مالىنىڭ شەرقىي شىمالىدىكى مېناكا رايونىدا تېررورلۇق تەشكىلاتى دائىش تەرىپىدىن قىلىنغانلىقى بىلدۈرۈلگەن ھۇجۇمدا 48 پۇقرا ھاياتىدىن ئايرىلىپ، نۇرغۇن كىشى يارىلاندى.
باشقۇرۇش ئورگىنى ئىداكساھاك جەمئىيىتى ئىجرائىيە ئىشخانىسى تەرىپىدىن ئېلان قىلىنغان يازما باياناتتا، 18-ئۆكتەبىردە مېناكا رايونىدىكى تاگادايات ئولتۇراق رايونىدا موتسىكلىت مىنىپ كەلگەن كىشىلەرنىڭ پۇقرالارغا ھۇجۇم قىلغانلىقى بىلدۈرۈلدى.
ھۇجۇمدا دەسلەپكى مەلۇماتلارغا قارىغاندا 48 پۇقرانىڭ قازا قىلغانلىقى، نۇرغۇن كىشىنىڭ يارىلانغانلىقى ببىلدۈرۈلدى ھەمدە ھۇجۇمنىڭ دائىش تەرىپىدىن قىلىنغانلىقى ئەسكەرتىلدى.
باياناتتا پۇقرالارغا قىلىنغان ھۇجۇملار ئەيىبلىنىش بىلەن بىرگە، مالى دائىرىلىرىنى رايوندا خەۋپسىزلىك تەدبىرلىرىنى كۈچەيتىشكە ۋە يېڭى ھۇجۇملارنىڭ ئالدىنى ئېلىشقا چاقىردى.
نۇرغۇن كىشى ئۆي - ماكانىدىن ئايرىلدى
باياناتتا، ھۇجۇمدىن كېيىن نۇرغۇن كىشىنىڭ ئۆيلىرىنى تاشلاپ كېتىشكە مەجبۇر بولغانلىقى، ئارىسىدا ئاياللار، بالىلار ۋە ياشانغانلارمۇ بولغان ئائىلىلەرنىڭ مېناكا شەھىرىگە پاناھلانغانلىقى بىلدۈرۈلدى.
رايوندىكى ئىنسانپەرۋەرلىك ۋەزىيىتىنىڭ بارغانسېرى ناچارلىشىۋاتقانلىقى تەرەپكە دىققەتلەر تارتىلغان باياناتتا، يېڭىدىن ئۆي - ماكانىدىن ئايرىلغانلارنىڭ رايوندىكى ئىنسانپەرۋەرلىك ياردەم ئېھتىياجىنى ئاشۇرۇۋەتكەنلىكى تەكىتلەندى.
ئىداكساھاك جەمئىيىتى مىللىي ۋە خەلقئارالىق ئىنسانپەرۋەرلىك ياردەم تەشكىلاتلىرىنى جىددىي ياردەم بېرىشكە چاقىردى.
مېناكا رايونىدىكى خەۋپسىزلىك ۋەزىيىتى
مېناكا مالى، نىگېر ۋە بۇركىنا فاسو چېگرالىرى تۇتاشقان رايونغا جايلاشقان بولۇپ، ئۇزۇندىن بېرى دائىشنىڭ ساھېل تارمىقىنىڭ ھۇجۇملىرىغا دۇچ كەلمەكتە.
ب د ت نىڭ مالى كۆپ تەرەپلىمىلىك ئۇنىۋېرسال مۇقىملىقنى ساقلاش قىسمى، 2022-يىلى مارتتىكى مېناكا رايونىدا دائىش ئەزالىرى تەرىپىدىن قىلىنغان ھۇجۇملاردا كەم دېگەندە 157 پۇقرانىڭ ئۆلتۈرۈلگەنلىكىنى ھۆججەتلەشتۈرگەن ئىدى.
رايوندا داۋاملىشىۋاتقان ھۇجۇملار سەۋەبلىك مىڭلىغان كىشىلەر ئۆيلىرىنى تاشلاپ كېتىشكە مەجبۇر بولماقتا، مېناكا ۋە ئۇنىڭ ئەتراپىدا خەۋپسىزلىك مەسىلىلىرى داۋاملاشماقتا.
