ئەمىنە ئەردوغاننىڭ ھىمايىسىدە، بىرلەشكەن دۆلەتلەر تەشكىلاتى ئومۇمىي كېڭىشى ھەپتىلىكىدە تايمىس مەيدانىدا ۋە تۈركىيە ئۆيى ئالدىدا ئامېرىكالىقلارغا سۇنۇلغان سىمىت ۋە چاي زور قىزىقىش قوزغاپ، ئانادولۇنىڭ ئورتاقلىشىش مەدەنىيىتى ۋە سەمىمىيىتى مىڭلىغان كىشىگە يەتكۈزۈلگەنىدى. شۇ كۈنى نيۇيورك كوچىلىرىدا باشلانغان بۇ تونۇشتۇرۇش پائالىيىتى نۆۋەتتە 50 ئىشتاتقا تارقالغان 608 تارماق دۇكىنى بار غايەت زور بىر زەنجىرسىمان تاللا بازىرىنىڭ مال تىزىش تەكچىلىرىگە قەدەر يېتىپ كەلدى.
تۈرك تائاملىرى مەدەنىيىتىنىڭ ئەڭ داڭلىق مەھسۇلاتلىرىنىڭ بىرى بولغان سىمىت، بۇ زەنجىرسىمان تاللا بازىرىنىڭ تارماق دۇكانلىرىدا، توڭلىتىلغان يېمەكلىكلەر بۆلۈمىدىكى مەھسۇلاتلار ئارىسىدا ئوخشاش نام (سىمىت دېگەن نام) بىلەن سېتىلماقتا.
تاللا بازىرىنىڭ تۈرك سىمىتى ئۈچۈن تەييارلىغان تونۇشتۇرۇش ماتېرىيالىدا: «ئەگەر تۈركىيەنىڭ لەززەتلىك تائاملىرىنى ئۆيىڭىزدە تېتىپ بېقىشنى ئويلىسىڭىز، سىزنى تۈرك كۈنجۈتلۈك نېنى سىمىت بىلەن تونۇشتۇرايلى» دېگەن ئىبارىلەرگە ئورۇن بېرىلگەن.
مەھسۇلاتنىڭ قانداق پىشۇرۇلىدىغانلىقى ۋە ئىستېمال قىلىنىدىغانلىقى ھەققىدىكى تەپسىلاتلارمۇ ئورۇن ئالغان تونۇشتۇرۇشتا: «بىزنىڭ سىمىتلىرىمىز ئەنقەرە ئۇسلۇبىدا، كىچىك، قوللىنىشقا ئەپلىك ۋە چۈرۈك قىلىپ ئىشلەپچىقىرىلدى» دېيىلگەن.
سىمىتنىڭ بىر تۈرك مەھسۇلاتى سۈپىتىدە كۈچلۈك بىر يېمەكلىك زەنجىرى ئارقىلىق ئامېرىكا بازىرىغا كىرىشى تۈرك تائامشۇناسلىق ساھەسى ئۈچۈن مۇھىم بىر تەرەققىيات دەپ قارالماقتا.
ئىلگىرى تۈرك ئىگىلىك تىكلىگۈچىلىرى تەرىپىدىن تار كۆلەمدە ئامېرىكا يېمەك-ئىچمەك بازىرىغا كىرگۈزۈلگەن سىمىتنىڭ بۇ تەرەققىيات بىلەن پۈتۈن مەملىكەتكە كېڭىيىپ، تونۇلۇش دەرىجىسىنىڭ تېخىمۇ ئېشىشى مۆلچەرلەنمەكتە.
تايمىس مەيدانىدا بىرلەشكەن دۆلەتلەر تەشكىلاتى 80-نۆۋەتلىك ئومۇمىي كېڭىشى يۇقىرى دەرىجىلىكلەر ھەپتىلىكى دائىرىسىدە ئۆتكۈزۈلگەن پائالىيەتتە، مەيداندىكى ئامېرىكالىقلار سىمىت ۋە چاي تارقىتىشنى قىزغىنلىق بىلەن قارشى ئالغان ھەمدە تۈرك تائاملىرىنىڭ لەززىتىدىن ھۇزۇرلىنىش بىلەن بىرگە ئانادولۇنىڭ ئورتاقلىشىش مەدەنىيىتى ۋە سەمىمىيىتىنىمۇ ھېس قىلىش پۇرسىتىگە ئېرىشكەنىدى.
تايمىس مەيدانىدىكى بۇ پائالىيەت كەڭ ئىنكاس قوزغىغان بولۇپ، سىمىتنى تۇنجى قېتىم تېتىپ باققان ئامېرىكالىقلار ئۇنى «ئىنتايىن ياقتۇرغانلىقى»نى ئېيتقانىدى.
ئەمىنە ئەردوغان يەنە تۈركىيە ئۆيىنىڭ يېنىدا قۇرۇلغان سىمىت سېتىش نۇقتىسىنى زىيارەت قىلىپ، سىمىتنىڭ ئامېرىكادا كەڭ ئىستېمال قىلىنىدىغان bagel» غا رەقىب بولالايدىغانلىقىنى ئېيتقانىدى.
