ناتو باش كاتىپى پەيشەنبە كۈنى تۈركىيەنىڭ ئۇكرائىنا-رۇسىيە تىنچلىق سۆھبەتلىرىدىكى ئۆزگىچە دىپلوماتىك رولىغا يۇقىرى باھا بەردى ھەمدە ئىتتىپاق ئىچىدىكى داۋاملىشىۋاتقان ئىختىلاپلارنى تۈگىتىپ، بىرلىك ئورنىتىشقا چاقىردى.
باش كاتىپ مارك رۇتتې، ئىتتىپاقنىڭ ئانتاليانىڭ جەنۇبىدا ئۆتكۈزۈلگەن تاشقى ئىشلار مىنىستىرلىرى يىغىنىنىڭ ئىككىنچى كۈنىدە مۇخبىرلارغا بايانات بېرىپ، «تۈركىيە بۇ يەردە زور رول ئويناۋاتىدۇ، چۈنكى تۈركىيە ئالاقىدار بارلىق تەرەپلەر بىلەن ياخشى مۇناسىۋەتكە ئىگە ھەمدە جىددىي بىر ئۇچرىشىش مەركىزى سۈپىتىدە قارىلىۋاتىدۇ» دېدى.
ئۇكرائىنا تەييار ئىكەنلىكىنى بىلدۈرگەن بولسىمۇ، رۇتتې، تۈركىيەنىڭ ھەر ئىككى تەرەپنى بىر يەرگە كەلتۈرۈش كۈچى ۋە ئىشەنچلىكلىكىنىڭ كەلگۈسىدىكى ھەرقانداق سۆھبەتتە مەركىزىي رول ئوينايدىغانلىقىنى تەكىتلىدى.
«بۇ سۆھبەتلەرنى ياخشى نەتىجىگە ئېرىشتۈرۈشكە ياردەم بېرىدىغان كىشىلىرىڭىز بار؛ تاشقى ئىشلار مىنىستىرىڭىز، جۇمھۇر رەئىسىڭىزگە ئوخشاش» دېدى.
ئانتاليادىكى تاشقى ئىشلار مىنىستىرلىرى يىغىنىدا ئۇكرائىنا، قورال-ياراغ ھەمكارلىقى ۋە سانائەت ئىقتىدارىنىڭ كۈنتەرتىپنىڭ ئالدىنقى قاتارىدىن ئورۇن ئېلىشى كۈتۈلمەكتە.
شۇنىڭ بىلەن بىر ۋاقىتتا، ئامېرىكا تاشقى ئىشلار مىنىستىرى ماركو رۇبىيو پەيشەنبە كۈنى پىرېزىدېنت دونالد ترامپنىڭ رۇسىيە بىلەن ئۇكرائىنا ئوتتۇرىسىدىكى ئۇرۇشتا ئادىل تىنچلىق بىلەن نەتىجىلىنىدىغان ھەر قانداق بىر مېخانىزمغا ئوچۇق ئىكەنلىكىنى ئېيتتى.
رۇبىيو تۈركىيەدىكى غەيرىي رەسمىي تاشقى ئىشلار مىنىستىرلىرى يىغىنىدىن ئىلگىرىكى بايانات بېرىپ، ئامېرىكا قوشما ئىشتاتلىرىنىڭ يېقىنقى بىر نەچچە كۈن ئىچىدە ئىلگىرىلەشلەرنى كۆرۈشنى خالايدىغانلىقىنى بىلدۈرۈپ، توقۇنۇشنىڭ ھەربىي چارىسى يوقلۇقىنى قەيت قىلدى.
