باڭلادېش تۈركىيەنىڭ قوللىشىغا ئېرىشىش يولىدا ئىزدەنمەكتە.
داككا ئارقا-ئارقىدىن يۈز بەرگەن ياۋايى ھايۋاناتلارنىڭ يوقىلىپ كېتىش ھادىسىدىن كېيىن، تەبىئىي ساياھەتچىلىك ۋە ئېكولوگىيەلىك مۇھىتنى قوغداش جەھەتتە نەزىرىنى تۈركىيەلىك مۇتەخەسسىسلەرگە ئاغدۇرماقتا. ئەنقەرە بولسا، تۈركىيە ھەمكارلىق ۋە كوردىناتسىيە ئىدارىسى ئارقىلىق ئورتاق تۈرلەرنى قوللاشقا تەييار ئىكەنلىكىدىن سىگنال بەرمەكتە.
باڭلادېش ئەنقەرەنىڭ تەبىئەت كۈچىدىن پايدىلىش ئاساسىدىكى ساياھەتچىلىك ۋە ئېكولوگىيەلىك مۇھىتنى قوغداش جەھەتتىكى تەجرىبە – ساۋاقلىرىنى يەكۈنلەپ، ئورمانچىلىق ئىسلاھاتى ۋە ئىمكانىيەتلىك سىجىل ساياھەتنى تەرەققىي قىلدۇرۇش مەسىلىلىرىدە تۈركىيەدىن تېخنولوگىيەلىك ياردەم تەلەپ قىلماقتا.
باڭلادېش مۇھىت ئاسراش ئىشلىرى مىنىستىرلىقى تەرىپىدىن ئېلان قىلىنغان باياناتتا ئەسكەرتىلىشىچە، ۋاقىتلىق ھۆكۈمەتنىڭ مۇھىت ئىشلىرى مەسلىھەتچىسى سەييىدە رىزۋانا ھەسەن سەيشەنبە كۈنى داككادىكى ئىشخانىسىدا تۈركىيەنىڭ باڭلادېش باش ئەلچىسى رامىس شەن بىلەن ئېلىپ بارغان ئۇچرىشىشىدا بۇ ھەقتىكى ئوي – پىكىرلىرىنى ئوتتۇرىغا قويغان.
ھەسەن ئىنسانلار بىلەن ياۋايى ھايۋاناتلار ئوتتۇرىسىدىكى توقۇنۇشنىڭ تەسىرىگە ئۇچرىغان ئورمانلىقلارنى ئەسلىگە كەلتۈرۈشتە مۇتەخەسسىسلەر بىلەن ھەمكارلىق ئورنىتىشقا جىددىي ئېھتىياج بارلىقىنى تەكىتلەش بىلەن بىرگە، مۇۋاپىق دەرەخ تۈرلىرىنى ئىشلىتىش ۋە تەبىئىي ياشاش مۇھىتلىرىنى قوغدايدىغان ساياھەت مودېللىرىنى قوللىنىشنىڭ مۇھىملىقىنى تەكىتلىگەن.
يېقىندا ياشاش مۇھىتىنىڭ ۋەيران بولۇشى ۋە يېمەكلىك قىيىنچىلىقى سەۋەبىدىن نۇرغۇن پىلنىڭ ئۆلۈپ كېتىشىنى كەلتۈرۈپ چىقارغان بىر مۇھىت ھادىسىسى ھەققىدە توختالغان ھەسەن، تېخىمۇ كۆپ ئېكولوگىيەلىك ۋەيرانچىلىقنىڭ ئالدىنى ئېلىش ئۈچۈن پىلانلىق ئورمانچىلىق ئىسلاھاتىنىڭ ناھايىتى زور ئەھمىيەتكە ئىگە ئىكەنلىكىنى قەيت قىلغان.
ئۇ يەنە، ئېكولوگىيەلىك ساياھەت رايونلىرى توغرىسىدىكى پىلانلىرىنى خۇلاسىلىگەن. جۈملىدىن باڭلادېشنىڭ شەرقىگە جايلاشقان سىلھەت رايونى ئۈچۈن مۇھىتنىڭ بۇزۇلۇشىنى ئەڭ تۆۋەن چەككە چۈشۈرۈپ، ئىمكانىيەتلىك سىجىل ساياھەتنى ئىلگىرى سۈرۈش پىلانىنى ئوتتۇرىغا قويغان.
بۇ تەكلىپنى قىزغىن قارشى ئالغان باش ئەلچى شەن، تۈركىيە ھەمكارلىق ۋە كوردىناتسىيە ئىدارىسىنىڭ ئوتتۇرا كۆلەملىك ئورتاق تۈرلەرنى قوللاشقا تەييار ئىكەنلىكىنى بىلدۈرگەن. شۇنداقلا، كونكرېت تۈر پۇرسەتلىرىنى تەتقىق قىلىش ۋە ئىككى تەرەپلىك ھەمكارلىقنى تەرەققىي قىلدۇرۇش ئۈچۈن مەسلىھەتچىنىڭ ئىشخانىسى بىلەن تۈركىيەدىكى مۇناسىۋەتلىك ئورۇنلار ئوتتۇرىسىدا ئالاقە ئورنىتىلىدىغانلىقى توغرىسىدا ۋەدە بەرگەن.
