ئۇكرائىنا پىرېزىدېنتى ۋولودىمىر زېلېنسكىي ئامېرىكانىڭ ئۇكرائىنانى قورال-ياراغلار بىلەن تەمىنلىشىنى ئەسلىگە كەلتۈرگەنلىكىنى ئېلان قىلدى.

ئۇ جۈمە كۈنى (11-ئىيۇل) كەچتە سۆزلىگەن نۇتقىدا مۇنداق دېدى:

«بىز ئامېرىكا ۋە ياۋروپالىق دوستلىرىمىزدىن ئەڭ يۇقىرى سەۋىيەدە سىياسىي جەھەتتە ياخشى سىگناللارنى تاپشۇرۇۋالدۇق. بارلىق دوكلاتلارغا قارىغاندا، ياردەم ئەشيالىرىنى توشۇش ئەسلىگە كەلتۈرۈلگەن.»

ئۇ ئۇكرائىنا ھەربىي دائىرىلىرىنىڭ كېلەر ھەپتە ئامېرىكانىڭ ئالاھىدە ئەلچىسى كېيت كېللوگ بىلەن كۆرۈشىدىغانلىقىنى ئەسكەرتتى.

ئۇ مۇنداق دېدى:

«بىز كېلەر ھەپتە ئامېرىكا تەرەپ بىلەن ھەربىي سەۋىيەدە خىزمىتىمىزنى داۋاملاشتۇرىمىز. بولۇپمۇ ھەربىي رەھبەرلىرىمىز گېنېرال كېللوگ بىلەن يېقىندىن ھەمكارلىشىدۇ. بىز يەنە ياۋروپانىڭ يېڭى مۇداپىئە ياردەم پىلانلىرىنىمۇ تەييارلاۋاتىمىز.»

ئۇكرائىنا تاراتقۇلىرىنىڭ خەۋىرىگە قارىغاندا، كېللوگنىڭ دۈشەنبە كۈنى (14-ئىيۇل) كىيېۋغا يېتىپ بارىدىغانلىقى ۋە بىر ھەپتە زىيارەتتە بولىدىغانلىقى پىلانلانغان.

كېللوگ رىمدا ئۆتكۈزۈلگەن ئۇكرائىناغا مۇناسىۋەتلىك بىر يىغىندا، ئۇكرائىنا تاراتقۇسى «Novyny.LIVE» نىڭ زىيارىتىنى قوبۇل قىلىپ مۇنداق دېدى: «بىز دۈشەنبە كۈنى كىيېۋدا بولىمىز، پۈتۈن ھەپتە شۇ يەردە بولىمىز«.

مۇناسىۋەتلىك ئۇچۇرلارTRT Global - US resumes delivering some weapons to Ukraine after pause

كۈچەيگەن ھۇجۇملار

قايتىدىن باشلانغان ھەربىي ئالاقىلەر، رۇسىيە ئۇكرائىنا شەھەرلىرىگە قىلغان ھۇجۇملىرىنى كۈچەيتكەن بىر پەيتكە توغرا كەلدى. بۇ ھەپتە رۇسىيەنىڭ نۇرغۇن ئۇچقۇ ۋە باشقۇرۇلىدىغان بومبىلار بىلەن ئىككى قېتىملىق كېچىلىك ھۇجۇمى ئەمەلگە ئاشتى.  

پىرېزىدېنت دونالد ترامپ پەيشەنبە كۈنى (10-ئىيۇل) ئامېرىكانىڭ ئۇكرائىناغا ناتو ئارقىلىق قورال-ياراغ يەتكۈزۈپ بېرىدىغانلىقىنى ۋە دۈشەنبە كۈنى (14-ئىيۇل) رۇسىيە توغرىسىدا «مۇھىم بايانات» ئېلان قىلىدىغانلىقىنى ئېيتتى.

ئۇ ئالدىنقى ھەپتە رۇسىيە پىرېزىدېنتى ۋلادىمىر پۇتىنغا رۇسىيەنىڭ ھۇجۇملىرى ۋە مەسىلىنى ھەل قىلىش ئۈچۈن ئۇرۇش توختىتىشنى يولغا قويۇلالمىغانلىقىدىن ئۈمىدسىزلەنگەنلىكىنى بىلدۈرگەن ئىدى.

زېلېنسكىي سۆزىدە، ئالدىنقى ھەپتە ئۇكرائىنا ئەسكەرلىرى ئالاھىدە كۆزگە كۆرۈنگەن زور قىيىنچىلىققا تولغان ئالدىنقى سەپ لىنيەلىرىگە مۇناسىۋەتلىك دوكلاتلارنى خۇلاسىلىدى.