تۈركىيە بىلەن كانادا سەيشەنبە كۈنى، ئىككى دۆلەتنىڭ سودا مىنىستىرلىقلىرى ئېلان قىلغان قوشما باياناتقا ئاساسلانغاندا، ئەركىن سودا كېلىشىمىگە قارىتا دەسلەپكى سۆھبەتلەرنى باشلاش مەسىلىسىدە پۈتۈشكەن.
تۈركىيە سودا مىنىستىرى ئۆمەر بولات بىلەن كانادا سودا مىنىستىرى مانىندېر سىدۇ ئىككى دۆلەت ئوتتۇرىسىدىكى كۈچلۈك ۋە بارغانسېرى ئېشىۋاتقان ئىقتىسادىي شېرىكچىلىكنى تەرەققىي قىلدۇرۇش ئۈچۈن بىر يەرگە جەم بولغان.
باياناتتا مۇنداق دېيىلگەن:
«جۇمھۇر رەئىسىمىز رەجەپ تاييىپ ئەردوغان بىلەن كانادا باش مىنىستىرى مارك كارنېي ئوتتۇرىسىدا يېقىندا ئېلىپ بېرىلغان تېلېفون سۆھبىتى ئاساسىدا ئەمەلگە ئاشقان بۇ ئالاقە مۇناسىۋىتى بىلەن، مىنىستىرلار تۈركىيە بىلەن كانادا ئوتتۇرىسىدىكى سودا ۋە مەبلەغ سېلىش مۇناسىۋەتلىرىنى تېخىمۇ چوڭقۇرلاشتۇرۇشقا بولغان ئورتاق ئىرادىسىنى يەنە بىر قېتىم تەكىتلىدى.
بۇ قەدەم ھەر ئىككى دۆلەتنىڭ سودا شېرىكچىلىكىدىكى بارلىق يوشۇرۇن كۈچنى جارى قىلدۇرۇش ئارزۇسىنى ئەكس ئەتتۈرىدۇ.»
باياناتتا، مىنىستىرلارنىڭ ئىككى دۆلەت ئوتتۇرىسىدىكى ئالاقىنى كۈچەيتكەن ھەمدە يولۇچىلار، كارخانىلار ۋە ئېكسپورتچىلار ئۈچۈن يېڭى پۇرسەتلەرنى ياراتقان «ھاۋا قاتنىشى كېلىشىمى» نىڭ دائىرىسىنىڭ يېقىندا كېڭەيتىلگەنلىكىنى خۇشاللىنارلىق بىلەن قارشى ئالغانلىقى تەكىتلىنىپ مۇنداق دېيىلگەن:
«تەرەققىي قىلغان ھاۋا قاتنىشى ئالاقىسى سودا مۇناسىۋەتلىرىنىڭ تېخىمۇ كۈچىيىشىگە تۆھپە قوشىدۇ ۋە ئىقتىسادىمىزنى بىر-بىرىگە تېخىمۇ يېقىنلاشتۇرىدۇ.»
