بىرلەشكەن دۆلەتلەر تەشكىلاتى باش كاتىپىنىڭ باياناتچىسى ستېفان دۇجاررىك كۈندىلىك مۇخبىرلارنى كۈتۈۋېلىش يىغىنىدا سۆز قىلدى.
دۇجاررىك: «باش كاتىپ يېقىنقى بىرنەچچە كۈندىن بۇيان ئىران بىلەن ئامېرىكا ئوتتۇرىسىدا داۋاملىشىۋاتقان ۋە دائىرىسى بارغانسېرى كېڭىيىۋاتقان ھەربىي جىددىيچىلىكتىن قاتتىق ئەندىشە قىلماقتا» دېدى. ئۇ يەنە كىرىزىسنىڭ پۈتۈن رايون دۆلەتلىرىگە تەسىر كۆرسىتىۋاتقانلىقىنى، سودا سىستېمىلىرىغا، ئىنسانپەرۋەرلىك ياردەملىرىگە، قاتناش تەننەرخىگە، شۇنداقلا مەزكۇر رايون دۆلەتلىرى ۋە ئۇنىڭ سىرتىدىكى جايلاردا يېقىلغۇ بىلەن ئاساسلىق تۇرمۇش لازىمەتلىكلىرىنىڭ باھاسىغا بېسىم ئېلىپ كېلىۋاتقانلىقىنى ئەسكەرتىپ مۇنداق دېدى:
«باش كاتىپ بولۇپمۇ ئىراندا قۇرۇلۇۋاتقان بىر يادرو ئېلېكتر ئىستانسىسى ۋە بىر سۇ بىر تەرەپ قىلىش زاۋۇتىنى ئۆز ئىچىگە ئالغان پۇقراۋى ئۇل ئەسلىھەلەرگە قارىتىلغان ھۇجۇملاردىن، شۇنداقلا رايون مىقياسىدا كۇۋەيت ۋە باشقا جايلاردىكى ئېنېرگىيە پونكىتلىرى بىلەن سۇ بىر تەرەپ قىلىش زاۋۇتلىرىغا قىلىنغان ھۇجۇملاردىن قاتتىق ئەندىشە قىلماقتا.»
گۇتېررېسنىڭ «بۇ خىل ھۇجۇملارنى قوبۇل قىلغىلى بولمايدىغانلىقىنى ئىكەنلىكىنى ۋە دەرھال توختىتىلىشى كېرەكلىكىنى» بىلدۈرگەنلىكىنى يەتكۈزگەن دۇجاررىك: «باش كاتىپ، بۇ توقۇنۇشنىڭ ھەربىي ھەل قىلىش چارىسى يوقلۇقىنى تەكرارلايدۇ ۋە تىنچ، دائمىي بىر ھەل قىلىش چارىسى ئۈچۈن دىپلوماتىك تىرىشچانلىقلىرىنى كۈچەيتىش چاقىرىقىدا بولىدۇ» دېدى.
باياناتچى دۇجاررىك، تەرەپلەر ئوتتۇرىسىدا ھاسىل قىلىنىدىغان كېلىشىمنىڭ، ھورمۇز بوغۇزى ۋە ئەتراپىدىكى خەلقئارالىق قاتناش ھوقۇقى ۋە ئەركىنلىكىنى تولۇق ئەسلىگە كەلتۈرۈشنى ئۆز ئىچىگە ئېلىشى كېرەكلىكىنىمۇ سۆزلىرىگە ئىلاۋە قىلدى.
