پەيشەنبە كۈنى ئەتىگەندە، ئامېرىكا پىرېزىدېنتى دونالد ترامپ ئوتتاۋانىڭ پەلەستىننىڭ دۆلەت بولۇشىنى قوللايدىغانلىقىنى جاكارلىشىدىن كېيىن، كانادانى سودا كېلىشىمى تۈزۈشنىڭ «ئىنتايىن قىيىن» بولىدىغانلىقى ھەققىدە ئاگاھلاندۇردى.
ترامپ «Truth Social» دا مۇنداق يازدى: «ۋاھ! كانادا پەلەستىننىڭ دۆلەت بولۇشىنى قوللايدىغانلىقىنى يېڭى جاكارلاپتۇ. بۇ بىزنىڭ ئۇلار بىلەن سودا كېلىشىمى تۈزۈشىمىزنى ئىنتايىن قىيىنلاشتۇرۇۋېتىدۇ. ھەي، كانادا! ھەي!!»
ترامپنىڭ بۇ سۆزلىرى كانادا باش مىنىستىرى مارك كارنىينىڭ چارشەنبە كۈنى غەززەدىكى «چىدىغۇسىز» ئىنسانپەرۋەرلىك كرىزىسىغا قارىتا، دۆلىتىنىڭ سېنتەبىردە پەلەستىننى بىر دۆلەت دەپ ئېتىراپ قىلىدىغانلىقىنى ئېلان قىلىشىدىن كېيىن ئوتتۇرىغا چىقتى.
كارنىي ئوتتاۋادا تور ئارقىلىق كابىنېت يىغىنىغا رىياسەتچىلىك قىلغاندىن كېيىن ئۆتكۈزۈلگەن مۇخبىرلارنى كۈتۈۋېلىش يىغىنىدا: «كانادا 2025-يىلى سېنتەبىردە ئۆتكۈزۈلىدىغان ب د ت ئومۇمىي كېڭىشىنىڭ 80-نۆۋەتلىك يىغىنىدا پەلەستىن دۆلىتىنى ئېتىراپ قىلىشنى پىلانلاۋاتىدۇ» دېدى.
