ئامېرىكا پىرېزىدېنتى دونالد ترامپ غەززە تىنچلىق كېڭىشىنى قۇرۇش مۇساپىسىنىڭ داۋاملىشىۋاتقانلىقىنى ۋە كېڭەشتىن «دۇنيادىكى ئەڭ مۇھىم دۆلەتلەر» نىڭ رەھبەرلىرىنىڭ ئورۇن ئالىدىغانلىقىنى بىلدۈردى.

ترامپ يەكشەنبە كۈنى پىرېزىدېنت ئايروپىلانىدا مۇخبىرلارنى كۈتۈۋېلىش يىغىنىدا بەرگەن باياناتىدا: «غەززە تىنچلىق كېڭىشى قۇرۇلۇۋاتىدۇ. كېڭەشتىن ئەڭ مۇھىم دۆلەتلەرنىڭ ئەڭ مۇھىم رەھبەرلىرى ئورۇن ئالىدۇ» دېدى.

ترامپ بۇ تەشەببۇسقا قاتنىشىش ئۈچۈن خەلقئارادا كۈچلۈك قىزىقىش بارلىقىنى سۆزلىرىگە ئىلاۋە قىلىپ: «ھەممە ئادەم بۇ كېڭەشتىن ئورۇن ئېلىشنى خالايدۇ» دېدى.

ترامپ رەھبەرلىك قىلىدىغان ۋە تەخمىنەن 15 دۆلەت رەھبىرىنى ئۆز ئىچىگە ئالىدىغان مەزكۇر كېڭەش، كېيىنچە قۇرۇلىدىغان پەلەستىن كەسپىي خادىملار ھۆكۈمىتىنى نازارەت قىلىدۇ ھەمدە غەززەدىكى قايتا قۇرۇش مۇساپىسىنى كۆزىتىدۇ.

كېڭەشكە قاتنىشىشى كۈتۈلۈۋاتقان دۆلەتلەر ئارىسىدا ئەنگلىيە، گېرمانىيە، فىرانسىيە، ئىتالىيە، سەئۇدى ئەرەبىستان، قاتار، مىسىر ۋە تۈركىيە بار. بىرلەشكەن دۆلەتلەر تەشكىلاتىنىڭ ئوتتۇرا شەرقتىكى سابىق ئالاھىدە ۋەكىلى نىكولاي ملادېنوفنىڭ تىنچلىق كېڭىشىنىڭ ساھەدىكى ۋەكىلى سۈپىتىدە ۋەزىپە ئۆتەش ئېھتىماللىقىنىڭ بارلىقى خەۋەر قىلىنماقتا.

 كېڭەشنىڭ مۇشۇ ھەپتە ئېلان قىلىنىدىغانلىقىغا دائىر خەۋەرلەرگە قارىماي، ترامپ بۇنىڭ قاچان قۇرۇلىدىغانلىقى ھەققىدە ئېنىق مەلۇمات بەرمىدى.

ترامپ ھۆكۈمىتى تىنچلىق كېڭىشىنى ئالدىنقى ئايدا تونۇشتۇرۇشنى پىلانلىغانلىقىنى بىلدۈرگەن، ئەمما بۇنى ئېلان قىلىشنى كۆپ قېتىم كېچىكتۈرگەن ئىدى.

ئىسرائىلىيە 2023-يىلى ئۆكتەبىردىن بۇيان غەززەدە كۆپىنچىسى ئاياللار ۋە بالىلاردىن تەشكىل تاپقان 71 مىڭدىن ئارتۇق پەلەستىنلىكنى ئۆلتۈردى، 170 مىڭدىن ئارتۇق كىشىنى يارىلاندۇردى.