خىتاي ھۆكۈمىتى ئىگىلىك ھوقۇقى دەۋاسى قىلىۋاتقان بولسىمۇ، ئەمەلىيەتتە مۇستەقىل باشقۇرۇلۇۋاتقان تەيۋەن ئارىلىنىڭ ئەتراپىدا «كەڭ كۆلەملىك» ھەربىي مانېۋىر باشلىغانلىقىنى ئېلان قىلدى. خىتاي ئارمىيەسى 29-دېكابىردىن باشلاپ، بەش ئايرىم رايوندا ھەقىقىي ئوق-دورا ئىشلىتىلىدىغان بىرلەشمە ھەربىي ھەرىكەت ئېلىپ بارىدىغانلىقىنى بىلدۈردى.
خىتاي ئارمىيەسى باياناتچىسى پىشقەدەم پولكوۋنىك شى يىنىڭ ئېيتىشىچە، خەلق ئازادلىق ئارمىيەسى شەرقىي سەپ قوماندانلىقى «ئادالەت ۋەزىپىسى 2025» ناملىق بۇ مانېۋىرغا قۇرۇقلۇق، دېڭىز، ھاۋا ۋە راكېتا قىسىملىرىنى سەپەرۋەر قىلغان. شىنخۇا ئاگېنتلىقى ئېلان قىلغان خەرىتىدە، تەيۋەن ئارىلىنى قورشاپ تۇرغان بەش رايوندا دېڭىز ۋە ھاۋا قاتنىشىنىڭ چەكلىنىدىغانلىقى كۆرسىتىلدى.
تەيۋەننىڭ ئىنكاسى: «تەھدىتنى ئەيىبلەيمىز»
تەيۋەن ئارمىيەسى خىتاينىڭ بۇ ھەرىكىتىگە قارىتا دەرھال «تېز ئىنكاس قايتۇرۇش» مېخانىزمىنى ئىشقا كىرىشتۈرۈپ، مۇھىم نۇقتىلارغا مۇۋاپىق ھەربىي كۈچلەرنى ئورۇنلاشتۇرغانلىقىنى بىلدۈردى.
تەيۋەن پىرېزىدېنتلىق مەھكىمىسى باياناتچىسى كارېن كو خىتاينىڭ خەلقئارا قائىدە-مىزانلارغا خىلاپ ھالدا قوشنا دۆلەتلەرگە ھەربىي تەھدىت سېلىشىنى «قاتتىق ئەيىبلەيدىغانلىقى»نى جاكارلىدى. تەيبېي تەرەپ بېيجىڭنىڭ ئىگىلىك ھوقۇقى دەۋاسىنى رەت قىلىپ، تەيۋەننىڭ كەلگۈسىنى پەقەت تەيۋەن خەلقىنىڭلا بەلگىلىيەلەيدىغانلىقىنى تەكىتلىمەكتە.
خىتاي-ياپونىيە سۈركىلىشى ۋە بېيجىڭنىڭ ئاگاھلاندۇرۇشى
بۇ ھەربىي ھەرىكەت رايوندا دىپلوماتىك جىددىيچىلىك كۈچەيگەن بىر مەزگىلگە توغرا كەلدى. بولۇپمۇ ياپونىيەنىڭ تەيۋەن يېقىنلىرىغا باشقۇرۇلىدىغان بومبا ئورۇنلاشتۇرۇش پىلانى ۋە ياپونىيە باش ۋەزىرى سانا تاكايىچىنىڭ «تەيۋەنگە قىلىنغان ھۇجۇم توكيونىڭ ھەربىي ئىنكاسىنى قوزغىشى مۇمكىن» دېگەن سۆزلىرى بېيجىڭنىڭ غەزىپىنى قوزغىدى.
بېيجىڭ تەرەپ چەت ئەلنىڭ تەيۋەن مەسىلىسىگە ھەر قانداق شەكىلدە ئارىلىشىشىنى «تارمار قىلىدىغانلىقى»نى، زېمىن پۈتۈنلۈكىنى قوغداشتا تەۋرەنمەس ئىرادىگە ئىگە ئىكەنلىكىنى تەكىتلىدى. شۇنىڭ بىلەن بىرگە، خىتاي رەئىسى شى جىنپىڭ نويابىر ئېيىدا ئامېرىكا پىرېزىدېنتى دونالد ترامپ بىلەن ئۆتكۈزگەن تېلېفون سۆھبىتىدە، تەيۋەننىڭ خىتايغا قايتىشىنىڭ «ئۇرۇشتىن كېيىنكى خەلقئارا تەرتىپنىڭ ئاچقۇچلۇق قىسمى» ئىكەنلىكىنى ئىلگىرى سۈرگەنىدى.
