ئىسرائىلىيەنىڭ ئىراندىكى يادرو مۇئەسسەسەلىرى، ھەربىي نۇقتىلار ۋە يۇقىرى دەرىجىلىك ئەمەلدارلارنىڭ ئۆيلىرىگە قاراتقان ھاۋا ھۇجۇملىرىدىن كېيىن، ئەرەب دۆلەتلىرى رايوندىكى جىددىيچىلىكنى پەسەيتىش ئۈچۈن دىپلوماتىك تىرىشچانلىقلىرىنى كۈچەيتتى. تېھران بۇ ھۇجۇملاردا ئونلارچە پۇقرانىڭ ھاياتىدىن ئايرىلغانلىقىنى جاكارلىدى.
سەئۇدى ئەرەبىستان، قاتار، مىسىر، ئىيوردانىيە، كۇۋەيت، ئىراق ۋە پەلەستىن جۈمە كۈنى ئىسرائىلىيەنىڭ ئىرانغا قاراتقان ھۇجۇملىرى ۋە تېھراننىڭ بۇنىڭغا قايتۇرغان جاۋابىدىن كېيىن، رايوندا كەڭ كۆلەملىك توقۇنۇش خەۋپىنىڭ ئوتتۇرىغا چىقىش ئېھتىماللىقىنىڭ يۇقىرى ئىكەنلىكى توغرىسىدا ئاگاھلاندۇردى. ئىراننىڭ قايتۇرما ھۇجۇملىرىدا بىر ئىسرائىلىيە پۇقراسى ھاياتىدىن ئايرىلدى، ئونلارچە كىشى يارىلاندى.
سەئۇدى ئەرەبىستان تەخت ۋارىسى شاھزادە مۇھەممەد بىن سەلمان ئامېرىكا پىرېزىدېنتى دونالد ترامپ بىلەن تېلېفوندا كۆرۈشۈپ، بۇ ئۆزگىرىشلەر ھەققىدە مۇزاكىرە ئېلىپ باردى. سەئۇدى ئەرەبىستان تاشقى ئىشلار ۋەزىرى فەيسەل بىن فەرھانمۇ ئىران تاشقى ئىشلار مىنىستىرى بىلەن تېلېفونلاشتى، ھەمدە ئىسرائىلىيەنىڭ ھۇجۇملىرىنى رايون دىپلوماتىيەسىگە زىيان يەتكۈزىدىغان بىر قەدەم دەپ ئاتىدى.
قاتار تاشقى ئىشلار مىنىستىرى شەيخ مۇھەممەد بىن ئابدۇرراھمان بىن جاسىم ئالسانى بۇ ئۆزگىرىشلەردىن «قاتتىق ئەندىشە» قىلىۋاتقانلىقىنى بىلدۈرۈپ، جىددىيچىلىكنىڭ تېخىمۇ ئەۋج ئېلىپ كېتىشىنىڭ ئالدىنى ئېلىش ئۈچۈن ئىتتىپاقداشلىرى بىلەن بىرلىكتە خىزمەت ئىشلەيدىغانلىقىنى تەكىتلىدى.
ئەرەب بىرلەشمە خەلىپىلىكى، ئومان، مىسىر، ئىيوردانىيە، كۇۋەيت ۋە ئىراقمۇ ئوخشاش ئاگاھلاندۇرۇشلارنى بېرىپ، بارلىق تەرەپلەرنى باشقىلارنىڭ ئىگىلىك ھوقۇقىغا ھۆرمەت قىلىشقا ۋە كىرىزىس ئۈچۈن دىپلوماتىك ھەل قىلىش چارىلىرىنى ئىزدەشكە چاقىردى.
ئىيوردانىيە تاشقى ئىشلار ۋەزىرى ئەيمەن ئەسسافەدى دۆلىتىنىڭ ھاۋا بوشلۇقىنىڭ دەپسەندە قىلىنىشىغا يول قويمايدىغانلىقىنى بىلدۈردى.
ئىراق ئىسرائىلىيەنىڭ ھۇجۇملاردا ئىراقنىڭ ھاۋا بوشلۇقىنى ئىشلەتكەنلىكى سەۋەبىدىن، بىرلەشكەن دۆلەتلەر تەشكىلاتى خەۋپسىزلىك كېڭىشىگە ئىسرائىلىيە ئۈستىدىن ئەرز سۇنۇپ، ئىسرائىلىيەدىن ھېساب ئېلىنىشىنى تەلەپ قىلدى.
پەلەستىن دائىرىلىرىمۇ توقۇنۇشلارنىڭ تېخىمۇ كەڭ كۆلەملىك ئۇرۇشقا ئايلىنىپ كېتىشىنىڭ ئالدىنى ئېلىش ئۈچۈن رايونلۇق ھەمكارلىق چاقىرىقى قىلدى.
ئىسرائىلىيە جۈمە كۈنى ئەتىگەن تەرەپلەردە ئىرانغا ھۇجۇم قىلىشقا باشلىدى، ئىراننىڭ يادرو مۇئەسسەسەلىرى، ھەربىي ۋە پۇقرالار ئولتۇراق رايونلىرىنى ھۇجۇم نىشانى قىلدى. بۇ ھۇجۇملاردا ئىراننىڭ يۇقىرى دەرىجىلىك ھەربىي قوماندانلىرى ۋە ئالىملىرى ھاياتىدىن ئايرىلدى. جۈمە كۈنى كېچىگىچە داۋاملاشقان ھۇجۇملاردا تېھران، ناتانز، تەبرىز ۋە ئىسفاھان قاتارلىق شەھەرلەر نىشان قىلىندى.
ئىران كېيىن «سادىق ۋەدە-3» ناملىق ئىنتىقام ئېلىش ھۇجۇمى قوزغىدى، جۈمە كېچىسى تېل ئاۋىۋ قاتارلىق نۇرغۇن رايونلارنى ھۇجۇم نىشانى قىلدى. ئىران ئىسرائىلىيە ئارمىيەسى مەركىزىي قوماندانلىق ئىشتابى بىلەن مۇداپىئە مىنىستىرلىقى جايلاشقان، ئادەتتە ئىسرائىلىيەنىڭ «پېنتاگون» ى دەپ ئاتىلىدىغان كىريا رايونىغىمۇ باشقۇرۇلىدىغان بومبىلار بىلەن ھۇجۇم قىلدى.
