ئىسرائىلىيە ئارمىيەسى ئىشغالىيىتى ئاستىدىكى ئىيوردان دەرياسىنىڭ غەربىي قىرغىقىغا قىلغان ھۇجۇملىرىدا بىر پەلەستىنلىك بالىنى ئۆلتۈرۈپ، تۆت كىشىنى يارىلاندۇردى.
پەلەستىن سەھىيە مىنىستىرلىقىنىڭ يەكشەنبە كۈنىدىكى باياناتىدا، تۇباس شەھىرىنىڭ جەنۇبىدىكى فارىئە مۇساپىرلار لاگېرىدا 15 ياشلىق بىر بالىنىڭ ئىسرائىلىيە قىسىملىرى تەرىپىدىن ئېتىپ ئۆلتۈرۈلگەنلىكى قەيت قىلىندى.
پەلەستىن دۆلەتلىك خەۋەر ئاگېنتلىقى «WAFA» نىڭ خەۋىرىدە، سەھىيە خادىملىرىنىڭ لاگېردا شاراپنېل پارچىلىرى تېگىپ يارىلانغان ئىككى كىشىنى داۋالىغانلىقى؛ قۇتقۇزۇش ئاپتوموبىللىرىنىڭ ئۈچىنچى يارىدارغا يېقىنلىشىشىنىڭ توسقۇنلۇققا ئۇچرىغانلىقى ۋە بۇ ياشنىڭ كېيىنچە ھاياتىدىن ئايرىلغانلىقىنىڭ ئېلان قىلىنغانلىقى بىلدۈرۈلدى.
ئاگېنتلىقنىڭ خەۋىرىگە قارىغاندا، قۇربان بولغۇچىنىڭ ئىسمى جادۇللاھ جىھاد جۇمئە جادۇللاھ ئىكەنلىكى ئېنىقلانغان.
ۋەقەنى كۆرگۈچىلەر ئانادولۇ ئاگېنتلىقىغا ئىسرائىلىيە قىسىملىرىنىڭ لاگېرغا بېسىپ كىرىپ كۈچەپ قورال ئىشلەتكەنلىكىنى ۋە بۇنىڭ يارىلىنىشلارنى كەلتۈرۈپ چىقارغانلىقىنى بىلدۈردى.
يەنە بىر تەرەپتىن، «WAFA» خەۋەر ئاگېنتلىقى ئىشغالىيەت ئاستىدىكى ئىيوردان دەرياسى غەربىي قىرغىقىنىڭ شىمالىدىكى جېنىن شەھىرىدە بىر ئىسرائىلىيە ھەربىي ئاپتوموبىلىنىڭ بىر تاكسىغا سوقۇلۇپ كېتىپ ھادىسە پەيدا قىلغانلىقىنى ۋە ۋەقەدە ئىككى پەلەستىنلىكنىڭ يارىلانغانلىقىنى خەۋەر قىلدى.
پەلەستىن دائىرىلىرىنىڭ سانلىق مەلۇماتلىرىغا قارىغاندا، 2023-يىلى ئۆكتەبىردە غەززەگە قارشى ئۇرۇش باشلانغاندىن كېيىن، ئىيوردان دەرياسىنىڭ غەربىي قىرغىقىدا ئىسرائىلىيە ئارمىيەسى ۋە قانۇنسىز كۆچمەنلەرنىڭ ھۇجۇملىرى كۈچىيىپ كەتكەن. بۇ ھۇجۇملار 1073 دىن ئارتۇق پەلەستىنلىكنى ئۆلتۈرگەن ۋە 10 مىڭ 700 دىن ئارتۇق كىشىنى يارىلاندۇرغان.
ئىسرائىلىيە 2023-يىلى ئۆكتەبىردىن بۇيان كەڭ كۆلەملىك ھۇجۇملارنى ئېلىپ بېرىۋاتقان غەززەدە بولسا، كۆپىنچىسى ئاياللار ۋە بالىلاردىن بولۇپ، تەخمىنەن 70 مىڭ پەلەستىنلىكنى ئۆلتۈردى.
خەلقئارا سوت مەھكىمىسى ئۆتكەن يىلى 7-ئايدا ئېلان قىلغان مۇھىم بىر كېسىمنامىسىدە، ئىسرائىلىيەنىڭ پەلەستىن زېمىنىنى ئىشغال قىلىشىنى قانۇنسىز دەپ جاكارلاپ، ئىشغالىيىتى ئاستىدىكى ئىيوردان دەرياسىنىڭ غەربىي قىرغىقى ۋە شەرقىي قۇددۇستىكى بارلىق ئولتۇراق رايونلاردىن چېكىنىپ چىقىپ كېتىشنى تەلەپ قىلغانىدى.
