بۇ چېگرا ھالقىغان ھۇجۇم ۋاشىنگتوننىڭ سۆھبەت چاقىرىقى ۋە جىددىيچىلىكنىڭ تېخىمۇ كۈچىيىپ كېتىشىگە قارشى ئاگاھلاندۇرۇشىغا پىسەنت قىلماستىن، ئىسرائىلىيەنىڭ سۈرىيەنىڭ جەنۇبىغا قارىتا ئايلاردىن بېرى داۋاملاستۇرىۋاتقان ھۇجۇم ھەرىكەتلىرىنىڭ ئەڭ يېڭى مىسالى بولدى.
ئىسرائىلىيە سەيشەنبە كۈنى سۈرىيەنىڭ جەنۇبىغا چېگرا ھالقىغان يېڭى بىر ھۇجۇم قىلىپ، ئامېرىكا پرېزىدېنتى دونالد ترامپنىڭ ئېغىر-بېسىقلىق چاقىرىقىغا پەرۋا قىلمىدى. قۇنەيترادىكى تاشلىۋېتىلگەن بىر ھەربىي پونكىتنى بومبا بىلەن ۋەيران قىلدى.
سۈرىيە دۆلەت تېلېۋىزىيەسى «ئەل ئىخبارىيە» ئىسرائىلىيەنىڭ ئىككى تانكىسى ۋە ئون ھەربىي ئاپتوموبىلىنىڭ قۇنەيترانىڭ جەنۇبىي يېزا رايونىدىكى سەمدانىيە شەرقىيە يېزىسىغا كىرىپ، تاشلىۋېتىلگەن بازىنى ۋەران قىلغانلىقىنى خەۋەر قىلدى.
ھۇجۇمغا مۇناسىۋەتلىك ئىسرائىلىيە ئارمىيەسى ياكى سۈرىيە ئەمەلدارلىرىدىن تېخىچە ھېچقانداق ئىنكاس كەلمىدى.
ترامپنىڭ ئاگاھلاندۇرۇشلىرىغا پىسەنت قىلماسلىق
بۇ ھۇجۇم ئوخشاشلا يېقىن ئەتراپتىكى ئىككى يېزىغا قىلىنغان ئىسرائىلىيە ھۇجۇمىدىن 24 سائەت ئۆتمەي يۈز بەردى. مۇشۇ ئايدىن بېرى ئىسرائىلىيەنىڭ سۈرىيەنىڭ جەنۇبىنى نىشان قىلغان ۋە ئادەتتىكى ئەھۋالغا ئايلىنىپ قالغان كۈندىلىك ھۇجۇملىرىنىڭ بىر قىسمى دەپ قارالماقتا.
دۈشەنبە كۈنى ترامپ تەمكىنلىككە چاقىرىپ: «ئىسرائىلىيەنىڭ سۈرىيە بىلەن كۈچلۈك ۋە ھەقىقىي سۆھبەت ئۆتكۈزۈشى ئىنتايىن مۇھىم ھەمدە سۈرىيەنىڭ پاراۋان بىر دۆلەتكە ئايلىنىشىغا توسقۇنلۇق قىلىدىغان ھېچقانداق ئىش بولماسلىقى كېرەك» دېدى.
ترامپ سۈرىيە دۆلەت رەئىسى ئەھمەد شەرانى تىنچلىق ئۈچۈن «تىرىشچانلىق كۆرسىتىۋاتىدۇ» دەپ ماختىدى ۋە بۇ پەيتنى «تارىخىي پۇرسەت» دەپ ئاتىدى.
سۈرىيە ھۆكۈمىتىنىڭ سانلىق مەلۇماتلىرىغا ئاساسلانغاندا، 2024-يىلى دېكابىردىن بۇيان ئىسرائىلىيەنىڭ جەنۇبىي ۋىلايەتلەرگە 1000 دىن ئارتۇق ھاۋا ھۇجۇمى ۋە 400 دىن ئارتۇق قۇرۇقلۇقتىن بېسىپ كىرىش ھەرىكىتى ئېلىپ بارغانلىقىنى مەلۇم.
ئۆتكەن يىلى بەشار ئەسەد ھاكىمىيىتىنىڭ يىقىلىشىدىن كېيىن، ئىسرائىلىيە يەنە ب د ت نىڭ نازارىتىدىكى بۇفېر رايوننى ئىگىلىۋالغان ھەمدە1974-يىلدىكى «كۈچلەرنى ئايرىش كېلىشىمى» گە خىلاپلىق قىلىپ، ئىشغال ئاستىدىكى گولان ئېگىزلىكىدە كونتروللۇقىنى كېڭەيتكەن ئىدى.
