ئەنقەرەدە ئۆتكۈزۈلگەن ناتو باشلىقلار يىغىنىدا، ئامېرىكا پىرېزىدېنتى دونالد ترامپنىڭ تۈركىيەنىڭ F-35 ئايروپىلانىغا ئېرىشىشىگە مۇناسىۋەتلىك ئىجابىي سۆزلىرى ئافىنا ھۆكۈمىتىدە ئەنسىرەش ياراتتى.

گىرېتسىيەنىڭ سابىق باش مىنىستىرلىرىدىن ئالېكسىس سىپراس «ئېكونومىست» ژۇرنىلى تەرىپىدىن گىرېتسىيەدە ئۇيۇشتۇرغان بىر سۆھبەت يىغىنى جەريانىدا كۈن تەرتىپكە ئائىت ئېلان قىلغان باياناتىدا: «يېقىنقى ۋاقىتلاردا مەيدانغا كەلگەن ئۆزگىرىشلەر چوڭ ئەنسىرەش ياراتماقتا. ھەم ياۋروپانىڭ بىخەتەرلىكى، ھەم دۆلىتىمىزنىڭ بىخەتەرلىكى توغرىسىدا» دېدى.

ئالېكسىس سىپراس كىريا كوس مىچوتاكىس ھۆكۈمەتنى كۆپ تەرەپلىمىلىك تاشقى سىياسەتنى تاشلاپ، «شەرتسىز بېرىش» سىياسىتىگە ئۆتۈپ كېتىش بىلەن ئەيىبلىدى. جو بايدېن مەزگىلىدە، ئۆزى ھاكىمىيەت بېشىدىكى چاغدا ئۆكتىچى مىچوتاكىسنىڭ ئۆزىنى «ترامپچى» دەپ ئاتىغۇدەك دەرىجىدە «ئاشقۇنچە ھەرىكەتلەر»دە بولغانلىقىنى ئېيتتى.

سىپراس: «بۈگۈنكى ئەھۋالىمىزدا F-35 لەر، F-16 لەر، ياۋروپانىڭ كۈرەشچى ئايروپىلانلىرى (Eurofighter)، ئامېرىكانىڭ ئايروپىلان موتورلىرى تۈركىيەگە بېرىلىۋاتىدۇ. بىزنىڭ بولسا چوبان ئارىلىغا (قوزا ئارىلىغا) سىم لىنىيە ياتقۇزۇش ئىمكانىيىتىمىز يوق. ھېچ شۈبھىلەنمەڭ، ئەھۋال دەرۋەقە مانا مۇشۇنداق. دۆلەت بىخەتەرلىكىمىز خەۋپ ئاستىدا قالغان بىر ۋەزىيەتتە تۇرۇۋاتىمىز» دېدى.

ئۆزىنىڭ باش مىنىستىرلىق مەزگىلىدە «سودا ھەربىي بازىسى» نى 5 يىللىق ئىشلىتىش كېلىشىمىنىڭ بەدىلى سۈپىتىدە ئامېرىكادىن تەلەپلەردە بولغانلىقىنى ئەسكەرتكەن سىپراس، مىچوتاكىسنىڭ بولسا دەدەئاغاچنى ئۆز ئىچىگە ئالغان بۇ ئىشلىتىش ھوقۇقىنى 6 ئوخشىمىغان بازا ئۈچۈن مۇددەتسىز بېرىۋېتىش بىلەن ئەيىبلىدى.

سىپراس، تۈركىيەنىڭ F-35 ئايروپىلانىغا ئېرىشىشىگە مۇناسىۋەتلىك ترامپتىن كەلگەن ئىجابىي باياناتلارغا قارىتا: «مەن دۆلەت دەرىجىلىك بىر مەغلۇبىيەت دەپ باھالايمەن» دېگەن سۆزلەرنى ئىشلىتىپ، تۈركىيەنىڭ F-16، F-35، ياۋروپا ئۇرۇش ئايروپىلانىغا ئېرىشىش، لىۋىيە بىلەن دېڭىز تەۋەلىكى دائىرىسىنى بەلگىلەش ئۈچۈن كېلىشىم تۈزۈش قاتارلىق نۇرغۇن ئۇتۇقلارنى قولغا كەلتۈرگەنلىكى تەرەپكە دىققەتلەرنى تارتتى.