ئامېرىكا دائىرىلىرىنىڭ بىلدۈرۈشىچە، ئىسرائىلىيەگە ئەۋەتىلىدىغان ئەسكەرلەر ئورتاق كونترول مەركىزى قۇرىدىغان بولۇپ، غەززەدە ۋەزىپە ئۆتەيدىغان باشقا خەۋپسىزلىك كۈچلىرىنى ئىسرائىلىيە ئارمىيەسى بىلەن ماسلاشتۇرۇپ، توقۇنۇش يۈز بېرىشىنىڭ ئالدىنى ئالىدىكەن.

ئامېرىكانىڭ يۇقىرى دەرىجىلىك ئىككى ئەمەلدارى ۋاشىنگتوننىڭ غەززەنىڭ مۇقىملىقى ئۈچۈن قۇرۇلغان ئورتاق ۋەزىپە گۇرۇپپىسى دائىرىسىدە 200 ئەسكەر ئورۇنلاشتۇرىدىغانلىقىنى، لېكىن غەززەدە ھېچقانداق ئامېرىكا ئەسكىرىنىڭ بولمايدىغانلىقىنى ئېلان قىلدى.

ئىسمىنى ئاشكارىلاشنى خالىمىغان بۇ ئىككى ئەمەلدار پەيشەنبە كۈنى مۇخبىرلارنى كۈتۈۋېلىش يىغىنىدا بەرگەن باياناتىدا، بۇ 200 ئەسكەرنىڭ ۋەزىپە ئۆتەش قىسمىلىرىنىڭ يادرولۇق ئەترىتى ئىكەنلىكىنى، بۇ ئەترەتنىڭ مىسىر، قاتار، تۈركىيە ۋە ئەرەب بىرلەشمە خەلىپىلىكىدىن كەلگەن ۋەكىللەرنىمۇ ئۆز ئىچىگە ئالىدىغانلىقىنى بىلدۈردى. شۇنداقلا ئامېرىكا ئەسكەرلىرىنىڭ ئورۇنلاشتۇرۇلىدىغان ئورنىنىڭ تېخى بېكىتىلمىگەنلىكىنى، لېكىن ئورتاق كونترول مەركىزىنىڭ قۇرۇلىدىغانلىقىنى ۋە توقۇنۇشنىڭ ئالدىنى ئېلىش ئۈچۈن، غەززەدە ۋەزىپە ئۆتەيدىغان باشقا خەۋپسىزلىك كۈچلىرىنىڭ ئىسرائىلىيە ئارمىيەسى بىلەن ماسلىشىپ خىزمەت ئىشلەيدىغانلىقىنى، ھېچقانداق ئامېرىكا ئەسكىرىنىڭ غەززەگە كىرىشىنىڭ پىلانلانمىغانلىقىنى ئەسكەرتتى.

ئامېرىكا دائىرىلىرى كېلىشىم كۈچكە ئىگە بولغاندىن كېيىن، رايوندىكى جىددىيچىلىكنىڭ پەسەيتىلىشى ۋە ئىسرائىلىيە بىلەن ئەرەب دۆلەتلىرى ئوتتۇرىسىدا يېڭى نورماللىشىش كېلىشىملىرىنىڭ يولغا قويۇلىشىدىن ئۈمىد بارلىقىنى تەكىتلىدى.

 ئامېرىكا پىرېزىدېنتى دونالد ترامپنىڭ بىرىنچى نۆۋەتلىك ۋەزىپە ئۆتەش مەزگىلىدە ئىسرائىلىيە بىلەن بەھرەين، ئەرەب بىرلەشمە خەلىپىلىكى، ماراكەش ۋە سۇدان ئوتتۇرىسىدا ئىبراھىم كېلىشىمى ئىمزالانغان ئىدى.