تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسىنىڭ باشلىقى بۇرھانەتتىن دۇران، سۈنئىي ئەقىل سىستېمىلىرى تەربىيەلىنىدىغان سانلىق مەلۇمات ئۇل ئەسلىھەلىرىنى كۈچەيتىش ئارقىلىق ساختا ئۇچۇرلارغا قارشى كۈرەش قىلىشنى مەقسەت قىلغان يېڭى بىر ھۆكۈمەت پىلانىنى جاكارلىدى.

دۇران چارشەنبە كۈنى ئېلان قىلغان باياناتىدا، سۈنئىي ئەقىل مودېللىرىنىڭ دەلىللەنمىگەن  دەۋالار بىلەن ئەمەس، بەلكى دەلىللەنگەن ئۇچۇرلار بىلەن تەمىنلىنىشىگە كاپالەتلىك قىلىش ئۈچۈن ئىشەنچلىك سانلىق مەلۇمات كىرگۈزۈش ئۇسۇلىنى تەرەققىي قىلدۇرۇشقا باشلىغانلىقىنى بىلدۈردى.

بۇ تىرىشچانلىقنىڭ بىر قىسمى سۈپىتىدە، مۇشۇ ئاينىڭ باشلىرىدا تەييارلانغان سانلىق مەلۇماتلار بەش چوڭ تىل مودېلىنى سىناش ئۈچۈن ئىشلىتىلدى.

نەتىجىلەر، دۇنيادىكى سۈنئىي ئەقىل سىستېمىلىرىنىڭ ساختا ئۇچۇرلارغا قارشى تۇرۇش ئىقتىدارىنىڭ يەنىلا ئاجىز ئىكەنلىكىنى ئاشكارىلىدى، شۇنداقلا تېخىمۇ پۇختا ۋە ئىشەنچلىك سانلىق مەلۇمات مەنبەلىرىگە ئېھتىياج بارلىقىنى ئايدىڭلاشتۇرۇپ بەردى.

ئىشەنچلىك سۈنئىي ئەقىل ئۇچۇر ئامبىرى قۇرۇش

دۇران تۈركىيەنىڭ رەسمىي «ساختا ئۇچۇرلارنى پاش قىلىش خەۋەرلىرى» نى سۈنئىي ئەقىل سىستېمىلىرى ئۈچۈن ئاساسلىق پايدىلىنىش مەنبەسىگە ئايلاندۇرۇشنى نىشان قىلىۋاتقانلىقىنى، بۇ ئارقىلىق دەلىللەنمىگەن دەۋالارنىڭ تارقىلىپ كېتىشىنىڭ ئالدىنى ئېلىش ۋە ئىشەنچىسىز ياكى يالغان ئۇچۇرلار ئارقىلىق ئېلىپ بېرىلىدىغان قايمۇقتۇرۇشلارنى چەكلەشنى مەقسەت قىلىدىغانلىقىنى بىلدۈردى.

دۇران يەنە بۇنىڭدىن مەقسەتنىڭ، مۇھىم تېمىلاردا دەلىللەنگەن ئۇچۇرلارغا بىۋاسىتە ئېرىشىش ئىقتىدارىنى كۈچەيتىش ۋە سۈنئىي ئەقىل مەنبەلىك خاتا ئۇچۇر خەۋپىنى ئازايتىش ئىكەنلىكىنى سۆزلىرىگە ئىلاۋە قىلدى.

تۈركىيەنىڭ تېخىمۇ كەڭ دائىرىلىك رەقەملىك ئىستراتېگىيە نىشانى

بۇ پىلان جۇمھۇر رەئىس ئەردوغاننىڭ رەھبەرلىكىدە تۈركىيەنى پەقەت تېخنولوگىيە ئىشلىتىدىغانلا ئەمەس، بەلكى تېخنولوگىيەنىڭ قانداق تەرەققىي قىلدۇرۇلىدىغانلىقىنى ۋە قانداق ئىشقا كىرىشتۈرۈلىدىغانلىقىنىمۇ شەكىللەندۈرىدىغان بىر دۆلەت سەۋىيەسىگە يەتكۈزۈش يۆنىلىشىدىكى تېخىمۇ كەڭ دائىرىلىك پىلاننىڭ نامايەندىسىدۇر.

دۇران ئەنقەرەنىڭ توغرىلىق ۋە ئىشەنچلىكلىك ئاساسىدا شەكىللەنگەن رەقەملىك ئىستراتېگىيەگە سادىق ئىكەنلىكىنى بىلدۈرۈپ، بۇنىڭ سۈنئىي ئەقىلنى باشقۇرۇش ۋە ئۇچۇر پۈتۈنلۈكىگە ئائىت خەلقئارالىق مۇنازىرىلەردە تېخىمۇ ئاكتىپ رول ئوينايدىغانلىقىدىن دېرەك بېرىدىغانلىقىنى ئېيتتى.