ئامېرىكا پىرېزىدېنتى دونالد ترامپ دۇنيادىكى يېقىلغۇ قىسلىقى سەۋەبىدىن دۆلەتنىڭ دىزېل ئېكسپورتىغا چەكلىمە قويۇشنى ئويلىشىۋاتقانلىقىنى ئەسكەرتىپ، ياۋروپا ئەللىرىنىڭ يېقىلغۇ زاپاسلىرىنى  دەرھال ئەركىن قويۇپ بېرىشى كېرەكلىكىنى ئېيتتى.

 پىرېزىدېنت ترامپ ھەپتە ئاخىرىدا ئېلان قىلغان باياناتىدا، دىزېل ئېكسپورتىنى مەنئىي قىلىش مەسىلىسىنى ئىنتايىن ئەستايىدىللىق بىلەن باھالاۋاتقانلىقلىرىنى بىلدۈردى.

ئامېرىكا خەزىنە مىنىستىرى سىكوت بېسسېنت  ياۋروپالىق شېرىكلەرنىڭ ھازىرقى كېلىشىملەر بويىچە يەتكۈزۈپ بېرىش خىزمىتىنى تېزلىتىشى ۋە داۋاملىشىۋاتقان ئۈزۈلۈشلەرنى ھەل قىلىش ئۈچۈن قوشۇمچە مەنبەلەرنى دەرھال ھازىرلىشى كېرەكلىكىنى تەكىتلىدى. بېسسېنت ئامېرىكا دېھقانلىرى، يۈك ماشىنىسى شوپۇرلىرى ۋە كارخانىلىرىنىڭ بۇ ئېغىر يۈكنى يالغۇز كۆتۈرمەسلىكى كېرەكلىكىنى ئوتتۇرىغا قويدى.

فېۋرال ئېيىدىن باشلاپ داۋاملىشىۋاتقان ئىران ئۇرۇشى سەۋەبىدىن ئۆرلەپ كەتكەن تەننەرخ ۋە نويابىر ئېيىدىكى ئارىلىق سايلاملىرى ھارپىسىدا، سايلىغۇچىلارنىڭ ئاساسلىق كۈنتەرتىپىگە ئايلانغان دىزېل قىسلىقى ۋاشىنگتوندا جىددىي سىگناللارنىڭ چىلىنىشىغا سەۋەب بولدى. ئامېرىكا دۇنياغا كۈنىگە 1 مىليون 200 مىڭدىن 1 مىليون 500 مىڭ ۋارىلغىچە دىزېل ئېكسپورت قىلىدىغان ھالقىلىق تەمىنلىگۈچى دۆلەت ھېسابلىنىدۇ.

ئامېرىكانىڭ دىزېل ئېكسپورتىنى مەنئىي قىلىش ئېھتىماللىقىغا قارىتا، ئەنگلىيە ۋە ياۋروپالىق شېرىكلەر كىرىزىس مەركىزى قۇردى. مۇتەخەسسىسلەرنىڭ قارىشىچە، مال ئەۋەتىشكە قويۇلۇشى مۇمكىن بولغان چەكلىمە باشقا دۆلەتلەردىكى باھانىڭ تېخىمۇ ئۆرلەپ كېتىشىنى كەلتۈرۈپ چىقىرىدۇ.

دۇنيادىكى بېنزىن ۋە دىزېل باھاسى فېۋرالدا ئىراندا باشلانغان ئۇرۇشتىن كېيىن ئۆرلەشكە باشلىغان ئىدى. دۇنيادىكى نېفىت ۋە تەبىئىي گازنىڭ تەخمىنەن بەشتىن بىرى توشۇلىدىغان ھورمۇز بوغۇزىنىڭ تاقىلىپ قېلىشى، نېفىت مەھسۇلاتلىرىنىڭ باھاسىنى تېخىمۇ ئۆرلىتىۋەتتى. شۇنىڭ بىلەن بىر ۋاقىتتا، مۇھىم دىزېل تەمىنلىگۈچى دۆلەت بولغان رۇسىيەنىڭ ئېكسپورتنى چەكلىشىمۇ باھا بېسىمىنى ئاشۇرۇۋەتتى.