قازاقىستان ئېنېرگىيە مىنىستىرى يېرلان ئاككېنجېنوۋ مۇخبىرلارنى كۈتۈۋېلىش يىغىنىدا بايانات ئېلان قىلدى. مىنىستىر ئاككېنجېنوۋ رۇسىيە نېفىتىنى «كوندېنسات» (Kondensat) نېفىت ئەسلىھەسىدە پىششىقلاپ ئىشلەش مەسىلىسىدە ئىككى دۆلەت ئوتتۇرىسىدا بىردەكلىك ھاسىل قىلىنغانلىقىنى ئۇقتۇردى.
ئاككېنجېنوۋ پىششىقلاپ ئىشلەنگەن نېفىتتىن ئېرىشىلىدىغان نېفىت مەھسۇلاتلىرىنىڭ تەخمىنەن % 30 ىنىڭ قازاقىستان ئىچكى بازىرىدا ئېلىپ قېلىنىدىغانلىقىنى، قالغان قىسمىنىڭ بولسا رۇسىيەگە ئەۋەتىلىدىغانلىقىنى بىلدۈردى.
رۇسىيە نېفىتىنىڭ زاۋۇتقا تۆمۈر يول ئارقىلىق توشۇلىدىغانلىقىنى تىلغا ئالغان ئاككېنجېنوۋ، مەزكۇر ئەسلىھەنىڭ جۇغراپىيەلىك ئورنى سەۋەبىدىن قازاقىستان ياكى رۇسىيەنىڭ نېفىت تۇرۇبا لىنىيەسىگە تۇتاشمىغانلىقىنى ئەسكەرتتى. ئاككېنجېنوۋ سۆزىگە ئىلاۋە قىلىپ: «ئەسلىھە بىر خىل تۇيۇق رايونغا جايلاشقان بولۇپ، رۇسىيە فېدېراتسىيەسىگە تېخىمۇ يېقىن. ھەممە ئىش تۆمۈر يول تىرانسپورتىنىڭ ئىقتىدارىغا باغلىق بولىدۇ» دېدى.
رۇسىيە نېفىتىنى قازاقىستاننىڭ غەربىي قىسمىدىكى مەزكۇر زاۋۇتقا توشۇش خىزمىتىنىڭ يېقىن كەلگۈسىدە باشلىنىشى كۈتۈلمەكتە. نۆۋەتتە ئەسلىھەدە قايتا قۇرۇش ۋە ئىشلەپچىقىرىش ئىقتىدارىنى ئاشۇرۇش خىزمەتلىرى داۋاملاشماقتا.
