ئامېرىكا پىرىزېدېنتى دونالد ترامپ، ئىراننىڭ قوشنا دۆلەتلەردىن ئەپۇ سورىغانلىقىنى ۋە ئامېرىكا بىلەن ئىسرائىلىيەنىڭ ئىزچىل داۋاملاشتۇرغان ھەربىي بېسىمىدىن كېيىن، بۇ دۆلەتلەرگە قاراتقان ھۇجۇملىرىنى توختىتىشقا ۋەدە بەرگەنلىكىنى ئىلگىرى سۈردى.
ترامپ «Truth Social» سۇپىسىدا ھەمبەھىرلىگەن ئۇچۇرىدا، تېھران رەھبەرلىكىنىڭ ۋاشىنگتون ۋە رايوندىكى ئىتتىپاقداشلىرى تەرىپىدىن ئېلىپ بېرىلغان شىددەتلىك ھۇجۇملار نەتىجىسىدە چېكىنگەنلىكىنى ئېيتتى.
ترامپ ئىراننىڭ ئېغىر دەرىجىدە مەغلۇپ بولغانلىقىنى تىلغا ئېلىپ، تېھراننىڭ ئوتتۇرا شەرقتىكى قوشنىلىرىدىن ئەپۇ سورىغانلىقىنى ۋە ئەمدى ئۇلارغا ئوق چىقارماسلىققا ۋەدە بەرگەنلىكىنى يازدى.
ئامېرىكا پىرىزېدېنتى بۇ ۋەدىنىڭ پەقەت ئامېرىكا بىلەن ئىسرائىلىيەنىڭ ئۈزلۈكسىز ھۇجۇملىرى سەۋەبىدىن بېرىلگەنلىكىنى دەۋا قىلدى.
ترامپ يەنە ئىراننىڭ رايوننى كونترول قىلىش نىشانلىرىنىڭ توسۇپ قېلىنغانلىقىنى ئىلگىرى سۈردى. ئۇ ئىراننىڭ ئوتتۇرا شەرقنى قولغا كىرگۈزۈپ باشقۇرۇشنى خالىغانلىقىنى، ئەمما بۇنىڭ ئەمەلگە ئاشمىغانلىقىنى ئېيتتى.
ئامېرىكا پىرىزېدېنتى يەنە، بۇنىڭ ئىراننىڭ مىڭلىغان يىللىق تارىخى ئىچىدە ئەتراپىدىكى ئوتتۇرا شەرق دۆلەتلىرىگە قارشى تۇنجى مەغلۇبىيىتى ئىكەنلىكىنى ئوتتۇرىغا قويدى.
ترامپ رايوندىكى رەھبەرلەرنىڭ ئۆزىگە رەھمەت ئېيتقانلىقىنىمۇ دەۋا قىلدى.
شۇ كۈنىدىكى ئۇچۇرىدا ئىراننى قاتتىق تەنقىد قىلغان ترامپ، ئىراننىڭ ئەمدى ئوتتۇرا شەرقنىڭ «زومىگىرى» ئەمەس، بەلكى رايوننىڭ «مەغلۇب بولغۇچىسى» غا ئايلانغانلىقىنى يازدى.
ترامپ يەنە، ئىران تەسلىم بولمىغىچە ياكى پۈتۈنلەي ۋەيران بولمىغىچە بۇ ۋەزىيەتنىڭ داۋاملىشىدىغانلىقىنى بىلدۈردى.
ئامېرىكا پىرىزېدېنتى تېخىمۇ كۆپ ھەربىي ھۇجۇم قىلىش بىلەن تەھدىت سالدى. ئۇ ئىراننىڭ «ناچار قىلمىشلىرى» سەۋەبىدىن، ئىلگىرى نىشان قىلىنىشى ئويلىشىلمىغان بەزى رايونلار ۋە گۇرۇپپىلارنىڭمۇ ھازىر ھۇجۇم نىشانى سۈپىتىدە كۆرۈلىۋاتقانلىقىنى ئېيتتى.
ترامپنىڭ بۇ باياناتلىرى ئامېرىكا ۋە ئىسرائىلىيەنىڭ ئىراننىڭ ئىچىدىكى نىشانلارغا قاراتقان ھۇجۇملىرىنىڭ داۋاملىشىۋاتقانلىقى ھەققىدىكى خەۋەرلەر تارقالغان بىر پەيتكە توغرا كەلدى.
