ئامېرىكا ئارمىيەسى زەھەرلىك چېكىملىك ئەتكەسچىلىكى قىلىنغانلىقى ئىلگىرى سۈرۈلگەن 21 كېمىگە ھۇجۇم قىلغان بولۇپ، بۇ ھەرىكەتلەردە جەمئىي 83 كىشى ئۆلتۈرۈلگەن ئىدى.
ئامېرىكا قوشما ئىشتاتلىرى كېڭەش پالاتاسىنىڭ دېموكراتلار پارتىيەسى ئەزاسىلىرىدىن 13 ۋەكىل دۈشەنبە كۈنى ترامپ ھۆكۈمىتىدىن ئەدلىيە مىنىستىرلىقى قانۇن مەسلىھەت ئىشخانىسىنىڭ كارىب دېڭىزى ۋە شەرقىي تىنچ ئوكياندا گۇمانلىق زەھەرلىك چېكىملىك ئەتكەسچىلىكى قىلىدىغان كېمىلەرگە قارىتىلغان ئامېرىكا ئارمىيەسىنىڭ يېقىنقى ھۇجۇملىرىغا مۇناسىۋەتلىك يازما پىكىرنامىسىنى مەخپىيەتلىكتىن چىقىرىپ ئاممىغا ئېلان قىلىشىنى تەلەپ قىلدى.
پالات ئەزالىرى باش تەپتىش پام بوندى ۋە مۇداپىئە مىنىستىرى پىتې ھېگسېتقا يازغان مەكتۇبىدا، ئۆلۈمچۈل كۈچ ئىشلىتىشكە مۇناسىۋەتلىك سەۋەبلەرنىڭ ئاشكارىلىنىشىنىڭ مۇھىملىقىنى تەكىتلىدى.
مەكتۇپتا، ھەممىسى پالاتا قوراللىق مۇلازىمەتلەر كومىتېتىنىڭ ئەزاسى بولغان پارلامېنت ئەزالىرى: «ئۆلۈمچۈل كۈچ ئىشلىتىش بىر دېموكراتىيە ئۈچۈن نەتىجىلىرى جەھەتتىن ناھايىتى ئاز ئۇچرايدىغان دەرىجىدە مۇھىم بىر قاراردۇر،» دەپ يازدى.
پارلامېنت ئەزالىرى تەلەپ خەتلىرىدە يەنە: «شۇڭا بۇ مۇھىم ھۆججەتنىڭ مەخپىيەتلىكىنىڭ بىكار قىلىنىپ ئاممىغا ئېلان قىلىنىشىنىڭ، دۆلىتىمىز ئارمىيەسىنىڭ ئۆلۈمچۈل كۈچ ئىشلىتىشىدە ئاشكارىلىقنى ئاشۇرىدىغانلىقىنى ۋە پارلامېنت بىلەن ئامېرىكا خەلقىنىڭ بۇ ھۇجۇملارنى قوللايدىغان قانۇنىي ئاساسى ھەققىدە تولۇق خەۋەردار قىلىنىشىنى كاپالەتكە ئىگە قىلىش ئۈچۈن زۆرۈر ئىكەنلىكىنى ئويلايمىز» دېگەن سۆزلەرنى ئىشلەتتى.
«زەھەر تېررورچىلىرى»
ئامېرىكا ئارمىيەسى، ھازىرغىچە زەھەر ئەتكەسچىلىكى قىلغانلىقىدىن گۇمانلانغان كېمىلەرگە قارىتا 21 قېتىم ھۇجۇم قىلدى. بۇ ھەرىكەتلەردە ئامېرىكا ھۆكۈمىتى «ناركوتىك تېررورچىلار» دەپ ئاتىغان كەم دېگەندە 83 كىشىنىڭ ئۆلتۈرۈلگەنلىكىنى بىلدۈردى.
دۈشەنبە كۈنى ئاق ساراي باياناتچىسى كارولىن لېۋىت، ئامېرىكا پىرېزىدېنتى دونالد ترامپنىڭ يېقىنقى ھۇجۇملاردىن «ئىنتايىن مەمنۇن» ئىكەنلىكىنى ئېيتتى.
لېۋىت مۇخبىرلارغا بۇ ھۇجۇملارنىڭ داۋاملىشىدىغانلىقىنى ئېيتتى.
ئامېرىكا قوشما ئىشتاتلىرى ئايلاردىن بۇيان لاتىن ئامېرىكىسى مىقياسىدا ھەربىي ھەرىكەتلىرىنى كېڭەيتمەكتە. ئايلاپ داۋاملاشقان يۆتكىلىشلەر نەتىجىسىدە رايوندا دېڭىز پىيادىلىرى، ئۇرۇش پاراخوتلىرى، ئۇرۇش ۋە بومباردىمانچى ئايروپىلانلار، سۇ ئاستى پاراخوتلىرى ۋە ئۇچقۇچىسىز ھاۋا ئاپپاراتلىرىدىن تەركىب تاپقان مۇھىم بىر كۈچ ئورۇنلاشتۇرۇلغان ئەھۋالدا تۇرماقتا. بۇ ئىلگىرلەشلەر، ئامېرىكانىڭ ۋېنېزۇئېلاغا ھۇجۇم باشلىشى مۇمكىنلىكى ھەققىدىكى پەرەزلەرگە يول ئاچتى. ئەمما ترامپ جۈمە كۈنى يېقىندا ۋېنېزۇئېلا رەھبىرى نىكولاس مادۇرو بىلەن سۆھبەتلىشىدىغانلىقىنى ئېيتتى.
مادۇرو بولسا، ۋېنېزۇئېلانىڭ ۋاشىنگتون بىلەن «يۈزمۇ-يۈز» دىئالوگقا تەييار ئىكەنلىكىنى بىلدۈردى.
