تۈركىيە جۇمھۇرىيىتى تاشقى ئىشلار مىنىستىرلىقى بايانات ئېلان قىلىپ، غەززەدىكى ئۇرۇش توختىتىشنى قىزغىن قارشى ئالىدىغانلىقىنى بىلدۈرۈپ، مۇرەسسەچىلەرگە مىننەتدارلىق بىلدۈردى ھەمدە ئىككى دۆلەتلىك ھەل قىلىش يولى ئارقىلىق غەززەنى قايتا قۇرۇش ۋە ئۇزۇن مۇددەتلىك تىنچلىق ئورنىتىشنىڭ مۇھىملىقىنى تەكىتلىدى.
تاشقى ئىشلار مىنىستىرلىقى پەيشەنبە كۈنى ئېلان قىلغان باياناتىدا، غەززەدە ئۇرۇش توختىتىشنى قىزغىن قارشى ئالىدىغانلىقىنى ۋە بۇنىڭ «ئالدىنقى ئىككى يىلدىن بۇيان داۋاملىشىۋاتقان ئىرقىي قىرغىنچىلىققا خاتىمە بېرىشىنى ئۈمىد قىلىدىغانلىقىنى» بىلدۈردى.
مىنىستىرلىقنىڭ باياناتىدا، تۈركىيەنىڭ ئۇرۇش توختىتىش كېلىشىمىنىڭ تولۇق ئەمەلگە ئاشۇرۇلۇشىنى كۈتىدىغانلىقى تەكىتلىنىپ مۇنداق دېيىلدى:
«ئۇرۇش توختىتىش كاپالەتكە ئىگە قىلىنغاندىن كېيىن، ئىنسانىي تىراگېدىيە يۈز بەرگەن غەززەگە جىددىي ئىنسانىي ياردەم يەتكۈزۈش ۋە غەززەنى قايتا قۇرۇش خىزمەتلىرىنى دەرھال باشلاش ناھايىتى زور ئەھمىيەتكە ئىگە. تۈركىيە كەلگۈسىدە غەززەگە كۆپ مىقداردا ئىنسانىي ياردەم بېرىشنى ئۈزلۈكسىز داۋاملاشتۇرىدۇ.»
باياناتتا، پەقەت ئىسرائىلىيە – پەلەستىن مەسىلىسى ئادىل ھەل قىلىنغاندىلا ئاندىن ئوتتۇرا شەرقتە ئۇزۇن مۇددەتلىك تىنچلىق ئورناتقىلى بولىدىغانلىقى تەكىتلىنىپ مۇنداق دېيىلدى:
«ئۇرۇش توختىتىش سۆھبەتلىرىدە قولغا كەلگەن مۇۋەپپەقىيەتنىڭ كەلگۈسىدە ئىككى دۆلەتلىك ھەل قىلىش چارىسىنى ئەمەلگە ئاشۇرۇشقا تۆھپە قوشۇشىنى ئۈمىد قىلىمىز.
قاتار، مىسىر ۋە ئامېرىكانىڭ ئۇرۇش توختىتىش سۆھبەتلىرىدىكى تىرىشچانلىقلىرىنى قىزغىن قارشى ئالىمىز. تۈركىيە ئۇرۇش توختىتىش كېلىشىمىنى ئەمەلگە ئاشۇرۇش باسقۇچلىرىدا ئاكتىپ تۆھپە قوشۇش ۋە قوللاش ئىرادىسىنىڭ مۇھىملىقىنى يەنە بىر قېتىم تەكىتلەيدۇ.»
ترامپنىڭ ئۇرۇش توختىتىش پىلانى
ئامېرىكا پىرېزىدېنتى دونالد ترامپ ئىسرائىلىيە بىلەن ھاماسنىڭ ئامېرىكا تەرىپىدىن تەۋسىيە قىلىنغان غەززە كېلىشىمىنىڭ بىرىنچى باسقۇچىنى قوبۇل قىلغانلىقىنى ئېلان قىلدى.
29 – سېنتەبىر تۇنجى قېتىم ئېلان قىلىنغان 20 ماددىلىق پىلان، پەلەستىنلىك مەھبۇسلارنىڭ بەدىلىگە بارلىق ئىسرائىلىيەلىك ئەسىرلەرنى ئازاد قىلىش، ئۇرۇش توختىتىش، ھاماسنى قورالسىزلاندۇرۇش ۋە غەززەنى قايتا قۇرۇشنى ئۆز ئىچىگە ئالىدۇ.
ئىسرائىلىيەنىڭ غەززەدە 2023 – يىلى ئۆكتەبىردىن بۇيان داۋاملاشتۇرۇۋاتقان ھۇجۇملىرىدا كۆپىنچىسى ئاياللار ۋە بالىلاردىن تەشكىل تاپقان تەخمىنەن 67 مىڭ 200 پەلەستىنلىك ھاياتىدىن ئايرىلدى.
ئۈزلۈكسىز داۋاملاشقان بومباردىمانلار غەززەنى ياشاش مۇمكىن بولمايدىغان ھالەتكە كەلتۈرۈپ، كەڭ كۆلەملىك ئاچارچىلىق ۋە كېسەللىكلەرنى كەلتۈرۈپ چىقاردى.
