يېرىم ھەربىي تېز ھەرىكەت قوللىغۇچى قىسىملىرى (RSF) پەيشەنبە كۈنى سۇداننىڭ خارتۇم خەلقئارا ئايرودۇرۇمىغا ئۇدا ئۈچىنچى كۈنى يېڭى بىر قېتىملىق ئۇچقۇچىسىز ئايروپىلان ھۇجۇمى قوزغىدى.
سۇدان خەۋەر ئاگېنتلىقىنىڭ شاھىتلارنىڭ سۆزىنى نەقىل كەلتۈرۈپ خەۋەر قىلىشىچە، يەتتە ئۇچقۇچىسىز ئايروپىلان ئايرودۇرۇمغا ۋە جەنۇبتىكى قوشنا مەھەللىلەرگە ھۇجۇم قىلغان، بۇ ھۇجۇم ئاھالە ئارىسىدا ۋەھىمە پەيدا قىلغان.
خەۋەرگە ئاساسلانغاندا، ئايرودۇرۇمدا پارتلاش ئاۋازى ئاڭلانغان.
تېز ھەرىكەت قوللىغۇچى قىسىملىرى سەيشەنبە كۈنى ئايرودۇرۇمغا ۋە خارتۇم ئۆلكىسىدىكى باشقا مۇھىم نىشانلارغا ھۇجۇم قىلىشنى باشلىغان. بۇ ھۇجۇملار ئايرودۇرۇمنىڭ ئىككى يىلدىن ئارتۇق تاقاق تۇرغاندىن كېيىن قايتا ئېچىلىشىدىن بىر كۈن بۇرۇن يۈز بەرگەن.
ئايرودۇرۇم چارشەنبە كۈنى تۇنجى پۇقرالار يولۇچىلار ئايروپىلانىنى قوبۇل قىلغان.
«راكوبا خەۋەرلىرى» گە سۆز قىلغان خەۋپسىزلىك مەنبەلىرىنىڭ بىلدۈرۈشىچە، تېز ھەرىكەت قوللىغۇچى قىسىملىرىنىڭ ھۇجۇمىدىن كېيىن ئايرودۇرۇمدا چوڭ زىيان كۆرۈلمىگەن.
گېزىتنىڭ خەۋىرىگە قارىغاندا، دۆلەتنىڭ ئەڭ مۇھىم ئەسلىھەلىرىگە قىلىنغان يېقىنقى ھۇجۇملار تېز ھەرىكەت قوللىغۇچى قىسىملىرى بىلەن سۇدان ئارمىيەسى ئوتتۇرىسىدىكى توقۇنۇشنىڭ ماھىيىتىدە ئۆزگىرىش بولغانلىقىنى كۆرسىتىپ بېرىدىكەن. بۇ ئۆزگىرىش، قۇرۇقلۇق توقۇنۇشىدىن ھەربىي ۋە سىياسىي بېسىم ۋاسىتىسى سۈپىتىدە ئۇچقۇچىسىز ئايروپىلانلاردىن پايدىلىنىشقا يۈزلەنگەنلىكىنى ئىپادىلەيدىكەن.
بۇ خەۋەرلەرگە مۇناسىۋەتلىك ھالدا ئىسيانچى گۇرۇپپىدىن دەرھال بىر بايانات ئېلان قىلىنمىدى.
ئارمىيە بىلەن تېز ھەرىكەت قوللىغۇچى قىسىملىرى 2023-يىلى 4-ئايدىن بېرى ئۇرۇش ھالىتىدە. بىرلەشكەن دۆلەتلەر تەشكىلاتى ۋە يەرلىك ئەمەلدارلارنىڭ بىلدۈرۈشىچە، بۇ ئۇرۇش 20 مىڭدىن ئارتۇق ئادەمنىڭ ئۆلۈشىگە ۋە 14 مىليون كىشىنىڭ ئۆي-ماكانىدىن ئايرىلىشىغا سەۋەب بولغان.
