جەنۇبىي كورېيە مۇئاۋىن تاشقى ئىشلار مىنىستىرى جېئوڭ يېئون-دۇ پيوڭياڭنىڭ يادرو قوراللىرىنى كېڭەيتىشكە قارشى تۇرۇش شەرتنامىسى (NPT) دىن چېكىنىپ چىقىپ، يادرو قوراللىرىنى تەرەققىي قىلدۇرۇش پائالىيەتلىرىنى داۋاملاشتۇرۇشىنىڭ يەنىلا ئالاھىدە بىر مەسىلە پەيدا قىلىۋاتقانلىقىنى بىلدۈردى.
يونخاپ ئاگېنتلىقىنىڭ سەيشەنبە كۈنى ئېلان قىلغان خەۋىرىگە قارىغاندا، جەنۇبىي كورېيە يادرو قوراللىرىنىڭ كېڭىيىپ كېتىشىنىڭ ئالدىنى ئېلىش سىستېمىسىغا قارىتا ئەڭ جىددىي تەھدىت دەپ سۈپەتلىگەن شىمالىي كورېيەنىڭ يادرو پىروگراممىسىغا قارشى، خەلقئارا سەۋىيەدە ۋە تېز سۈرەتتە ھەرىكەتكە ئۆتۈش چاقىرىقى ئېلان قىلغان.
جەنۇبىي كورېيە مۇئاۋىن تاشقى ئىشلار مىنىستىرى جېئوڭ يېئون-دۇ نىيۇ يوركتا ئۆتكۈزۈلگەن يادرو قوراللىرىنى كېڭەيتىشكە قارشى تۇرۇش شەرتنامىسى تېمىسىدىكى يىغىندا قىلغان سۆزىدە، پيوڭياڭنىڭ يادرو قوراللىرىنى تەرەققىي قىلدۇرۇش پائالىيەتلىرىنى داۋاملاشتۇرۇشىنىڭ ئالاھىدە قىيىنچىلىق تۇغدۇرۇۋاتقانلىقىنى تەكىتلىدى.
جېئوڭ: «شىمالىي كورېيە يادرو قوراللىرىنى كېڭەيتىشكە قارشى تۇرۇش شەرتنامىسىدىن بەھرىمەن بولۇپ تۇرۇپ، كېلىشىمدىن چېكىنىپ چىققانلىقىنى ئېلان قىلغان ۋە يادرو قوراللىرىنى تەرەققىي قىلدۇرۇش خىزمىتىنى ئوچۇق-ئاشكارا داۋاملاشتۇرۇۋاتقان بىردىنبىر دۆلەتتۇر. شۇ سەۋەبتىن، شىمالىي كورېيە يادرو قوراللىرىنىڭ كېڭىيىپ كېتىشىنىڭ ئالدىنى ئېلىش تۈزۈمىگە قارىتا داۋاملىق ئەڭ جىددىي تەھدىت شەكىللەندۈرمەكتە.»
جېئوڭ خەلقئارا جەمئىيەتنى شىمالىي كورېيەنىڭ بىخەتەرلىكى ۋە ئىقتىسادىي كېلەچىكىنىڭ كېلىشىم رامكىسىغا قايتىپ كېلىشىگە باغلىق ئىكەنلىكى مەسىلىسىدە بىردەك سىگنال بېرىشكە چاقىردى.
جېئوڭ يەنە رۇسىيەنى پيوڭياڭ بىلەن بولغان ھەربىي ھەمكارلىقنى توختىتىشقا چاقىرىپ، بۇ خىل مۇناسىۋەتلەرنىڭ بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ قارارلىرىغا ۋە تېخىمۇ كەڭ دائىرىلىك يادرو قوراللىرىنىڭ كېڭىيىشىنىڭ ئالدىنى ئېلىش تۈزۈمىگە زىيان يەتكۈزىدىغانلىقى ھەققىدە ئاگاھلاندۇرۇش بەردى.
1970-يىلىدىن باشلاپ يولغا قويۇلۇۋاتقان يادرو قوراللىرىنى كېڭەيتىشكە قارشى تۇرۇش شەرتنامىسى يادرو قوراللىرىنىڭ كېڭىيىپ كېتىشىنىڭ ئالدىنى ئېلىشنى ۋە تىنچلىق مەقسىتىدىكى يادرو ئېنېرگىيەسىنى ئىلگىرى سۈرۈشنى نىشان قىلغان ئاساسلىق يەر شارى خاراكتېرلىك كېلىشىم بولۇپ، كېلىشىمگە ئەمەل قىلىش ئەھۋالىنى باھالاش ئۈچۈن ھەر بەش يىلدا بىر قېتىم كۆزدىن كەچۈرۈش يىغىنى ئۆتكۈزۈلۈپ تۇرىدۇ.
