ئامېرىكا ۋە كۇبانىڭ يۇقىرى دەرىجىلىك ھەربىي ئەمەلدارلىرى، ئامېرىكانىڭ بېسىمىنى ئاشۇرۇشى سەۋەبىدىن ئىككى دۆلەت ئوتتۇرىسىدىكى مۇناسىۋەتلەر يامانلاشقان بىر مەزگىلدە، ئامېرىكانىڭ كارىب دېڭىزى دۆلىتىدىكى بازىسى بولغان گۇانتانامو قولتۇقىدا بىر يەرگە جەم بولدى.
ئامېرىكا مەركىزىي قوماندانلىق ئىشتابى تەرىپىدىن ئېلان قىلىنغان باياناتتا، ئۇچرىشىشقا ئالاقىدار بىر پارچە سۈرەت بىلەن بىرگە، ئامېرىكالىق گېنېرال فىرانسىس دوناۋاننىڭ جۈمە كۈنى كۇبالىق گېنېرال روبېرتو لېگرا سوتولونگو بىلەن «ھەربىي ھەرىكەت بىخەتەرلىكى مەسىلىلىرىدە قىسقا بىر پىكىر ئالماشتۇرۇشتا بولغانلىقى» بىلدۈرۈلدى.
ئالدىنقى ھەپتە چىققان خەۋەرلەردە، ھاۋانانىڭ ئامېرىكانىڭ ھۇجۇم قىلىش ئېھتىماللىقىغا قارىتا بازىغا ئۇچقۇچىسىز ھاۋا ئاپپاراتى بىلەن ھۇجۇم قىلىشنى پىلانلاۋاتقانلىقى ئىلگىرى سۈرۈلگەن ئىدى.
بۇ ھەقتە ئېلان قىلىنغان باياناتقا ئاساسلانغاندا، دوناۋان ئامېرىكا بازىسىنىڭ ئەتراپىنىڭ بىخەتەرلىكىنى كۆزدىن كەچۈرۈش خىزمىتىگە يېتەكچىلىك قىلغان ھەمدە ھەربىي خادىملارنىڭ بىخەتەرلىكى ۋە ھەربىي ھەرىكەت تەييارلىقى مەسىلىلىرىنى مۇزاكىرە قىلغان.
كۇبانىڭ شەرقىي جەنۇبىدىكى ساھىلىغا، مىئامىنىڭ 700 كىلومېتىر شەرقىي جەنۇبىغا جايلاشقان گۇانتانامو قولتۇقى، 2001-يىلى 11-سېنتەبىر ھۇجۇمىدىن كېيىن تۇتقۇن قىلىنغانلارغا قىلىنغان مۇئامىلىلەر سەۋەبىدىن يامان نام بىلەن تونۇلغان.
ئامېرىكا مەركىزىي قوماندانلىق ئىشتابى ئېلان قىلىنغان باياناتتا مۇنداق دېيىلدى:
«گۇانتانامو قولتۇقى دېڭىز ئارمىيە بازىسى، يېرىم شارىمىزدا بىخەتەرلىك، مۇقىملىق ۋە دېموكراتىيەگە زىيان يەتكۈزىدىغان تەھدىتلەرگە قارشى ئامېرىكانىڭ ھەربىي تىرىشچانلىقلىرىنى قوللايدىغان ناھايىتى زور ئەھمىيەتكە ئىگە بىر ھەربىي ھەرىكەت ۋە ئەشيا ئوبوروتى مەركىزىدۇر.»
ئامېرىكانىڭ رايوندىكى ئۇرۇش پاراخوتلىرى
يانۋار ئېيىدا ئامېرىكانىڭ ئارالغا يۈرگۈزگەن ئېنېرگىيە قورشاۋى بىلەن بىرگە ئادەتتىن تاشقىرى دەرىجىدە كەسكىنلىشىپ كەتكەن ھاۋانا – ۋاشىنگتون مۇناسىۋەتلىرى، ئالدىنقى ھەپتە فىلورىدا سوت مەھكىمىسى تەرىپىدىن كۇبانىڭ سابىق پىرېزىدېنتى رائۇل كاستروغا قارشى ئەيىبلەشلەرنىڭ ئېلان قىلىنىشى بىلەن تېخىمۇ يامانلاشتى.
ئامېرىكا ئارمىيەسى نۆۋەتتە كارىب دېڭىزىدا كەم دېگەندە بىر قۇرۇقلۇققا چىقىش پاراخوتىنى ئۆز ئىچىگە ئالغان بىرنەچچە ئۇرۇش پاراخوتىغا ئىگە؛ بۇ، ۋېنېزۇئېلا ھەربىي ھەرىكىتىگە قاتناشقان كۈچلەرگە قارىغاندا خېلىلا كىچىك بىر قىسىمدۇر.
پېنتاگون جۈمە كۈنى، ئالدىنقى يىلى يازدا رايونغا ئورۇنلاشتۇرۇلغان 22-دېڭىز ئارمىيە چارلاش قىسمىنىڭ ئورنىنى 1300 دېڭىزچى ۋە دېڭىز پىيادە ئەسكىرىدىن تەشكىل تاپقان يېڭى بىر قىسىمنىڭ ئالىدىغانلىقىنى ئۇقتۇردى.
