ئامېرىكا سەھىيە ۋە ئىنسانىي مۇلازىمەت ئىشلىرى مىنىستىرلىقى خانتا ۋىرۇسى كۆرۈلگەن يولۇچىلار پاراخوتىدىن دۆلىتىگە قايتۇرۇپ كېلىنگەن 17 ئامېرىكا پۇقراسىدىن بىرىنىڭ ۋىرۇس تەكشۈرۈش نەتىجىسىنىڭ مۇسبەت چىققانلىقىنى ئېلان قىلدى.
مىنىستىرلىقنىڭ يەكشەنبە كۈنى ئېلان قىلىنغان باياناتىدا مۇنداق دېيىلدى:
«بىر يولۇچىدا يېنىك دەرىجىدىكى ئالامەتلەر كۆرۈلدى، يەنە بىر يولۇچىنىڭ PCR تەكشۈرۈشىدە ئاندېس ۋىرۇسى تۆۋەن سەۋىيەدە مۇسبەت چىقتى.»
باياناتتا، ھەر ئىككى يولۇچىنىڭ «ئېھتىيات يۈزىسىدىن» ئۆزلىرىنى دۆلىتىگە توشۇغان ئايروپىلاننىڭ بىيولوگىيەلىك مۇداپىئە بۆلۈملىرىدە سەپەر قىلغانلىقى بىلدۈرۈلدى.
پاراخوت توختىغان ئىسپانىيەنىڭ كانارىيە ئاراللىرىدىن تارقاقلاشتۇرۇلغان ئامېرىكا پۇقرالىرى نېبراسكا ئىشتاتىدىكى مەخسۇس بىر مەركەزگە ئورۇنلاشتۇرۇلىدۇ. يېنىك يۇقۇم ئالامەتلىرى كۆرۈلگەن كىشى بولسا باشقا بىر مەركەزگە ئورۇنلاشتۇرۇلىدۇ.
ئۇلار مەنزىلگە يېتىپ بارغاندا كلىنىكىلىق تەكشۈرۈشتىن ئۆتكۈزۈلىدۇ، ئەھۋالىغا قاراپ مۇناسىپ كۈتۈنۈش ۋە ياردەمگە ئېرىشىدۇ.
«خۇندىئوس ‹MV Hondius›» ناملىق پاراخوتتا ساياھەت قىلىۋاتقان ئۈچ يولۇچى ھاياتىدىن ئايرىلغان، نۇرغۇن كىشى ئادەتتە غاجىغۇچىلار ئارىسىدا تارقىلىدىغان بۇ ئاز ئۇچرايدىغان كېسەللىككە گىرىپتار بولغان ئىدى.
خانتا ۋىرۇسى ئادەتتە يۇقۇملانغان غاجىغۇچىلار ئارقىلىق يۇقىدۇ، ئەمما بۇ قېتىمقى يۇقۇمنى كەلتۈرۈپ چىقارغان تۈرى ئىنسانلار ئارىسىدىمۇ تارقىلىشى مۇمكىن.
بۇنىڭدىن ئىلگىرى، «خۇندىئوس ‹MV Hondius›» ناملىق يولۇچىلار پاراخوتىدىن تارقاقلاشتۇرۇلغان بىر فىرانسىيە پۇقراسىدا دۆلىتىگە قايتىۋاتقاندا ئايروپىلاندا خانتا ۋىرۇسى ئالامەتلىرى كۆرۈلگەن ئىدى.
ئىسپانىيە دائىرىلىرى يۇقۇملانغان غاجىغۇچىلارنىڭ دېڭىز ساھىلىغا يېتىپ كېلىش ئېھتىماللىقىغا بولغان ئەندىشىلەرنى رەت قىلىپ، ئاند تاغلىرىدىكى بىر غاجىغۇچى ھايۋاننىڭ قىرغاققا ئۈزۈپ يېتىپ كېلىش ئېھتىماللىقىنىڭ «نۆل» ئىكەنلىكىنى بىلدۈردى.
