رۇسىيە پىرېزىدېنتى ولادىمىر پۇتىن ئۇكرائىنانىڭ ئېلىپ بېرىۋاتقان ھۇجۇملىرىنىڭ دۆلەت ئىقتىسادىغا زىيان سېلىۋاتقانلىقىنى، بىراق رۇسىيەنىڭ بۇ ھۇجۇملارنىڭ تەسىرىنى «تېز سۈرئەتتە تۈگىتىۋاتقانلىقىنى» بىلدۈردى.
پۇتىن جۈمە كۈنى رۇسىيە-ئۇكرائىنا ئۇرۇشىغا قاتنىشىۋاتقان ئەسكەرلەر بىلەن ئۆتكۈزگەن ئۇچرىشىشىدا: «ئەلۋەتتە بىزگە مەلۇم مىقداردا زىيان يەتكۈزۈۋاتىدۇ، بىراق بىز تېزلا ئۆزىمىزنى ئەسلىگە كەلتۈرۈۋاتىمىز. ئۇلار بىزگە ئېغىر مەسىلىلەرنى تۇغدۇرۇپ بېرەلمەيدۇ» دېدى.
موسكۋانىڭ ئۇكرائىنادىكى ئۇرۇش ئۈچۈن قوللىنىۋاتقان «ئالاھىدە ھەربىي مەشغۇلات» رايونىدىكى رۇسىيە ئەسكەرلىرىنىڭ ئومۇمىي سانىنىڭ 700 مىڭدىن ئاشقانلىقىنى تىلغا ئالغان پۇتىن، رۇسىيەنىڭ غەربكە قارشى «ئاساسەن دېگۈدەك يەككە-يالغۇز كۈرەش قىلىۋاتقانلىقىنى» ئېيتتى.
رۇسىيە كۈچلىرىنىڭ ئۇكرائىنادا «ئۆزلىرى ئارزۇ قىلغاندەك تېز سۈرئەتتە» ئالغا ئىلگىرىلىيەلمەيۋاتقانلىقىنى ئېتىراپ قىلغان پۇتىن، قىسىملارنىڭ ھەر كۈنى قەدەممۇ- قەدەم ئىلگىرىلەشنى ئۈزلۈكسىز داۋاملاشتۇرۇۋاتقانلىقىنى ئېيتتى.
پۇتىن: «تۇپراقلىرىمىزنى ئاستا-ئاستا ئۆز كونتروللۇقىمىز ئاستىغا ئېلىۋاتىمىز. بۇنى جەزمەن قولغا كەلتۈرىمىز، بۇنىڭدىن ھېچكىمنىڭ زەررىچە گۇمانى بولمىسۇن» دېدى.
رۇسىيەنىڭ، ئۇكرائىنانىڭ «ئاممىۋىي ئەسلىھەلەرگە ھۇجۇم قىلىشىنىڭ ئالدىنى ئېلىش» غايىسى بىلەن قايتۇرما ھۇجۇملارنىڭ شىددىتىنى باسقۇچلۇق تۈستە كۈچەيتىدىغانلىقىنى بىلدۈردى.
پۇتىن «ئۇكرائىنا ئۇرۇشىنى ناتو باشلىدى» دېگەن يۆنىلىشتىكى ئەيىبلەشلىرىنى يەنە بىر قېتىم تەكرارلىدى ۋە ناتوغا ئەزا دۆلەتلەرنىڭ تېخنىكىلىق ۋە ئىلمىي تەرەققىيات سەۋىيەسىگە يۇقىرى باھا بېرىپ، بۇ دۆلەتلەرنى «ھەددىدىن زىيادە تەرەققىي قىلغان ئىقتىسادىي گەۋدىلەر» دەپ سۈپەتلىدى.
