ئامېرىكا قوشما ئىشتاتلىرىنىڭ نۇقتىلىق ھالدا ئىران ۋەزىيىتىنى كۆزىتىدىغان كىشىلىك ھوقۇق تەشكىلاتى (HRANA)نىڭ چارشەنبە كۈنى (بۈگۈن)دىكى باياناتىغا ئاساسلانغاندا، ئىراندا داۋاملىشىۋاتقان نامايىشلاردا ھاياتىدىن ئايرىلغانلار سانى 2571 گە يەتكەن بولۇپ،  ئىران ھاكىمىيىتى يىللاردىن بۇيانقى ئەڭ كۈچلۈك ئۆكتىچىلەر نارازىلىقىغا دۇچ كەلگەن.

HRANA نىڭ دوكلاتىدا، 2403 نامايىشچى، ھۆكۈمەت كۈچلىرى بىلەن ئالاقىسى بار 147 كىشى، 12 بالا ۋە نامايىشلارغا قاتناشمىغان توققۇز پۇقرانىڭ ئۆلۈمىنىڭ دەلىللەنگەنلىكى قەيت قىلىندى.

ئىرانلىق بىر ئەمەلدار سەيشەنبە كۈنى تەخمىنەن 2000 كىشىنىڭ ھاياتىدىن ئايرىلغانلىقىنى ئېتىراپ قىلدى. بۇ، ئىككى ھەپتىدىن كۆپرەك ۋاقىت ئىلگىرى پۈتۈن دۆلەت مىقياسىدا پارتلىغان قالايمىقانچىلىق باشلانغاندىن بۇيان، دائىرىلەر تەرىپىدىن ئېلان قىلىنغان تۇنجى ئومۇمىي سان ھېسابلىنىدۇ.

ناچارلىشىۋاتقان ئىقتىسادىي شارائىت سەۋەبىدىن كېلىپ چىققان نامايىشلار، يېقىنقى ئۈچ يىل ئىچىدە ئىران رەھبەرلىرى دۇچ كەلگەن ئەڭ ئېغىر ئىچكى خىرىسقا ئايلاندى. بۇ نامايىشلار ئۆتكەن يىلى ئىسرائىلىيە ۋە ئامېرىكا قوشما ئىشتاتلىرىنىڭ ھۇجۇملىرىدىن كېيىن كۈچەيگەن خەلقئارالىق بېسىم ئارقا كۆرۈنۈشىدە يۈز بەرمەكتە.

ھەربىي ھەرىكەت كۈنتەرتىپتە

ئامېرىكا قوشما ئىشتاتلىرى پىرېزىدېنتى دونالد ترامپ سەيشەنبە كۈنى ئىرانلىقلارنى نامايىشنى داۋاملاشتۇرۇشقا چاقىرىپ، «ياردەم يولدا» دېدى.

ترامپ ئۆز سۆزىگە ئىزاھات بېرىشى تەلەپ قىلىنغاندا، مۇخبىرلارغا: «بۇنى ئۇلار ئۆزلىرى ھەل قىلىشى كېرەك»، دەپ جاۋاب بەردى، ئەمما ھەربىي ھەرىكەت قوللىنىشنىڭ بېسىمغا قارىتا ئويلىنىلىۋاتقان تاللاشلار ئارىسىدا بارلىقىنى ئەسكەرتتى.

ئىران دائىرىلىرى بولسا ئامېرىكا قوشما ئىشتاتلىرى ۋە ئىسرائىلىيەنى قالايمىقانچىلىقنى كۈشكۈرتۈش بىلەن ئەيىبلەپ، يۈز بەرگەن ئۆلۈم ۋەقەلىرىنى چەت ئەللىكلەرنىڭ يېتەكچىلىكىدە ھەرىكەت قىلىۋاتقان «تېررورلۇق ئۇنسۇرلىرى»غا باغلىدى.