سەيشەنبە كۈنى ئاقساراي ياپونىيە باش ۋەزىرى سانائې تاكائىچىنىڭ ئامېرىكا پىرېزىدېنتى دونالد ترامپنى نوبېل تىنچلىق مۇكاپاتىغا نامزاتلىققا كۆرسىتىدىغانلىقىنى بىلدۈردى.
ترامپ يانۋار ئېيىنىڭ باشلىرىدا قايتىدىن ۋەزىپىگە ئولتۇرغاندىن بۇيان، نوبېل مۇكاپاتىغا بارغانسېرى ئەھمىيەت بېرىۋاتقان بولۇپ، پۈتۈن دۇنيادىكى نۇرغۇن توقۇنۇشلارنى ئاخىرلاشتۇرغانلىقىنى ئىلگىرى سۈرمەكتە.
ترامپ ئىلگىرى پاكىستان، ئەزەربەيجان ۋە كامبودژا قاتارلىق نۇرغۇن دۆلەتلەر تەرىپىدىن مۇكاپاتقا نامزاتلىققا كۆرسىتىلگەن ئىدى.
تاكائىچى سەيشەنبە كۈنى ئەتىگەندە توكيودا ترامپ بىلەن كۆرۈشۈپ، ئىقتىساد ۋە بىخەتەرلىك مەسىلىلىرىنى مۇزاكىرە قىلدى.
تاكائىچى سەيشەنبە كۈنى مۇخبىرلارغا: «بۇنداق قىسقا ۋاقىت ئىچىدە دۇنيا تېخىمۇ كۆپ تىنچلىققا ئېرىشتى. ھۆرمەتلىك پىرېزىدېنت ترامپ ئەپەندىم! سىز مېنى ھەقىقەتەن تەسىرلەندۈردىڭىز ۋە ئىلھاملاندۇردىڭىز» دېدى.
ترامپ: ئىككى تەرەپلىك مۇناسىۋەتلەر مىسلى كۆرۈلمىگەن دەرىجىدە كۈچىيىدۇ
يەنە بىر تەرەپتىن، ترامپ سەيشەنبە كۈنى توكيودا تاكائىچى بىلەن كۆرۈشۈپ، ئامېرىكا-ياپونىيە مۇناسىۋەتلىرىنىڭ مىسلى كۆرۈلمىگەن دەرىجىدە كۈچىيىدىغانلىقىنى بايان قىلىپ: «مەن ياپونىيەنى ھەمىشە ناھايىتى ياخشى كۆرىمەن ۋە ھۆرمەت قىلىمەن. شۇنى دېيىشىم كېرەككى، بۇ مۇناسىۋەتلەر بۇرۇنقىدىن تېخىمۇ كۈچلۈك بولىدۇ» دېدى.
توكيونى داۋاملىق قوللايدىغانلىقى توغرۇلۇق ۋەدە بەرگەن ترامپ تاكائىچىغا: «ھەرقانداق سوئال، ھەرقانداق گۇمان، خالىغان نەرسە، ئېھتىياجلىق بولغان ھەرقانداق ياخشىلىق ئۈچۈن بىز بۇ يەردىمىز» دېدى ۋە ئىككى دۆلەتنى «ئەڭ كۈچلۈك سەۋىيەدىكى ئىتتىپاقداشلار» دەپ تەسۋىرلىدى.
ترامپ يەنە ياپونىيەنىڭ ھەربىي ئىقتىدارىنى «ناھايىتى زور دەرىجىدە» ئاشۇرغانلىقىنى ئېتىراپ قىلىپ، ۋاشىنگتوننىڭ «ناھايىتى زور مىقداردا يېڭى ھەربىي ئەسلىھەلەرنى زاكاز قىلغانلىقىنى» بايان قىلدى.
ئىككى تەرەپلىك سودىنىڭ تارىخىي سەۋىيەگە يەتكەنلىكىنى ئېيتقان ترامپ، ئىككى دۆلەتنىڭ «ناھايىتى ئادىل» كېلىشىم ئىمزالاشقا تەييارلىق قىلىۋاتقانلىقىنى بايان قىلىپ: «سىزنىڭ تۇنجى ئايال باش ۋەزىر بولغانلىقىڭىزنى قىزغىن تەبرىكلەيمەن. بۇ كاتتا ئىش» دېدى.
تاكائىچى توكيونىڭ «ھەم ياپونىيەنىڭ ھەم ئامېرىكانىڭ تېخىمۇ كۈچلۈك ۋە تېخىمۇ گۈللىشىنى، شۇنداقلا يېڭى ياپونىيە-ئامېرىكا ئىتتىپاقىنىڭ ئالتۇن دەۋرىنى ئەمەلگە ئاشۇرۇشنى خالايدىغانلىقىنى» ئېيتتى، ھەمدە ئىككى دۆلەتنىڭ «دۇنيادىكى ئەڭ چوڭ ئىتتىپاقنى تەرەققىي قىلدۇرغانلىقىنى» بايان قىلدى. ئاخىرىدا ياپونىيەنىڭ ئامېرىكا بىلەن بىرلىكتە تىنچلىق ۋە مۇقىملىققا تۆھپە قوشۇشقا تەييار ئىكەنلىكىنى بىلدۈردى.
تاكائىچى يەنە ياپونىيەنىڭ «ئۆزىنىڭ دۆلەت مەنپەئەتىنى قوغداش ئۈچۈن دىپلوماتىيەگە مۇراجىئەت قىلىش» پوزىتسىيەسىنىڭ مۇھىملىقىنى تەكىتلەپ، ۋاشىنگتون بىلەن «ئەركىن ۋە ئوچۇق ھىندى-تىنچ ئوكيان» نى ئەمەلگە ئاشۇرۇش ئۈچۈن تېخىمۇ كۆپ ھەمكارلىشىشقا تەييار ئىكەنلىكىنى قەيت قىلدى.
