كولومبىيە دۆلەتنىڭ غەربىي جەنۇبىدا كەم دېگەندە يەتتە كىشىنىڭ ئۆلۈمىگە ۋە 28 كىشىنىڭ يارىلىنىشىغا سەۋەب بولغان ھەمدە كۈنسېرى ئەۋ ئېلىۋاتقان بىخەتەرلىك كىرىزىسىنى تېخىمۇ چوڭقۇرلاشتۇرغان 24 قېتىملىق ماسلاشتۇرۇلغان بومبىلىق ۋە قوراللىق ھۇجۇم بىلەن تەۋرەپ كەتتى.
كولومبىيەنىڭ ئۈچىنچى چوڭ شەھىرى بولغان كالى ۋە ئۇنىڭغا يېقىن بىر قانچە بازارنى نىشان قىلغان ھۇجۇملاردا ساقچىخانىلار، شەھەرلىك ھۆكۈمەت بىناسى ۋە پۇقرالار رايونلىرى زەربىگە ئۇچرىدى.
ساقچى باشلىقى كارلوس فېرناندو ترىئانا سەيشەنبە كۈنى ئېلان قىلغان باياناتىدا، يەرلىك بىر قوزغىلاڭچى گۇرۇپپا دەپ گۇمان قىلىنغان ھۇجۇمچىلارنىڭ بومبا ئورنىتىلغان ئاپتوموبىل بومبا ئورنىتىلغان موتسىكلىت، مىلتىق ۋە گۇمانلىق ئۇچقۇچىسىز ئايروپىلان ئىشلەتكەنلىكىنى ئېيتتى. ئۇ: «ئىككى ساقچى ۋە نۇرغۇنلىغان پۇقرا ھاياتىدىن ئايرىلدى» دېدى.
ھۇجۇملارنىڭ بوگوتادا بىر پىرېزىدېنت نامزاتىغا قارىتىلغان ۋە مەغلۇپ بولغان سۇيىقەست ئۇرۇنۇشىدىن بىر نەچچە كۈن كېيىن يۈز بېرىشى جىددىي ۋەزىيەتنى تېخىمۇ كۈچەيتتى. نۇرغۇن كولومبىيەلىكلەر 1980- ۋە 1990-يىللاردىكى زەھەر ئەتكەسچىلىرى گۇرۇپپىلىرىنىڭ بومبا ھۇجۇمى ۋە قوزغىلاڭچىلارنىڭ ھۇجۇملىرى بىلەن ئالاھىدە گەۋدىلەنگەن زوراۋانلىق مۇھىتىغا قايتىپ قېلىشتىن ئەنسىرىمەكتە.
كالى، ۋىللا رىكا، گۇئاچىنتې ۋە كورىنتو قاتارلىق جايلاردا مۇخبىرلار ئاپتوموبىل قالدۇقلىرى ۋە بۇزۇلغان بىنالارنى كۆردى. كورىنتودا ياشايدىغان لۇز ئامپارو ناۋايخانىنىڭ ۋەيران بولغانلىقىنى ئېيتتى.
لۇز ئامپارو <AFP> ئاخبارات ئاگېنتلىقىغا بەرگەن باياناتىدا: «يەر تەۋرىدى دەپ ئويلىدۇق. يولدىشىم ‹ياق، ئۇلار ئوق چىقىرىۋاتىدۇ› دېدى» دېدى.
ساقچىلار ۋە مۇتەخەسسىسلەر ھۇجۇمنىڭ سابىق FARC قوزغىلاڭچى گۇرۇپپىسىنىڭ ئۆكتىچى گۇرۇھى بولغان مەركىزىي باش ئىشتاب (EMC) تەرىپىدىن ئېلىپ بېرىلغانلىقىنى پەرەز قىلماقتا. خەلقئارا كرىزىس گۇرۇپپىسىدىن ئېلىزابېت دىكىنسون بۇنى «ئالاھىدە ياخشى ماسلاشتۇرۇلغان بىر ھۇجۇم» دەپ تەرىپلەپ، بۇنىڭ گۇرۇپپىنىڭ كۈچىيىۋاتقان ھەرىكەت ئىقتىدارىنى كۆرسىتىپ بېرىدىغانلىقىدىن ئاگاھلاندۇردى.
پىرېزىدېنت گۇستاۋو پېترونىڭ EMC بىلەن تىنچلىق سۆھبىتى ئۆتكۈزۈش تىرىشچانلىقى قايتا-قايتا مەغلۇپ بولدى. ئانالىزچىلار، گۇرۇپپىنىڭ «ئىۋان موردىسكو» دەپ ئاتالغان رەھبىرىنى يارىلاندۇرغان ياكى ئۆلتۈرگەنلىكى خەۋەر قىلىنغان بىر ھەربىي ھەرىكەتكە جاۋابەن ئېلىپ بېرىلغان بولۇشى مۇمكىنلىكىنى ئېيتماقتا.
شۇنىڭ بىلەن بىر ۋاقىتتا، ئۆتكەن ھەپتە بوگوتادا ئوققا تۇتۇلغان كېڭەش پالاتا ئەزاسى مىگۇئېل ئۇرىبېغا سۇيقەست قىلماقچى بولغان 15 ياشلىق بىر بالا «گۇناھسىز ئىكەنلىكىنى» ئىلگىرى سۈردى. پىرېزىدېنت پېترو ھۇجۇمنىڭ خەلقئارالىق بىر «مافىيە» تەرىپىدىن ئورۇنلاشتۇرۇلغانلىقىنى ئوتتۇرىغا قويۇپ، ئۇرىبې ئوققا تۇتۇلغان كۈنى بىخەتەرلىكىنىڭ ئاجىزلاشتۇرۇلغانلىقىنى تەنقىد قىلدى.
