پاكىستان ئارمىيەسى دۆلەتنىڭ جەنۇبىدىكى كاراچى شەھىرىدە شەنبە كۈنى كەچتە ئېلىپ بېرىلغان تېررورلۇق ھۇجۇمىدا 3 پاكىستان كۆزەتچى ئەسكىرىنىڭ ھاياتىدىن ئايرىلغانلىقىنى ئېلان قىلدى.
پاكىستان قوراللىق قىسىملىرى تەرىپىدىن يەكشەنبە كۈنى ئېلان قىلىنغان باياناتتا، پورت شەھىرىدىكى پاكىستان كۆزەتچى قىسىملىرى لاگېرىغا قىلىنغان ھۇجۇمغا «جەمائەتۇل ئاھرار» تەشكىلاتى مەسئۇل دەپ كۆرسىتىلدى.
باياناتتا، ھۇجۇمچىلارنىڭ لاگېرنىڭ ئاساسلىق كىرىش ئېغىزىدا پارتلاش ئېلىپ بارغاندىن كېيىن بىخەتەرلىك لىنىيەسىدىن بۆسۈپ ئۆتۈشكە ئۇرۇنغانلىقى، ئەمما پاكىستان كۆزەتچى ئەسكەرلىرىنىڭ دەل ۋاقتىدا قايتۇرما زەربە بېرىشى بىلەن توسۇپ قېلىنغانلىقى بىلدۈرۈلدى.
توقۇنۇشتا 3 ھۇجۇمچى ئۆلتۈرۈلدى، بىر ھۇجۇمچى يارىلاندى. ھۇجۇمدا يەنە 3 پاكىستان كۆزەتچى ئەسكىرى ھاياتىدىن ئايرىلىپ، 4 بىخەتەرلىك خادىمى يارىلاندى.
جەمائەتۇل ئاھرار تەشكىلاتى، پاكىستان تالىبانلىرى دەپمۇ تونۇلغان «تەھرىكى تالىبان پاكىستان» بىلەن ئالاقىسى بار بىر قوراللىق گۇرۇپپا دەپ قارالماقتا. پاكىستاندا يېقىنقى يىللاردىن بىرى، زور بىر قىسمىنى پاكىستان تالىبانلىرى ۋە ئۇنىڭغا چېتىشلىق تەشكىلاتلار ئۈستىگە ئالغان ھۇجۇملار كۆپەيمەكتە.
ئىسلاماباد ھۆكۈمىتى، ئافغانىستاندا تالىبانلارنىڭ 2021-يىلى قايتىدىن ھاكىمىيەتنى قولغا ئېلىشىدىن بۇيان، مىلىتانلارنىڭ ئافغانىستاندا بىخەتەر پاناھلىنىش ئورۇنلىرىغا ئېرىشىۋاتقانلىقىنى ئىلگىرى سۈرمەكتە. كابىل ھۆكۈمىتى بولسا بۇ ئەيىبلەشلەرنى كۆپ قېتىم رەت قىلغان ئىدى.
پاكىستان قايتۇرما زەربە بېرىشكە ۋەدە بەردى
پاكىستان قوراللىق قىسىملىرى، تاشقى كۈچلەر تەرىپىدىن قوللىنىۋاتقانلىقىنى ئوتتۇرىغا قويغان تېررورلۇق تەھدىتىنى دۆلەتتىن پۈتۈنلەي يوقىتىش ئۈچۈن ھەربىي ھەرىكەتلەرنىڭ ئۈزلۈكسىز داۋاملىشىدىغانلىقىنى تەكىتلەپ، بۇ ھۇجۇمغا چوقۇم تېگىشلىك جاۋاب قايتۇرۇلىدىغانلىقىنى ئېلان قىلدى.
AFP ئاگېنتلىقىنىڭ مۇخبىرلىرى، شەنبە كۈنى كېچىدە كاراچىدا قويۇق قورال ئاۋازلىرىنىڭ ئاڭلانغانلىقىنى مەلۇم قىلدى. بىخەتەرلىك قىسىملىرى سىند ئۆلكىسىنىڭ مەركىزى كاراچىدىكى «موسامىئات چورانگى» رايونى ئەتراپىدىكى يوللارنى قاتناشقا تاقىدى.
ئېغىر قورال-ياراق ۋە ئوق-دورا توشۇغان يېرىم ھەربىي قىسىملارنىڭ رايونغا ئورۇنلاشتۇرۇلغانلىقى، بىر قىسىم بىخەتەرلىك خادىملىرىنىڭ كىچىك يۈك ماشىنىلىرى بىلەن كوچىلاردا چارلاش ئېلىپ بېرىۋاتقانلىقى كۆرۈلدى.
سىند ئۆلكىسىنىڭ باش مىنىستىرى سەيىد مۇرات ئالى شاھ، ۋەقەگە ئائىت تەپسىلىي دوكلات تەييارلاش بۇيرۇقىنى بەردى.
پاكىستان پىرېزىدېنتى ئاسىف ئالى زەردارى X تە ئېلان قىلغان باياناتىدا، ھاياتىدىن ئايرىلغان ئەسكەرلەرنىڭ ئائىلە-تاۋابىئاتلىرىغا تەزىيە بىلدۈرىدىغانلىقىنى ۋە يارىلانغان بىخەتەرلىك خادىملىرىنىڭ تېزرەك ئەسلىگە كېلىشىنى ئۈمىد قىلىدىغانلىقىنى تىلغا ئالدى.
