ياۋروپا كېڭىشى رەئىسى ئانتونىيو كوستا بىلەن ياۋروپا كومىتېتى رەئىسى ئۇرسۇلا ۋون دەر لېيېن نىيۇ يوركتىكى ب د ت ئومۇمىي كېڭىشى دائىرىسىدە سۈرىيە ھۆكۈمىتىنىڭ باشلىقى ئەھمەد شارا (شەرئ) بىلەن كۆرۈشتى.
سەيشەنبە كۈنى ئىجتىمائىي تاراتقۇ سۇپىسى X تە ئېلان قىلىنغان ئورتاق باياناتتا، ياۋروپا ئىتتىپاقى رەھبەرلىرى شارا بىلەن سۈرىيەنىڭ ئۆتكۈنچى باسقۇچتا دۇچ كەلگەن قىيىنچىلىقلىرى ھەققىدە «ياخشى سۆھبەت» ئۆتكۈزگەنلىكىنى بىلدۈردى.
باياناتتا ياۋروپا ئىتتىپاقىنىڭ «زىيانلىق تاشقى ئارىلىشىشلاردىن خالىي، ھەقىقىي، ھەممىنى ئۆز ئىچىگە ئالغان، تىنچ ۋە سۈرىيەنىڭ ئۆزى يېتەكچىلىك قىلىدىغان ئۆتكۈنچى باسقۇچ»نى قوللايدىغانلىقى تەكرارلاندى.
باياناتتا: «بىز سىياسىي دىيالوگنى كۈچەيتىشكە، جىددىي ئىنسانپەرۋەرلىك ئېھتىياجلىرىنى قاندۇرۇشقا ۋە سۈرىيەنىڭ ئىجتىمائىي-ئىقتىسادىي ئەسلىگە كېلىشى ۋە قايتا قۇرۇلۇشىنى قوللاشقا بەل باغلىدۇق» دېگەن ئىبارىلەرگە ئورۇن بېرىلدى.
تەخمىنەن 25 يىلدىن بۇيان سۈرىيە ھاكىمىيىتىنىڭ رەھبىرى بولغان بەششار ئەسەد ئۆتكەن يىلى دېكابىردا رۇسىيەگە قېچىپ كەتكەندىن كېيىن، 1963-يىلىدىن بۇيان ھاكىمىيەت يۈرگۈزۈپ كەلگەن بەئس پارتىيەسى ھاكىمىيىتى ئاخىرلاشتى. يانۋاردا ئەھمەد شارا رەھبەرلىكىدە يېڭى بىر ئۆتكۈنچى ھۆكۈمەت قۇرۇلدى.
ئەسەد ۋەزىپىسىدىن ئېلىپ تاشلانغاندىن بۇيان، سۈرىيەنىڭ يېڭى ھۆكۈمىتى سىياسىي ۋە ئىقتىسادىي ئىسلاھاتلارنى يولغا قويۇش، ئىجتىمائىي ئىناقلىقنى ئىلگىرى سۈرۈش ۋە رايونلۇق ھەم خەلقئارالىق شېرىكلەر بىلەن بولغان ھەمكارلىقنى كېڭەيتىشكە ئەھمىيەت بېرىپ كەلمەكتە.
