فېۋرال ئېيىدا باشلانغان ئامېرىكا قوشما ئىشتاتلىرى-ئىسرائىلىيە ھۇجۇملىرىدا ھاياتىدىن ئايرىلغان ئىراننىڭ سابىق دىنىي رەھبىرى خامەنېي ئۈچۈن ئۆتكۈزۈلگەن دۆلەت مۇراسىمىغا قاتنىشىش مەقسىتىدە ئىرانغا بارغان يىلماز، پەزەشكىيان بىلەن ئۆتكۈزگەن سۆھبىتى توغرىسىدا ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا توختالدى.
يىلماز باياناتىدا مۇنداق دېدى:
«قېرىنداش دۆلەت ئىران خەلقىنىڭ ئۆتكەن مۇساپىدە تارتقان ئازاب-ئوقۇبەتلىرىنى چىن دىلىمىزدىن ئورتاقلىشىمىز. تۈركىيە بولۇش سۈپىتىمىز بىلەن، رايونىمىزدا تىنچلىق ۋە مۇقىملىقنىڭ سىجىل بولۇشى، دىيالوگ يوللىرىنىڭ كۈچەيتىلىشى ۋە ئۇرۇشتىن كېيىنكى نورماللىشىش مۇساپىسىنىڭ قوللىنىشى يۆنىلىشىدىكى خىزمەتلەرگە تۆھپە قوشۇشنى داۋاملاشتۇرىمىز.»
تۈركىيە بىلەن ئىران مۇناسىۋەتلىرىنىڭ ئىقتىساد، سودا، ئېنېرگىيە ۋە قاتناش قاتارلىق بارلىق ساھەلەردە تېخىمۇ تەرەققىي قىلدۇرۇلۇشى ئۈچۈن ئىرانلىق كەسپداشلار بىلەن زىچ ھەمكارلىق ئىچىدە خىزمەتلەرنى داۋاملاشتۇرىدىغانلىقىنى بىلدۈرگەن يىلماز، سۆزلىرىگە ئىلاۋە قىلىپ مۇنداق دېدى:
«قىزغىن قارشى ئالغانلىقى ئۈچۈن ھۆرمەتلىك پىرېزىدېنت مەسئۇد پەزەشكىيانغا رەھمەت ئېيتىمەن. ئىنقىلاب يېتەكچىسى خامەنېي بىلەن بىرلىكتە ھاياتىدىن ئايرىلغان بارلىق ئىرانلىق قېرىنداشلىرىمىزغا ئاللاھتىن رەھمەت تىلەيمىز، ئىران دۆلىتىگە، دوست ۋە قېرىنداش دۆلەت ئىران خەلقىگە يەنە بىر قېتىم سەۋر - تاقەت تىلەيمىز ھەم تەزىيە بىلدۈرىمىز.»
