بۇ يېڭى ئورتاق پىلان كوكس بازار شەھىرىدە ئاجىز ئەھۋالدا قالغان ئائىلىلەرگە سۇيۇقلاندۇرۇلغان نېفىت گازى (LPG) بېرىشنى ئۆز ئىچىگە ئالىدۇ. كوكس بازاردا بىر مىليوندىن ئارتۇق روھىڭيالىق مۇساپىر ياردەمگە موھتاج.
ئەنگلىيە بىلەن قاتار يەكشەنبە كۈنى باڭلادېشنىڭ كوكس بازار شەھىرىدە ياشاۋاتقان 647 مىڭدىن ئارتۇق روھىڭيالىق مۇساپىرنى ۋە شەھەردىكى باشقا جامائەتلەرنى قوللاش ئۈچۈن 11.2 مىليون دوللارلىق ئورتاق مەبلەغ تەمىنلىگەنلىكىنى ئېلان قىلدى.
داككادىكى ئەنگلىيە ئالىي كومىسسارلىقىدىن ئېلان قىلىنغان باياناتقا ئاساسلانغاندا، لاگېرلاردا ۋە لاگېرلارنىڭ ئەتراپىدا ئوتۇنغا بېقىنىش كەلتۈرۈپ چىقارغان مۇھىت بۇزغۇنچىلىقىنى ئازايتىشنى ۋە كۈندىلىك تۇرمۇش شەرت-شارائىتىنى ياخشىلاشنى مەقسەت قىلغان مەزكۇر پىلان، ئاجىز ئەھۋالدىكى مۇساپىر ئائىلىلەرنىڭ سۇيۇقلاندۇرۇلغان نېفىت گازى (LPG) غا ئېرىشىشىنى ئىشقا ئاشۇرىدىكەن.
باڭلادېش ھازىرقى ۋاقىتتا، كۆپىنچىسى 2017-يىلى مىيانمارنىڭ ھەربىي ھەرىكىتىدىن قاچقان 1.3 مىليوندىن ئارتۇق روھىڭيالىق مۇساپىرغا ساھىبخانىلىق قىلماقتا. تەخمىنەن توققۇز يىل ئۆتكەن بولسىمۇ، ھېچقانداق مۇساپىر قايتىپ كەتمىدى ۋە رايونغا قىلىنغان ئىنسانپەرۋەرلىك ياردىمى تېزلىكتە ئازايماقتا.
ب د ت دۇنيا ئاشلىق پىروگراممىسى روھىڭياغا قىلىنغان ياردەملەردە تەخمىنەن 190 مىليون دوللارلىق بىر مەبلەغ بوشلۇقى (يېتىشمەسلىك) بارلىقى توغرىسىدا ئاگاھلاندۇردى. بۇ مىقدارنىڭ 172 مىليون دوللىرى ئاساسىي ئاشلىق ۋە ئوزۇقلۇق ياردىمى ئۈچۈن زۆرۈر.
مەزكۇر ئورگان جىددىي ياردەم تەمىنلەنمىگەن تەقدىردە، ئاشلىق ياردەملىرىنىڭ 2026-يىلى ئاپرېل ئېيىدىن باشلاپ ئېغىر دەرىجىدە توختاپ قېلىشى مۇمكىنلىكىنى بىلدۈردى.
