ھاماس ئىسرائىلىيە باش مىنىستىرى بېنيامىن نېتانياھۇنىڭ تۇتقۇنلارنى قويۇپ بېرىش ۋە غەززەنىڭ تەسلىم بولۇشىغا دائىر يېقىنقى باياناتىغرا «مەغلۇبىيەتنىڭ خىيالىي مەھسۇلى» دەپ رەددىيە بەردى.
پەلەستىن قارشىلىق كۆرسىتىش ھەرىكىتى گۇرۇپپىسى چارشەنبە كۈنى ئېلان قىلغان باياناتىدا، ئىسرائىلىيەلىك ئەسىرلەرنى قويۇپ بېرىشنىڭ پەقەت قارشىلىق ھەرىكىتىنىڭ شەرتلىرىگە باغلىق بىر كېلىشىم ئارقىلىقلا ئەمەلگە ئاشىدىغانلىقىنى ئوتتۇرىغا قويدى.
ھاماس سىياسىي بىيۇروسىنىڭ ئەزاسى ئىززەت ئەل رىشق تېلېگرامدا ئېلان قىلغان باياناتىدا، نېتانياھۇنىڭ غەززەدىكى ئۇرۇشنىڭ تۇتقۇنلارنى شەرتسىز قويۇپ بېرىش ۋە ھاماسنى يوقىتىش بىلەن ئاخىرلىشىدىغانلىقى ھەققىدىكى سۆزىنى تەنقىد قىلدى.
ئەل رىشق: «نېتانياھۇنىڭ بارلىق تۇتقۇنلارنى قويۇپ بېرىش ۋە ھاماسنى تەسلىم بولۇشقا مەجبۇرلاش ھەققىدىكى سۆزى نەق مەيداندىكى رېئاللىقنى ئەمەس، بەلكى پسىخولوگىيەلىك مەغلۇبىيەت تەسەۋۋۇرىنى ئەكس ئەتتۈرىدۇ» دېدى.
«كېلىشىم بولماي تۇرۇپ ھېچكىم قويۇپ بېرىلمەيدۇ»
ئەل رىشق ئىسرائىلىيە ھۆكۈمىتىنىڭ ھەربىي ھەرىكەتلەر ئارقىلىق تۇتقۇنلارنى قۇتقۇزۇشتا مەغلۇپ بولغانلىقىنى ئىلگىرى سۈرۈپ، قارشىلىق ھەرىكىتى بىلەن ئەستايىدىل كېلىشىم تۈزۈشنىڭ بۇنىڭدىن كېيىنكى بىردىنبىر يول ئىكەنلىكىنى بىلدۈردى.
غەززەنىڭ تەسلىم بولىدىغانلىقى توغرىسىدىكى پىكىرنى رەت قىلغان ئەل رىشق: «قارشىلىق ھەرىكىتى بەلگىلىگەن شەرتلەرنى قاندۇرىدىغان سۆھبەت ئارقىلىق ھاسىل قىلىنغان كېلىشىم بولماي تۇرۇپ، ئەسىرلەرنى قويۇپ بېرىش مەۋجۇت ئەمەس. غەززە تەسلىم بولمايدۇ. قارشىلىق ھەرىكىتى نەق مەيداندا قانداق تەڭلىمىلەرنى ئوتتۇرىغا قويسا، ھەرقانداق كېلىشىمنىڭ شەرتلىرىنىمۇ شۇ بەلگىلەيدۇ» دېدى.
نېتانياھۇ ئۇرۇشنىڭ نىشانلىرىنى تەكرارلىدى
بۇنىڭدىن ئىلگىرى باش مىنىستىر نېتانياھۇ X سۇپىسىدا ئېلان قىلغان باياناتىدا، ئۇرۇشنىڭ نىشانلىرىنىڭ ئۆزگەرمىگەنلىكىنى بىلدۈرگەن ئىدى. بارلىق ئىسرائىلىيەلىك تۇتقۇنلارنىڭ قويۇپ بېرىلىشىنى كاپالەتلەندۈرۈش، ھاماسنىڭ ھەربىي ۋە مەمۇرىي ئىقتىدارىنى يوقىتىش ھەمدە بۇ گۇرۇپپىنىڭ ئىسرائىلىيەگە بولغان تەھدىتىنى ئاخىرلاشتۇرۇش.
نېتانياھۇ ۋەزىپىلىرىنىڭ تېخى ئاخىرلاشمىغانلىقىنى ئېيتىپ: «ھاماس مەغلۇپ قىلىنىدۇ ۋە تارقىتىۋېتىلىدۇ، غەززە ئىسرائىلىيە ئۈچۈن ھېچقانداق خەۋپ بولمايدىغان ھالغا كېلىدۇ» دېگەن ئىبارىلەرنى ئىشلەتتى.
نېتانياھۇنىڭ باياناتى غەززەدە داۋاملىشىۋاتقان ئىرقىي قىرغىنچىلىق ۋە 2023-يىلى 7-ئۆكتەبىردىن بۇيان تۇتۇپ تۇرۇلۇۋاتقانلارنىڭ تەقدىرىگە مۇناسىۋەتلىك كۈچىيىۋاتقان ئىچكى بېسىم ۋە خەلقئارالىق تەكشۈرۈشلەر ئەۋج ئالغان بىر پەيتتە ئېلان قىلىندى.
