جەنۇبىي ئافرىقا سەھىيە مىنىستىرلىقى مەلۇماتلىرىغا قارىغاندا، 15 كىشى كەيپ تاۋن شەھىرىنى ئۆز ئىچىگە ئالغان غەربىي كەيپ ئۆلكىسىدە، 3 كىشى گاۋتېڭدا، 1 كىشى كۋازۇلۇ-ناتال ئۆلكىسىدە «M چېچىكى» ۋىرۇسى بىلەن يۇقۇملانغان.
يەرلىك تارقىلىشنىڭ تېزلىشىشى ھەققىدە ئاگاھلاندۇرۇش
يەنە بىر تەرەپتىن، مىنىستىرلىق 13 كىشىنىڭ 13-ئاۋغۇستتىن 17-سېنتەبىرگىچە بولغان ئارىلىقتا «M چېچىكى» ۋىرۇسى بىلەن يۇقۇملانغانلىقىنى ئەسكەرتىپ، بۇ ئەھۋالنىڭ ۋىرۇسنىڭ يەرلىك قاتلامدا تېز تارقىلىۋاتقانلىقىدىن دېرەك بېرىدىغانلىقى توغرىسىدا ئاگاھلاندۇردى.
ھازىرغىچە يۇقۇملانغانلارنىڭ يېشى 23 تىن 50 كىچە بولۇپ، ئۇلارنىڭ 17سى ئەر، بىرى ئايال ئىكەن.
باياناتتا دۇنيا سەھىيە تەشكىلاتىنىڭ قوللىشى بىلەن چەكلىك مىقداردا MVA-BN ۋاكسىنىسى ۋە Tecovirimat دورىسىنىڭ تەمىنلەنگەنلىكى، بۇلارنىڭ يۇقۇمنى كونترول قىلىش مەقسىتىدە ئىشلىتىلىدىغانلىقى قەيت قىلىندى.
«M چېچىكى» ۋىرۇسى ھەققىدە
دۇنيا سەھىيە تەشكىلاتىنىڭ مەلۇماتىغا قارىغاندا، «M چېچىكى» ۋىرۇسى Poxviridae ئائىلىسىگە ۋە Orthopoxvirus تۈرىگە تەۋە ۋىرۇستىن كېلىپ چىقىدىغان بىر خىل يۇقۇملۇق كېسەللىكتۇر. كېسەللىكنىڭ كۆپ كۆرۈلىدىغان ئالامەتلىرى قاتتىق قىزىش، باش، بەل ۋە مۇسكۇل ئاغرىقى، لىمفا بەزلىرىنىڭ ئىششىشى، چارچاش، توڭۇش، تىترەش ۋە تېرىدە سۇ چېچىكىگە ئوخشاش قاپارتما پەيدا بولۇش قاتارلىقلارنى ئۆز ئىچىگە ئالىدۇ.
بۇ ۋىرۇس چاشقان ۋە تىيىنغا ئوخشاش غاجىغۇچى ھايۋانلاردىن ياكى يۇقۇملانغان كىشىلەردىن يۇقىدۇ.
بەدەندىكى قاپارتمىلارغا تېگىش، بۇلار بىلەن بۇلغانغان كىيىم-كېچەك، كارىۋات يوتقانلار، لۆڭگە ۋە مۇشۇنىڭغا ئوخشاش بويۇملارنى ئىشلىتىش ھەمدە بەدەن سۇيۇقلۇقلىرى بىلەن ئۇچرىشىش ۋىرۇس يۇقۇشتىكى ئەڭ مۇھىم سەۋەبلەر ھېسابلىنىدۇ.
