دۆلەت تاراتقۇلىرىنىڭ خەۋىرىگە قارىغاندا، خىتاي ھاكىمىيەت بېشىدىكى كوممۇنىستىك پارتىيەسى مەركىزىي كومىتېتى دۆلەتنىڭ كېيىنكى بەش يىللىق تەرەققىيات پىلانىنى مۇزاكىرە قىلىش ئۈچۈن دۈشەنبە كۈنى بېيجىڭدا تۆتىنچى قېتىملىق ئومۇمىي يىغىنىنى باشلىدى.
شۇنىڭ بىلەن بىر ۋاقىتتا خىتاي كوممۇنىستىك پارتىيەسى (خ ك پ) نىڭ باش سېكرېتارى بولغان دۆلەت رەئىسى شى جىنپىڭ، سىياسىي بيۇروغا ۋاكالىتەن خىزمەت دوكلاتى سۇندى ھەمدە پارتىيە رەھبەرلىكىنىڭ دۆلەتنىڭ ئىقتىسادىي ۋە ئىجتىمائىي تەرەققىياتى ئۈچۈن تۈزۈلگەن 15-بەش يىللىق پىلانى (2026-2030) غا ئائىت لايىھە تەكلىپلىرىنى ئېلان قىلدى.
پەيشەنبە كۈنىگىچە داۋاملىشىدىغان تۆت كۈنلۈك يىغىندا، ھۆكۈمەت ۋە پارتىيە ئىچىدىكى يېڭى تەيىنلەشلەرنىڭمۇ مۇزاكىرە قىلىنىشى كۈتۈلمەكتە.
ئومۇمىي كېڭەش يىغىنى پارتىيەنىڭ 205 نەپەر يۇقىرى دەرىجىلىك ئەمەلدارى ۋە 167 نەپەر كاندىدات ئەزاسىدىن تەركىب تاپقان خ ك پ مەركىزىي كومىتېتىنىڭ يىغىنى ھېسابلىنىدۇ.
مەركىزىي كومىتېت خ ك پ نىڭ ئەڭ ئالىي ھوقۇقلۇق ئورگىنى بولۇپ، پارتىيە سىياسىي بيۇروسىنىڭ ئەزالىرىنى ۋە باشقا مۇھىم تەيىنلەشلەرنى بېكىتىشكە مەسئۇل.
شى جىنپىڭنىڭ رەھبەرلىكىدە بېيجىڭدا ئۆتكۈزۈلگەن بۇ يىغىن، دۇنيادىكى ئىككىنچى چوڭ ئىقتىسادىي گەۋدە بولغان خىتاينىڭ 2025-يىلىنىڭ ئۈچىنچى پەسلىدە %4.8 لىك ئېشىشنى قولغا كەلتۈرگەن بىر مەزگىلگە توغرا كەلدى.
خىتاي بۇ يىللىق ئىچكى ئىشلەپچىقىرىش ئومۇمىي قىممىتىنىڭ يىللىق ئېشىش نىشانىنى «تەخمىنەن %5» قىلىپ بېكىتكەن ئىدى.
