كىيېۋ، موسكۋا ۋە ۋاشىنگتون ۋەكىللىرى چارشەنبە كۈنى ئەبۇ دەبىدە ئۇچرىشىپ، رۇسىيە-ئۇكرائىنا ئۇرۇشىنى ئاخىرلاشتۇرۇشنى نىشان قىلغان ئىككى كۈنلۈك قىيىن سۆھبىتىنى باشلايدۇ؛ تەرەپلەرنىڭ ئىلگىرىكى دىپلوماتىك سۆھبەت مۇساپىلىرىدە، 2022-يىلى فېۋرالدا باشلىنىپ ھازىرغىچە داۋاملىشىۋاتقان ياۋروپانىڭ ئىككىنچى دۇنيا ئۇرۇشىدىن بۇيانقى ئەڭ قانلىق توقۇنۇشى بولغان بۇ ئۇرۇشنى ئاخىرلاشتۇرۇش توغرىسىدا بىرەر كېلىشىم ھاسىل قىلىنالمىغانىدى.
سۆھبەتكە تەييارلىق قىلىش جەريانىدا رۇسىيە تەرىپىدىن ئېلىپ بېرىلغان كەڭ كۆلەملىك ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرى قاتتىق سوغۇق كۈنلەرنى باشتىن كەچۈرۈۋاتقان ئۇكرائىنانىڭ نېگىزلىك ئېنېرگىيە تورلىرىغا ئېغىر زەربە بېرىپ، توك ۋە ئىسسىنىش سىستېمىلىرىنى كاردىن چىقاردى. بۇ ئەھۋال ئەرەب بىرلەشمە خەلىپىلىكى پايتەختىدىكى مۇمكىن بولغان ئىلگىرىلەشلەرگە توسالغۇ بولۇش خەۋپىنى تۇغدۇردى. ئۇكرائىنا پىرېزىدېنتى ۋولۇدىمىر زېلېنىسكىي سەيشەنبە كۈنى: «رۇسىيەنىڭ ھەر بىر ھۇجۇمى موسكۋانىڭ مەيدانىنىڭ ئۆزگەرمىگەنلىكىنى ئىسپاتلىماقتا؛ ئۇلار ئۇرۇشقا ۋە ئۇكرائىنانى ۋەيران قىلىشقا مەبلەغ سېلىشنى داۋاملاشتۇرۇۋاتىدۇ، دىپلوماتىيەگە ئەستايىدىل قارىمايۋاتىدۇ» دېدى.
نۆۋەتتىكى ئاساسلىق تۇيۇق يول ئۇكرائىنانىڭ شەرقىدىكى زېمىنلارنىڭ ئۇزۇن مۇددەتلىك تەقدىرىدۇر. موسكۋا ھەر قانداق كېلىشىمنىڭ ئالدىنقى شەرتى سۈپىتىدە، كىيېۋنىڭ مول تەبىئىي بايلىقلارغا ئىگە دونباسنىڭ كەڭ رايونلىرىدىن قوشۇنلىرىنى چېكىندۈرۈشىنى ۋە ئىگىلىۋالغان زېمىنلارنىڭ رۇسىيەگە تەۋە ئىكەنلىكىنىڭ خەلقئارادا ئېتىراپ قىلىنىشىنى تەلەپ قىلماقتا. كىيېۋ بولسا، توقۇنۇشنىڭ نۆۋەتتىكى فىرونتلارنى ئاساس قىلغان ھالدا توختىتىلىشى كېرەكلىكىنى ئىلگىرى سۈرۈپ، بىر تەرەپلىمە چېكىنىشنى رەت قىلماقتا.
ئۇكرائىنا ۋەكىللەر ئۆمىكىگە خەۋپسىزلىك كېڭىشىنىڭ باشلىقى رۇستەم ئۇمەروۋ باشچىلىق قىلىدۇ. رۇسىيەنىڭ باش سۆھبەتچىسى بولسا، ھەربىي ئىستىخبارات باشلىقى ئىگور كوستىيۇكوۋدۇر. ئۆتكەن ئايدىكى سۆھبەتتە ئامېرىكا ۋەكىللەر ئۆمىكىگە دونالد ترامپنىڭ ئەلچىسى ستېۋ ۋىتكوۋ باشچىلىق قىلغان ئىدى. قوشنىسىنىڭ تەخمىنەن %20 زېمىنىنى بېسىۋالغان رۇسىيە، ئەگەر سۆھبەت مەغلۇپ بولسا دونېتسىكى رايونىنىڭ قالغان قىسمىنىمۇ ئىگىلەيدىغانلىقى ئېيتىپ تەھدىت سالماقتا. ئۇكرائىنا بولسا، رۇسىيەنىڭ قايتا تاجاۋۇز قىلىشىنىڭ ئالدىنى ئالمايدىغان بىر كېلىشىمگە ئىمزا قويمايدىغانلىقىنى بىلدۈرمەكتە.
فىرانسىيە خەۋەر ئاگېنتلىقىنىڭ تەھلىلىگە ئاساسلانغاندا، رۇسىيەنىڭ نۆۋەتتىكى ئىلگىرىلەش سۈرئىتى بىلەن پۈتكۈل رايوننى ئىگىلىشى ئۈچۈن يەنە تەخمىنەن 18 ئاي ۋاقىت كېتىدىكەن. كىيېۋ نۆۋەتتە دونېتسىكى رايونىنىڭ تەخمىنەن بەشتىن بىرىنى كونترول قىلماقتا. ئەلرايى تەكشۈرۈش نەتىجىسىگە قارىغاندا، ئۇكرائىنا خەلقىنىڭ كۆپىنچىسى زېمىن بېرىش بەدىلىگە كېلىدىغان تىنچلىققا قارشى ئىكەن. كىيېۋ ئاھالىسىدىن پېترو ئىسىملىك بىر كىشى: «بۇلارنىڭ ھەممىسى خەلققە قارىتىلغان بىر ئويۇن. ئەڭ يامان ئەھۋالغا تەييارلىق قىلىپ، ئەڭ ياخشى نەتىجىدىن ئۈمىد كۈتۈشىمىز كېرەك» دېدى.
