تۈركىيە بىخەتەرلىك مەنبەلىرى يەكشەنبە كۈنى تۈركىيە ئىستىخبارات ئىدارىسىنىڭ، پاكىستان بىلەن ئافغانىستان ئوتتۇرىسىدا قاتار پايتەختى دوھادا ئۆتكۈزۈلگەن ۋە ھەر ئىككى تەرەپ دەرھال ئۇرۇش توختىتىشنى ئېلان قىلىشقا قوشۇلغان سۆھبەت جەريانىدا مۇھىم رول ئوينىغانلىقىنى ئېلان قىلدى.
مەنبەلەر تۈركىيە ۋە قاتارنىڭ قوللىشى بىلەن، تۈركىيە جۇمھۇرىيىتى مىللىي ئىستىخبارات ئىدارىسى باشلىقى ئىبراھىم كالىننىڭمۇ قاتنىشىشى بىلەن، پاكىستان بىلەن ئافغانىستان ئوتتۇرىسىدىكى توقۇنۇشلارغا مۇناسىۋەتلىك سۆھبەتنىڭ دوھادا ئۆتكۈزۈلگەنلىكىنى بىلدۈردى.
ئۇرۇش توختىتىش سۆھبىتىگە پاكىستان ۋە ئافغانىستاننىڭ ئىستىخبارات ئىدارىلىرىنىڭ باشلىقلىرى ۋە دۆلەت مۇداپىئە مىنىستىرلىرىمۇ قاتناشتى.
سۆھبەتنىڭ ئاساسلىق كۈن تەرتىپى «ھازىرقى ئۇرۇش توختىتىشنى ئۇزارتىش ۋە يېقىنقى چېگرا توقۇنۇشلىرىنى ھەل قىلىش» دەپ بېكىتىلدى.
كېچىگىچە داۋاملاشقان مۇزاكىرىلەر جەريانىدا، تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغاننىمۇ ئۆز ئىچىگە ئالغان دۇنيا رەھبەرلىرىگە تەرەققىياتلار ھەققىدە مەلۇمات بېرىلدى.
ئۇرۇش توختىتىشنىڭ تەپسىلاتى ئىستانبۇلدا مۇزاكىرە قىلىنىدۇ
ئۇرۇش توختىتىشنىڭ سىجىل ۋە دەلىللىگىلى بولىدىغان شەكىلدە داۋاملىشىشىغا كاپالەتلىك قىلىش ئۈچۈن كەلگۈسى كۈنلەردە ئىز قوغلاش يىغىنلىرى ئۆتكۈزۈلىدۇ.
14 سائەت داۋاملاشقان مۇزاكىرىدىن كېيىن، ئۇرۇش توختىتىشنىڭ تەپسىلاتىنى تەكشۈرىدىغان تېخنىكىلىق كومىتېتنىڭ تۇنجى يىغىنىنى ئىستانبۇلدا ئۆتكۈزۈش قارار قىلىندى.
يىغىندا، ئىككى دۆلەت ئوتتۇرىسىدىكى تېرورلۇق، كۆچمەنلەر ۋە چېگرا بىخەتەرلىكى قاتارلىق مەسىلىلەرنى مەڭگۈلۈك ھەل قىلىش ئۈچۈن ئۇزاق مۇددەتلىك قەدەملەر مۇزاكىرە قىلىنىدۇ.
11-ئۆكتەبىردە تۈركىيە، پاكىستان ۋە قاتارنىڭ ئىستىخبارات باشلىقلىرى ئىستانبۇلدا ئۈچ تەرەپلىك يىغىن ئۆتكۈزگەن بولۇپ، بۇ يىغىن جەريانىدا ئافغانىستان بىلەن تەڭلا ئالاقە ئورنىتىلغان.
