ئىسرائىلىيە ئۆكتىچىلەر رەھبىرى يائىر لاپىد چارشەنبە كۈنى، ئامېرىكا – ئىران ئوتتۇرىسىدىكى ۋاقىتلىق ئۇرۇش توختىتىش كېلىشىمىنى قوللىغانلىقى سەۋەبىدىن نېتانياھۇنى قاتتىق تەنقىد قىلىپ، بۇ ئەھۋالنى «سىياسىي ۋە ئىستراتېگىيەلىك مەغلۇبىيەت» دەپ سۈپەتلىدى.

لاپىد ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا: «تارىخىمىزدا بۇنچىلىك چوڭ سىياسىي پاجىئەنى كۆرۈپ باقمىدۇق. دۆلەت خەۋپسىزلىكىمىزنىڭ ماھىيىتىگە مۇناسىۋەتلىك قارارلار چىقىرىلغاندا، ئىسرائىلىيە ھەتتا ئۇ يەردىمۇ يوق ئىدى» دېدى.

لاپىد نېتانياھۇنىڭ «تەكەببۇرلۇقى، غەپلىتى ۋە ئىستراتېگىيەلىك پىلانلاش يېتەرسىزلىكى» سەۋەبىدىن كېلىپ چىققان زىياننى ئەسلىگە كەلتۈرۈشكە ئۇزۇن يىللار كېتىشى مۇمكىنلىكىنى، ئارمىيە ۋە خەلقنىڭ ئۆز ۋەزىپىسىنى ئۆتىگەنلىكىنى، ئەمما ھۆكۈمەتنىڭ نىشانلارغا يېتىشتە يېتەرسىز قالغانلىقىنى تەكىتلىدى.

لاپىد باياناتىدا يەنە: «ئارمىيە ئۆزىدىن تەلەپ قىلىنغان ھەممە ئىشنى ئورۇندىدى، خەلق ئادەتتىن تاشقىرى قەيسەرلىك كۆرسەتتى، لېكىن نېتانياھۇ سىياسىي ۋە ئىستراتېگىيەلىك جەھەتتىن مەغلۇپ بولدى، شۇنداقلا ئۆزى ئۈچۈن بەلگىلىگەن ھېچقانداق نىشانغا يېتەلمىدى» دېدى.

بۇ باياناتلار نېتانياھۇ ئىشخانىسىنىڭ، ئىسرائىلىيەنىڭ ئامېرىكا پىرېزىدېنتى دونالد ترامپنىڭ ئىرانغا قارىتىلغان ھەربىي ھۇجۇملارنى ئىككى ھەپتە توختىتىپ تۇرۇش قارارىنى قوللايدىغانلىقىنى ئېلان قىلىشىدىن كېيىن ئوتتۇرىغا چىقتى.

لېكىن نېتانياھۇنىڭ ئىشخانىسى، ئىككى ھەپتىلىك ئۇرۇش توختىتىشنىڭ «لىۋاننى ئۆز ئىچىگە ئالمايدىغانلىقى» نى بىلدۈردى.

ترامپ سەيشەنبە كۈنى ئىرانغا قاراتقان بومباردىمان ۋە ھۇجۇملارنى «ئىككى ھەپتە توختىتىپ تۇرۇش» مەسىلىسىدە پۈتۈشكەنلىكلىرىنى ئۇقتۇرغان ئىدى.