ئامېرىكا پىرېزىدېنتى دونالد ترامپ ئامېرىكا قوشما ئىشتاتلىرىنىڭ ھىندىستان بىلەن بولغان سودا مىقدارىنىڭ ناھايىتى تۆۋەن ئىكەنلىكىنى، رۇسىيە بىلەن بولسا سودا-سېتىقىنىڭ يوق دېيەرلىك ئىكەنلىكىنى تەكىتلىدى.

ترامپ پەيشەنبە كۈنى «Truth Social» سۇپىسىدىكى يازمىسىدا: «ھىندىستاننىڭ رۇسىيە بىلەن قىلغان ئىشلىرى بىلەن مېنىڭ كارىم يوق. ئەگەر خالىسا، ئىقتىسادلىرىنى بىرلىكتە ۋەيران قىلىۋەتسۇن، نېمە كارىم» دېدى.

ترامپ چارشەنبە كۈنى «Truth Social» دا ھەمبەھرىلىگەن يەنە بىر يازمىسىدا، ئامېرىكانىڭ جۈمە كۈنىدىن باشلاپ ھىندىستاندىن ئىمپورت قىلىنىدىغان مەھسۇلاتلارغا %25 لىك تاموژنا بېجى يۈرگۈزىدىغانلىقىنى ئېلان قىلىپ، ھىندىستاننىڭ رۇسىيە بىلەن بولغان سودىسىنىمۇ تىلغا ئالدى.

بۇنىڭغا قارىتا، ھىندىستان ھۆكۈمىتى ترامپنىڭ باياناتلىرىنىڭ ئاقىۋىتىنى كۆزدىن كەچۈرۈۋاتقانلىقىنى ۋە ئادىل سودا كېلىشىمى ھاسىل قىلىشقا بەل باغلىغانلىقىنى بىلدۈردى.

ترامپ ھىندىستاننىڭ ھەربىي ئەسلىھەلىرى ۋە ئېنېرگىيە مەنبەلىرىنىڭ كۆپ قىسمىنى ھەمىشە رۇسىيەدىن سېتىۋالىدىغانلىقىنى، بۇنىڭ «ياخشى ئىش ئەمەسلىكى»نى قەيت قىلدى.