ئىسرائىلىيە ئارمىيەسى غەززەنىڭ شىمالىدا ئىككى پەلەستىنلىكنى ئۆلتۈرگەنلىكىنى ئېتىراپ قىلدى. شۇنىڭ بىلەن، ئىسرائىلىيە 10-ئۆكتەبىردە كۈچكە ئىگە بولغان ئۇرۇش توختىتىش كېلىشىمىنى يەنە بىر قېتىم دەپسەندە قىلغان بولدى.

ئىسرائىلىيە ئارمىيەسى دۈشەنبە كۈنى ئېلان قىلغان باياناتىدا، ئەسكەرلەرنىڭ ئىككى ئايرىم ۋەقەدە «تەھدىت پەيدا قىلغان» لىقىنى ئىلگىرى سۈرۈپ، ئىككى پەلەستىنلىكنى ئېتىپ ئۆلتۈرگەنلىكىنى بىلدۈردى.

ئىسرائىلىيە ئارمىيەسى ئۇرۇش توختىتىشنىڭ داۋاملىشىۋاتقانلىقىغا قارىماي، قورال كۈچى ئىشلىتىشىنى كۆپىنچە ئەنە شۇنداق سەۋەبلەر بىلەن ئاقلايدۇ.

دۈشەنبە كۈنى ئەتىگەندە سەھىيە مەنبەلىرى غەززە شەھىرىنىڭ زەيتۇن مەھەللىسىنىڭ شەرقىدە بىر پەلەستىنلىكنىڭ ئۇچقۇچىسىز ھاۋا ئاپپاراتى ھۇجۇمى بىلەن ئۆلتۈرۈلگەنلىكىنى ئانادولۇ ئاگېنتلىقىغا بىلدۈرگەن ئىدى.

ھۇجۇم نىشانى قىلىنغان نۇقتىنىڭ ئۇرۇش توختىتىش شەرتلىرى دائىرىسىدە ئىسرائىلىيە كۈچلىرى چېكىنگەن رايوننىڭ سىرتىدا ئىكەنلىكى بايان قىلىندى.

غەززە ھۆكۈمىتى ئاخبارات ۋاسىتىلىرى ئىشلىرى ئىشخانىسى ئۇرۇش توختىتىش باشلانغاندىن بۇيان ئىسرائىلىيەنىڭ كەم دېگەندە 342 پەلەستىنلىكنى ئۆلتۈرگەنلىكىنى، تەخمىنەن 900 كىشىنى يارىلاندۇرغانلىقىنى جاكارلىدى.

باياناتتا، داۋاملىشىۋاتقان ھۇجۇملارنىڭ ئىسرائىلىيەنىڭ كېلىشىمگە ئەمەل قىلمىغانلىقىنىڭ ئوچۇق-ئاشكارا ئىسپاتى ئىكەنلىكى بىلدۈرۈلدى.

2023 - يىلى ئۆكتەبىردىن بۇيان ئىسرائىلىيە قورشاۋ ئاستىدىكى غەززەدە كۆپىنچىسى ئاياللار ۋە بالىلاردىن تەشكىل تاپقان 70 مىڭدىن ئارتۇق پەلەستىنلىكنى ئۆلتۈردى.

ئۇدا ئىككى يىل داۋاملاشقان ھۇجۇملار رايوننى خارابىلىككە ئايلاندۇرۇۋەتتى؛ ئۆيلەرنى، ئاممىۋى ئۇل ئەسلىھەلەرنى ۋە كەڭ پۇقرالار رايونلىرىنى يەر بىلەن يەكسان قىلىۋەتتى ھەم نۇپۇسنىڭ ھالقىلىق قىسمىنى ئۆي-ماكانلىرىدىن ئايىرىۋەتتى.