ئىران: «پاكىستاننىڭ ئوتتۇرا شەرق تىنچلىق سۆھبىتىدىكى رولى «ھالقىلىق باسقۇچقا يېقىنلاشتى»
ئىراننىڭ باش ئەلچىسى رېزا ئامىرى مۇقەددەم پاكىستاننىڭ تىرىشچانلىقلىرىنى «ئىجابىي، ئۈنۈملۈك تەشەببۇسلار» دەپ سۈپەتلىدى.
ئىراننىڭ ئىسلام ئابادتىكى باش ئەلچىسى سەيشەنبە كۈنى پاكىستاننىڭ ئوتتۇرا شەرقتىكى ئۇرۇشنى ئاخىرلاشتۇرۇش ئۈچۈن ئامېرىكا بىلەن ئېلىپ بېرىلغان سۆھبەتلەردە ۋاسىتىچى بولۇشىنىڭ «ھالقىلىق ۋە سەزگۈر بىر باسقۇچقا يېقىنلاشقانلىقىنى» ئىپادىلىدى.
پاكىستاننىڭ تىرىشچانلىقلىرىنى «ئىجابىي ۋە ئۈنۈملۈك» دەپ سۈپەتلىگەن رېزا ئامىرى مۇقەددەم، X تە ھەمبەھىرلىگەن ئۇچۇرىدا، «دىققىتىڭلار بىزدە بولسۇن» دېگەن سۆزلەرنى ئىشلەتتى.
ئىران ۋاقىتلىق ئۇرۇش توختىتىشنى رەت قىلىپ، ئۇنىڭ ئورنىغا مەڭگۈلۈك ھەل قىلىش چارىسى تەلەپ قىلغان بولۇپ، دۈشەنبە كۈنى ئۇرۇشنى ئاخىرلاشتۇرۇشقا ئالاقىدار مەيدانىنى ئوتتۇرىغا قويغان ۋە بىر تەكلىپ يوللىغاندىن كېيىن بۇ بايانات ئېلان قىلىندى.
ئىران ئىككى ھەپتىلىك يۇقىرى دەرىجىلىك سۆھبەتلەردىن كېيىن، ئامېرىكانىڭ تەكلىپىگە قارىتا جاۋابىنى پاكىستان ئارقىلىق يەتكۈزدى.
ئارقىدىن ئامېرىكا جۇمھۇر رەئىسى دونالد ترامپ ئىراننىڭ جاۋابىنى «مۇھىم بىر قەدەم» دەپ سۈپەتلىگەن بولسىمۇ، يەنىلا يېتەرلىك ئەمەسلىكىنى ئېيتتى. ئۇ ئاقسارايدا مۇخبىرلارغا بەرگەن باياناتىدا: «يېتەرلىك دەرىجىدە ياخشى ئەمەس، ئەمما ئىنتايىن مۇھىم بىر قەدەم» دېگەن سۆزلەرنى ئىشلەتتى.