2025-يىلى5-ئاينىڭ12-كۈنى
ئۇكرائىنا-پىرېزىدېنتى ۋولودىمىر زېلېنسكىي ئۇكرائىنا-رۇسىيە ئۇرۇشىدا بىر قانچە ئاي داۋاملاشقان قاتماللىقتىن كېيىن، دىپلوماتىك تىرىشچانلىقلار قايتىدىن جانىلىنىشقا باشلىغان بىر مەزگىلدە رۇسىيە پىرېزىدېنتى پۇتىننى پەيشەنبە كۈنى (15-ماي) تۈركىيەدە شەخسەن ئۆزى كۈتىدىغانلىقىنى ئېيتتى.
ئۇكرائىنا پىرېزىدېنتى ۋولودىمىر زېلېنسكىي يەكشەنبە كۈنى ئېكس (X) بېتىدە ئۇچۇر ھەمھرلىدى. ئۇ ئۇچۇرىدا: «دىپلوماتىك تىرىشچانلىقلارغا مۇھىم ئاساس سېلىش ئۈچۈن ئەتىدىن باشلاپ تولۇق ۋە ئۇزۇن مۇددەتلىك ئۇرۇش توختىتىشنى كۈتىمىز... تېخىمۇ كۆپ ئادەم ئۆلتۈرۈشنى ئۇزارتىشنىڭ ھېچقانداقمەنىسى يوق. پەيشەنبە كۈنى پۇتىننى شەخسەن ئۆزەم تۈركىيەدە كۈتىمەن، بۇ قېتىم رۇسلار باھانە ئۇيدۇرماس» دېدى.
بۇ بايانات پۇتىننىڭ رۇسىيەنىڭ 15-ماي (2025) دىن باشلاپ ئىستانبۇلدا ئۇكرائىنا بىلەن بىۋاسىتە سۆھبەتلەرنى قايتا باشلاشقا تەييار ئىكەنلىكىنى جاكارلىشىدىن كېيىن ئېلان قىلىندى.
ئامېرىكا پىرېزىدېنتى دونالد ترامپمۇ يەكشەنبە كۈنى (11-ماي) ئېكس بېتىدە ھەمبەھرلىگەن ئۇچۇرىدا، ئۇكرائىنانى بۇ تەكلىپنى قوبۇل قىلىشقا چاقىردى.
ئۇ مۇنداق دېدى:
«رۇسىيە پىرېزىدېنتى پۇتىن ئۇكرائىنا بىلەن ئۇرۇش توختىتىش كېلىشىمى تۈزمەكچى ئەمەس، بەلكى پەيشەنبە كۈنى تۈركىيەدە ئۇچرىشىپ، قان تۆكۈلۈشىنى ئاخىرلاشتۇرۇش ئۈچۈن سۆھبەت ئۆتكۈزمەكچى. ئۇكرائىنا بۇنى دەرھال قوبۇل قىلىشى كېرەك... مەن ئۇكرائىنانىڭ ئىككىنچى دۇنيا ئۇرۇشى غەلبىسىنى تەبرىكلەش بىلەن ئالدىراش بولۇۋاتقان پۇتىن بىلەن كېلىشىم تۈزۈشىدىن گۇمانلىنىشقا باشلىدىم. .. سۆھبەتنى ھازىر باشلاڭلار!!!»
تۈركىيە پۇتىننىڭ تەكلىپىنى قارشى ئالىدۇ
تەۋسىيە
پۇتىن موسكۋادىكى مۇخبىرلارنى كۈتۈۋېلىش يىغىنىدا، دۈشەنبە كۈنى (12-ماي) تۈركىيە جۇمھۇر رەئىسى رەجەپ تاييىپ ئەردوغان بىلەن تېلېفوندا كۆرۈشۈپ، تۈركىيەنىڭ سۆھبەتلەرنى ئۇيۇشتۇرۇشقا ياردەم بېرىشىنى رەسمىي تەلەپ قىلىدىغانلىقىنى بىلدۈردى.
ئۇ يەنە: «رۇسىيە شەرتسىز ھالدا سۆھبەت ئۆتكۈزۈشكە تەييار» دېدى.
تۈركىيە جۇمھۇر رەئىسى رەجەپ تاييىپ ئەردوغان پۇتىننىڭ رۇسىيە بىلەن ئۇكرائىنا ئوتتۇرىسىدىكى تىنچلىق سۆھبىتىنى ئىستانبۇلدا قايتا باشلاش ھەققىدىكى باياناتىنى مەمنۇنلۇق بىلەن قارشى ئالىدىغانلىقىنى ۋە 2022-يىلى توختاپ قالغان سۆھبەتلەرنىڭ توختاپ قالغان يەردىن داۋاملىشىشىنى قوللايدىغانلىقىنى ئېيتىپ، بۇنىڭدىن خۇشال بولغانلىقىنى بىلدۈردى.
ئۇ تۈركىيەنىڭ مەسىلىگە ئۇزۇن مۇددەتلىك ھەل قىلىش چارەسى تېپىش سۆھبەتلىرىگە ئۇيۇشتۇرۇشقا تەييار ئىكەنلىكىنى يەنە بىر قېتىم تەكىتلىدى
ئىستانبۇلدا 2022-يىلى مارتتا، ئۇرۇش باشلىنىپ قىسقا ۋاقىت ئۆتەر-ئۆتمەيلا، ئۇرۇشنى ئاخىرلاشتۇرۇش ئۈچۈن بىر قاتار سۆھبەتلەر ئۇيۇشتۇرۇلغان بولسىمۇ، تۆتىنچى يىلىغا كىرگەن ئۇرۇشنى توختىتىدىغان بىر كېلىشىم تۈزۈلمىگەن ئىدى.
رەجەپ تاييىپ ئەردوغان ئۇرۇشنى توختىتىشنىڭ ئۇزۇن يىللىق تەشەببۇسچىسى بولۇش سۈپىتى بىلەن، تۈركىيەنىڭ تىنچلىق سۆھبىتىنى ئۆتكۈزۈش ۋە چارە تېپىشقا تۆھپە قوشۇش ئۈچۈن قولىدىن كېلىدىغان بارلىق تىرىشچانلىقلارنى كۆرسىتىدىغانلىقىنى بىر نەچچە قېتىم تەكرارلىدى.
تۈركىيە رۇسىيە ۋە ئۇكرائىنا بىلەن ياخشى مۇناسىۋىتى بولۇشتەك ئالاھىدىلىككە ئىگە.
مۇناسىۋەتلىك ئۇچۇرلارTRT Global - Turkish president welcomes Putin’s remarks on resuming peace talks in Istanbul
