ئىران ئامېرىكا قوشما ئىشتاتلىرىدىن تېھراننىڭ يادرو پىلانىغا مۇناسىۋەتلىك مۇزاكىرىلەردە ئىسرائىلىيەنىڭ بېسىمى ۋە تەسىرىدىن خالىي ھالدا، ئۆز مەنپەئەتلىرىنى ئاساس قىلىپ قارار چىقىرىشنى تەلەپ قىلدى.

ئىران دۆلەت خەۋپسىزلىك كېڭىشى باش كاتىپى ئەلى لارىجانى «ئەلجەزىرە» تېلېۋىزىيەسىنىڭ زىيارىتىنى قوبۇل قىلغاندا، مۇزاكىرە مۇساپىسىنىڭ داۋاملىشىۋاتقانلىقىنى ۋە رايون دۆلەتلىرىنىڭمۇ سۆھبەتلەرنىڭ مۇۋەپپەقىيەتلىك بولۇشى ئۈچۈن تىرىشچانلىق كۆرسىتىۋاتقانلىقىنى بىلدۈردى. لارىجانى ئومان تاشقى ئىشلار مىنىستىرى بەدر بىن ھامەد ئەلبۇسەئىدى ئارقىلىق تېھراننىڭ مەيدانى توغرىسىدا ئامېرىكاغا يوللانغان مەكتۇپقا تېخى رەسمىي جاۋاب كەلمىگەنلىكىنى ئېيتتى.

ئىراننىڭ سۆھبەتلەردە ھەمكارلىققا ئوچۇق ئىكەنلىكىنى ۋە بۇ مۇساپىنى قوللايدىغانلىقىنى تەكىتلىگەن لارىجانى، ئىراننىڭ يادرو قورالىغا ئىگە ئەمەسلىكى ۋە بۇنىڭغا ئېرىشىش نىيىتىنىڭ يوقلۇقى مەسىلىسىدە تېھران بىلەن ۋاشىنگتون ئوتتۇرىسىدا ئورتاق چۈشەنچە بارلىقىنى ئەسكەرتتى.

مۇزاكىرە جەريانىنىڭ بىھۇدە ئۇزارتىلىپ كەتمەسلىكى كېرەكلىكىنى تەكىتلىگەن لارىجانى، ئىراننىڭ باشقۇرۇلىدىغان بومبا پىلانىنىڭ مۇزاكىرە كۈنتەرتىپىگە كىرگۈزۈلمەيدىغانلىقىنى، باشقا مەسىلىلەرنىڭ قوشۇلۇشىنىڭ جەرياننى ئاقسىتىدىغانلىقىنى ئېيتتى. ئۇ: «باشقۇرۇلىدىغان بومبا پىلانىمىز يادرو مەسىلىسىدىن پۈتۈنلەي مۇستەقىل بىر تېما. بۇ دۆلەت بىخەتەرلىكىمىزگە مۇناسىۋەتلىك ئىچكى مەسىلە، شۇڭا مۇزاكىرە تېمىسى قىلىنمايدۇ» دېدى.

ئۇ يەنە ئىراننىڭ ئوران قويۇقلاندۇرۇشنى نۆلگە چۈشۈرۈش پىكىرىنىڭ «كۈنتەرتىپتە يوقلۇقى»نى تەكىتلەپ: «بۇ تېخنىكىدا يۇقىرى سەۋىيەگە يەتكەن بىر دۆلەتنىڭ بۇنى نۆلگە چۈشۈرۈشى ئەمەلىيەتكە ئۇيغۇن ئەمەس» دېدى ۋە سەھىيە تەتقىقاتلىرى بىلەن داۋالاش ئىشلىرىدا قويۇقلاندۇرۇلغان ئورانغا ئېھتىياج بارلىقىنى بىلدۈردى.

ئىراننىڭ ئېھتىماللىقى بولغان تەھدىتلەرگە تاقابىل تۇرۇشقا تەييار ئىكەنلىكىنى ئەسكەرتكەن لارىجانى، ئىسرائىلىيەنى مۇزاكىرىلەرگە ئارىلىشىش ۋە رايوننىڭ مۇقىملىقىنى بۇزۇشقا ئۇرۇنۇش بىلەن ئەيىبلەپ: «مۇزاكىرىلىرىمىز پۈتۈنلەي ئامېرىكا بىلەن ئېلىپ بېرىلماقتا. ئىسرائىلىيە بىلەن ھېچقانداق ئالاقىمىز يوق، لېكىن ئىسرائىلىيە بۇ جەريانغا ئارىلىشىپ، مۇزاكىرىلەرگە توسقۇنلۇق قىلىشقا ۋە بۇزغۇنچىلىق قىلىشقا ئۇرۇنماقتا» دېدى.

لارىجانى يەنە رايون مۇقىملىقىنى قوغداش ئۈچۈن ئىراننىڭ تۈركىيە، سەئۇدى ئەرەبىستان ۋە مىسىر بىلەن ھەمكارلىق ئورنىتىشقا تەييار ئىكەنلىكىنى تىلغا ئالدى. سۆزىنىڭ ئاخىرىدا، ئۆتكەن يىلى ئىيۇندا ئىسرائىلىيە بىلەن يۈز بەرگەن 12 كۈنلۈك توقۇنۇش ئۈستىدە توختالغان لارىجانى، ئىران ئىستىخبارات ئورگىنىنىڭ بەزى يېتەرسىزلىكلىرىنى ئېتىراپ قىلغان بولسىمۇ، بىخەتەرلىك تەدبىرلىرىنىڭ كۈچەيتىلگەنلىكىنى ۋە ئىسرائىلىيەنىڭ ھۇجۇملىرىنىڭ دۆلەت ئىچىدىكى ئىتتىپاقلىقنى تېخىمۇ مۇستەھكەملىگەنلىكىنى قەيت قىلدى.