن كېلىپ چىققان ۋە بارغانسېرى كۈچىيىۋاتقان مەسىلىلەرنى ھەل قىلىشى كېرەك. ئىسپاتسىز ئەيىبلەشلەر ھەرگىز ھەقىقەتنىڭ ئورنىنى باسالمايدۇ.»
ئافغانىستان ھۆكۈمىتىنىڭ باياناتچىسى زابىھۇللاھ مۇجاھىد «Aamaj News» خەۋەر ئاگېنتلىقىغا بەرگەن باياناتىدا، پاكىستان دائىرىلىرىنىڭ بەدەخشاندا يۈز بەرگەن زوراۋانلىق ۋەقەلىرىگە ئەمەلىيەتتە ئارىلىشىۋاتقانلىقىنى ئىلگىرى سۈرگەن ئىدى.
