رويتېرس خەۋەر ئاگېنتلىقىنىڭ ئىككى نەپەر ئىراقلىق ئەمەلدارغا تايىنىپ بەرگەن خەۋىرىگە ئاساسلانغاندا، ئىراقنىڭ ئاساسلىق شىئە مۇسۇلمان سىياسىي گۇرۇھلىرىنىڭ رەھبەرلىرى، رەسمىي بايانات ئېلان قىلىنمىغان بولسىمۇ، بىر قېتىملىق يىغىندا ھۆكۈمەت ئەمەلدارى باسم ئەلبەدرىنى باش مىنىستىرلىق ۋەزىپىسىگە نامزات قىلىپ تاللىغان.
ماسلاشتۇرۇش رامكىسىنى (Coordination Framework) تەشكىل قىلغان 12 مۇھىم رەھبەرنىڭ دۈشەنبە كۈنى ئۆتكۈزگەن يىغىنىدىن خەۋەردار بولغان باشقا ئىككى نەپەر ئىراقلىق بولسا، بەدرىنىڭ نامزاتلىققا تاللانغانلىقى ھەققىدىكى دەۋاغا قارشى چىقىپ، مۇنازىرىلەرنىڭ داۋاملىشىۋاتقانلىقىنى بىلدۈردى. ئىراق دۆلەت تاراتقۇلىرى چارشەنبە كۈنى يەنە بىر قېتىملىق يىغىننىڭ پىلانلانغانلىقىنى خەۋەر قىلدى.
تاللىنىدىغان شەخس ماسلاشتۇرۇش رامكىسىنىڭ ئىلگىرىكى تاللىشى بولغان، تەجرىبىلىك سىياسەتچى ۋە ئىككى نۆۋەت باش مىنىستىرلىق ۋەزىپىسىنى ئۆتىگەن نۇرى ئەلمالىكىنىڭ ئورنىنى ئالىدۇ. مەزكۇر ئىتتىپاق باش مىنىستىرنى تاللاش ۋە ھۆكۈمەتنى تەشكىللەشتە مەركىزىي رول ئوينايدۇ. ئەلبەدرى نۆۋەتتە ئەدلىيە كومىتېتىنىڭ باشلىقلىق ۋەزىپىسىنى ئۆتىمەكتە.
